João 9:6-40

⁶Morara kaxĩpo ituh tykase Jezu nono pona. Orino pitiko tywyrywyrymase tomary ke totakuru maro. Morarame orino tyrise enuru pona.

⁷Ynara tykase eya, —Ytoko. Osẽkurikata Xiroe kuaka, ariamã kuaka, tykase. (Aomiryae, “Xiroe,” kary, “Tonyohse,” katopo.) Morarame toytose ynororo. Mame tõsẽkurikase. Mame tooehse ropa ynororo kure osenuhmãko ropa rahkene.

⁸Morarame mokyro waro exiketõ moroto kynexine. Tonure pyra ahtao ro tonese eya xine osema tao ro ahtao, tineru pitiko eraximaryhtao ro eya. Ynara tykase toto, —Mosero puhko tonuremỹpo kara, tykase toto ipoko.

⁹—Mokyro roh mosero kynenehpyrykõ ro, tykase imehnomo. Yrome imehnõ ynara tykase, —Ynoro kara mosero. Ipanõ rokẽ mosero, tykase toto. —Ynororo ase, tykase, tonuremỹpokara a tozuhse toto.

¹⁰—Otãto tonure ropa toehse mahno? tykase toto tõturupose eya.

¹¹Ynara tykase ynororo, —Orutua orino pitiko tyrise jenuru pona. Mame, “Ytoko, osẽkurikata Xiroe kuaka,” tykase exiryke ytono. Morarame tõsẽkurikase jahtao jenutã ropa rahkene, tykase toto a.

¹²—Otoko mokyro nae? tykase toto. —Kũ, zuaro pyra ase, tykase tonuremỹpokara eya xine.

¹³Morarame tonuremỹpokara tarose eya xine parixeu tomo a.

¹⁴Moro ẽmepyryae oserematoh kynexine. Moro ẽmepyryae orino pitiko tyrise Jezu a tonurẽkara enuru kurãkatohme ropa.

¹⁵Morarame tonuremỹpokara a tõturupose parixeu tomo, —Otãto puhkoke oenutã ropa puhko? tykase toto eya. —Orino pitiko jenuru pokona tyrise mokyro a. Morara exiryke tõsẽkurikase ropa jahtao jenutã ropa samo mokyro poe, tykase ynororo eya xine.

¹⁶Mame ynara tykase parixeu tomo, —Mokyro Ritonõpo poe pyra mana, aomipona pyra exiryke. Oseremara mana oserematohae, tykase toto. Yrome imehnõ ynara tykase, —Iirypyrymãme ahtao kurãkõkara onukurãkara exiry, tykase toto. Atae pyra toto.

¹⁷Morara exiryke tõturupose ropa parixeu tomo. Ynara tykase toto tonuremỹpokara a, —Oenuru tukurãkase ropa na eya? Morara exiryke oty ãko ipoko mah? tykase toto tõturupose. —Urutõ mokyro Ritonõpo poe, tykase ynororo eya xine.

¹⁸Yrome tonure pyra aexihpyry ajohpe rokẽ tokarose juteu tomo a. Morara exiryke jũ tonehpose jẽ maro tyya xine tõturupotohkõme eya xine.

¹⁹Ynara tykase toto eya xine, —Omũkuru mosehro? Ajohpe pyra moinoro tonure pyra tonuruse nahe? Ahtao otãto tonure ropa toehse nae? tykase toto tõturupose eya xine.

²⁰Jũ tõ ynara tykase, —Yna mũkuru mosero. Tonure pyra tonuruse nase. Moro waro ynanase.

²¹Yrome otãto toekurãkase ropa nahe? Onoky a tukurãkase ropa nahe? Kũ, zuaro pyra reh ynanahse. Eya ekaropotoko. Poetome pyra toehse ynororo nase. Oezukurukõ waro mana,

²²tykase toto eya xine, juteu tõ esã zuno toexirykõke. Ynara tykase juteu tõ esã exiryke typoetory tomo a, “Jezu enetupuhnõko ase, Ritonõpo nymenekahpyryme kananõ sutũtanohpotone ropa atamorepatoh tae,” tykase toto, atae toexirykõke typoetory tõ maro.

