San Juan 9:6-40

⁶Sun kiztawane, Jesúsne pilta ilpi ɨtkulat kit ilpikasa pitchin pilkasa sain kit kasu ɨsalparain izsachimikasha nɨra.

⁷Kwiztane ussa kaizta: —Mane ɨt kit Siloé kwazi piwailta kittas. (Awa pitne Siloé “ɨninta” mun.) Suasne an ampune ɨt kit matsɨhta kit kit paiña yalta iztu kailta.

⁸Suasne makin uztuzkas ñamin kasu izsachi pial paikwatmikasha iztaruzkas kaizara: —¿An ampune pial paikwan uzatmikaki?

⁹Mɨnpazha kaizara: —Watcha. Us i. Mamaztuzne kaizara: —Us chi. Uskanain iztɨt i. An ampune kaizta: —Watcha. Nane an pial paikumtuatmika ish.

¹⁰Suasne ussa mɨmaara: —¿Mizama mane izshinas?

¹¹Usne sɨnkanara: —Maza ampune, Jesús munmikane, pil sat kit ɨsalpara kasura pil nɨt kit kaizta: “Siloé kwazi piwailta ɨt kit kittash.” Ɨrau. Na kitpane, izshinarau.

¹²Suasne ussa mɨmaara: —¿Sun ampune mɨntama tui? Usne kaiznara: —Pianchish.

¹³Suasne uspane izsachimikasha, wat parɨtmikasha, Fariseo awa purakin mɨlaara.

¹⁴Jesúsne kwaizkulmu payura ilpikasa pil sat kit izsachimikasha wat paninta.

¹⁵Suasne Fariseo awane mamasa an ampura ¿Mizama mane kasu izshinai? mɨmaara. Usne kaiznara: —Usne pil kasu ɨsalpara nɨish. Nane kasu kittau. Mane iztus.

¹⁶Suasne mɨnpazha Fariseo awaruztas kaizara: —Sun kirɨtmikane Diostas asachi. Usne kwaizkulmu payu nɨjchiwal kimtu. Mamaztuzne kaizara: —Kwail kirɨtmika kane, ¿Mizama akwan wat kal kishinai? Sun kizara aizpa akwa, uspane usparuzpain paimpa naiyara.

¹⁷Mamasa kasu izsachimikasha mɨmaara: —¿Nune chi kiztu kasu izkulnintamikawa? Usne kaiznara: —Usne Dios pit kainammmika i.

¹⁸Judío awa ɨninturuzne sun ampu kasu izsachira nɨjkulshiarachi, paiña kasu iztu akwa. Suasne uspane kasu izsachimika wat parɨtpa papihshtakas akkuhshtakas akuat kit

¹⁹mɨmaara: —¿Anne u painkulki? ¿Us kasu izsachi kawirɨt kizamtuki? ¿Mizama mane iztui?

²⁰Papihshkas akkuhshkas sɨnkanara: —Aune au painkul i pianwas. Usne kasu izsachi kawirɨt.

²¹Mane miza iztu pianchiwas. Mɨnma ussa kasu izkulninta pianchiwas. Ussa mɨmarain. Ɨlapa wai. Usmin uruza kainashina.

²²Papihshkas akkuhshkas sun kizpailta, Judío ɨninturuza ishkwantu akwa. Uspane usparuzpain nɨjkulara, Jesús Dios narɨtmika i kizmuruza Dios kammu yalkis ukkat kit puzninnana.

²³Katmizna paiña papihshkas akkuhshkas sun kizpailta: “Ussa mɨmarain. Ɨlapa wai.”

²⁴Suasne Judío awane mamasa an ñamin kasu izsachimikasha akwaat kit kaizara: —Dios iztakin watcha kaizti. Aune an ampu kwail kimmika i pianmakpas.

²⁵Usne sɨnkanara: —Us kwail kirɨtne, pianchiish. Nain sun pianish. Nane kasu izsachiarau. Mane iztus.

²⁶Mamasa mɨmaara: —¿Nua chima kizi? ¿Mizama kizi, up kasu izkulninna?

²⁷Sɨnkanara: —Uruza kaiznarau me. Une mɨamtuchi. ¿Chishma sunmin mamasa mɨashimtuwas? ¿Ukas ussa kanpashiamuskiwas?

²⁸Suasne ussa kwail kizat kit kaizara: —Nune sun ampura kanpam kit us kaiztu aizpa mɨmtu. Aune Moisésta kanpam kit us kaiztu aizpa mɨmtumakpas.

²⁹Aune Dios Moisésta parara aizpa pianmakpas. Anne mɨntas at pianchimakpas.

³⁰Usne sɨnkanara: —U sun kaizamtu akwa, nane iztasparu. ¿Une sun ampu mɨntas amtu pianchimakkiwas? Usne nawa kasu izkulninta.

³¹Watcha i. Diosne kwail kimtuza mɨmtuchi. Usne Diosta wakpuj waintuzainkas Dios ɨninta aizpa kimturuzainkas mɨnamtu.

³²Au su sarasmin, mɨnminkas sunpa mɨarachi. Mizurainkas mɨnminkas kasu izsachi kawirɨtmikasha izkulnintachi.

³³Sun ampu Diostas atchine, chinkas kisachi.

³⁴Uspane sɨnkaara: —Kawirasmin, nune kwail kira. ¿Nune aumɨza kamtashimtukish? Uspane ussa Dios kammu yaltas ukkat kit puzninara.

³⁵Awa kasu izsachimikasha kammu yalkis ukkat kit ɨninara. Jesús sunpa piankamtawane, usne ussa sait kit wanmal kit mɨmara: —¿Nune chiyuras Ampura nɨjkultukish?

³⁶Ampune sɨnkat kit kaizta: —Anpat. ¿Mɨnmas? Mɨnma i kaizcha, na ussa nɨjkulnapa.

³⁷Jesúsne ussa kaizta: —Nune ussa iztɨt me. Nain ish. Nane nukasa paramtus.

³⁸Suasne ampu Jesústa wakpuj waintuasmin, kaizta: —Anpat. Nane nu Dios narɨtmika i nɨjkultus.

³⁹Suasne Jesúsne kaizmɨzta: —Nane an sukin arau, awa uspa kwail piankamanapa, Dios usparuza watsat mɨlnanapa, kwail kiamanpa. “Diosta pianmakpas” minturuzne Diospa watsat mɨlmumikasha kwayanazi.

⁴⁰Suasne sun mɨarawane, mɨnpazha Fariseo awaruztas us panatkin ussa mɨmaara: —Aune watcha Diosta pianmakpas, kizara.