²³Morara exiryke, toto zuno toexirykõke, jũ tõ morara tykase, “Poetome pyra toehse mana. Eya ekaropotoko,” tykase toto.

²⁴Morarame tonuremỹpokara tykohmase ropa tyya xine. Ynara tykase toto eya, —Zae rokẽ yna zuruko. Ritonõpo mã oetãko azahkuru awahtao. Morara exiryke zae rokẽ yna zuruko. Mokyro iirypyryme exiry waro sytatose, tykase toto tonuremỹpokara a.

²⁵Yrome ynara tykase ynororo, —Iirypyryme aexiry waro pyra ase. Ynara rokẽ zuaro ase, tonure pyra exiase. Yrome seromaroro ase osenuhmãko ropa ipoe, tykase tonuremỹpokara eya xine.

²⁶—Otara sã ke orino oenuru kurãkatohme ropa? tykase toto tõturupose ropa eya toto.

²⁷—Kuurutouhxo puhko seromaroro. Yrome jomiry onetara sã matokeh. Oty katoh jomiry etary se ropa hmatou? Otarãme amarokõ roropa ipoetoryme exĩko matose, tykase ynororo eya xine.

²⁸—Arypyra. Omoro mase ipoetoryme. Yna Moeze poetoryme.

²⁹Ritonõpo tõturuse Moeze a. Moro waro sytatose. Yrome mokyro otokoino tooehse? Zuaro pyra ynanase, tykase toto.

³⁰—To! Otãto puhkoke zuaro pyra hmatou? Yrome jenuru tukurãkase ropa eya.

³¹Iirypyrymãkõ omiry onetara Ritonõpo mana. Moro waro sytatose. Yrome tuno exiketõ etãko mana. Tõmipona exiketõ etãko roropa mana, enara rokene.

³²Moinoro sero panõ onenepitopyra sytatose. Tonure pyra aexihpyry kurãkary ropa onenepitopyra sytatose.

³³Ritonõpo poe pyra tahtao tyjamitunuke pyra exiry, kurãkõkara onukurãkara exiry, tykase tonuremỹpokara eya xine.

³⁴Yrome ynara tykase toto eya, —To! Tyyrypyhpyke oenurune. Tuãtase mase iirypyryme ro. Yna anamorepara exiko, tykase toto eya. Morarame atamorepatoh tae tonuremỹpokara tupurohpurohmase toto a oehzomopyra aehtohme.

³⁵Mokyro tũtanohpory totase Jezu a ahtao toytose eya. Ynara tykase eya, —Kapu ae Ayhtohpyry enetupuhnõko mah? tykase Jezu eya.

³⁶—Onokyh mokyro enetupuhtohme ya? tykase tonuremỹpokara Jezu a.

³⁷Ynara tykase Jezu eya, —Meneno. Seromaroro oturũko oya mana, tykase Jezu eya.

³⁸—Ỹ, enetupuhnõko ase, tykase. Tosekumuru po typorohse ynororo Jezu ẽpataka, tuisame imehxo enetuputyryke tyya. Morara exiryke tosekumuru po typorohse ynororo Jezu ẽpataka tonuremỹpokara.

³⁹Ynara tykase Jezu, —Sero po tonurãkara panõkõ nae Ritonõpo omiry waro pyra toexirykõke. Yrome zuaro toexirykõ se toto. Morara exiryke toto kurãkãko ropa ase. Imehnõ nae roropa. Ritonõpo omiry waro ynanase emero porehme, kananõ nae. Yrome aomipona pyra toto. Tonure toh repe tyya xine rokene. Yrome Ritonõpo a tonurepyra sã toto. Morara exiryke toto se pyra mã Ritonõpo, tõmipona pyra toto exiryke, tykase Jezu.

⁴⁰Morara kary etaryke tyya xine ynara tykase parixeu tomo Jezu a, —Yna ke. Tonurẽkara sah ynanah? tykase toto tõturupose.