João 6:42-69

⁴²Morara exiryke ynara tykase toto, —Jezu mosero, Joze mũkuru. Jũ waro sytatose. Jẽ waro roropa sytatose. Otara ãkohxo ke hnae? “Kapu ae aepyhpyry ase,” ãko. Epyrypãko rokẽ hnae, tykase toto.

⁴³Ynara tykase Jezu eya xine, —Ykerekeremara ehtoko.

⁴⁴Ritonõpo jenetupuhpopyra oya xine ahtao, ya oehpyra matose. Yrome ya ooepyrykohtao oẽsemãkapotorỹko ropa ase aorihtyã tõ ẽsemãkapotoh ropa po.

⁴⁵“Emero ahno amorepãko Ritonõpo mana,” tykase urutõkõ pake. —Papa omiry etaryhtao tuaro exĩko toto. Mame ya oehnõko toto.

⁴⁶Yrome Ritonõpo nymyry onenepyra matose, ya rokẽ tonese.

⁴⁷—Zae rokẽ ynara ãko ase, jenetupuhnanõ mã orihpỹme exĩko.

⁴⁸Ourukõme nymyry ase orihpyra oehtohkõme.

⁴⁹Kapu ae enehpohpyry tonahse atamurukomo a ona po. Toorihse toto.

⁵⁰Yrome kapu ae aepyhpyry nymyry tonahse oya xine ahtao orihpyra exĩko matose.

⁵¹Ourukõme nymyry ase, kapu ae aepyhpyryme jexiryke. Upũ enapyryhtao oya xine orihpyra exĩko matose jũme. Upũ nase wyi samo, ynekaroryme oya xine, emero porehme, orihpyra oehtohkõme jũme, tykase Jezu eya xine.

⁵²Morara kary etaryke tyya xine tõsezusezuhse toto juteu tõ tuisary tomo, —Otãtohxo ke tupũ ke kuopatorỹko hnae? tykase toto, oxime rokẽ tõturuse toto. (“Upũ tonahse oya xine ahtao,” kary, “Tonetupuhse oya xine jahtao,” katopo.) Yrome moro onenetupuhpyra tokurehse toto.

⁵³Morara tykase ropa Jezu eya xine, —Ajohpe pyra kapu ae aytohpyry ase. Upũ onenahpyra awahtao xine orihketõme rokẽ matose. Umunuru roropa onẽpyra awahtao xine orihketõme matose.

⁵⁴Upũ enapyryhtao oya xine orihpỹme exĩko matose. Umunuru tõse roropa oya xine ahtao oẽsemãkapotorỹko ropa ase aorihtyã tõ ẽsemãkapotoh ropa po.

⁵⁵Upũ mã tonahsẽme nymyry. Umunuru eukurume nymyry, tõsẽme.

⁵⁶Upũ tonahse oya xine ahtao umunuru maro ymaro exĩko matose. Ywy roropa amaro xine exĩko ase okurohtao xine.

⁵⁷Tamoreme Ritonõpo isene mana. Ijamitunuru poe isene exĩko ropa ase, jenehpohpõ jamitunuru poe. Moro saaro matose upũ tonahse oya xine ahtao ypoe isene exĩko ropa matose.

⁵⁸Ywy ase ourukõ nymyry kapu ae aepyhpyryme jexiryke. Atamurukõ napyrỹpyry sã pyra ase, nono pona aepukahpyry sã pyra ase. Moro tonahse mokaro a repe. Imeĩpo toorihse toto emero porehme. Yrome upũ tonahse oya xine ahtao orihpyra exĩko matose jũme, moro sã pyra jexiryke, tykase ynororo eya xine.

⁵⁹Morara tykase Jezu eya xine toto amoreparyme, juteu tõ atamorepatoh tao, Kapanaũ po. (“Upũ tonahse oya xine ahtao,” kary, “Tonetupuhse oya xine jahtao,” katopo. “Umunuru enyryhtao oya xine,” kary roropa, “Tonetupuhse oya xine jahtao,” katoh sero. Yrome juteu tõ esã onenetupuhpyra moro poko toh kynexine.)

⁶⁰Morara kary etaryke tyya xine ynara tykase ipoetory tomo, —To! Tupimehxo reh mã kuamorepatohkõ eya. Onetarahme sã reh sytatohse, tykase toto oxime rokene.

⁶¹Tõmiry poihtory waro Jezu kynexine, kara ro mokaro ahtao eya. Morara exiryke ynara tykase ynororo eya xine, —Poremãnõko matohu jomiry etaryke oya xine? Poremãpyra ehtoko.

⁶²Poremãnõko kuhse matose jonukuru ropa eneryhtao oya xine kapu aka.

⁶³Ritonõpo zuzenu poe ipoenõme enurũko matose. Opũkõ poe exipyra matose. Ritonõpo zuzenu poe kuamorepatose isene oehtohkõme.

⁶⁴Yrome toitoine ro matose jenetupuhpyra, tykase. Apitoryme ro tonetupuhpynõ waro Jezu kynexine. Towokane waro roropa kynexine.

⁶⁵Naeroro ynara tykase ropa Jezu eya xine, —Morara exiryke morara tykase ywy oya xine, “Papa nekarohpyryme awahtao xine jenetupuhnõko matose. Ya oehnõko roropa matose,” ase, tykase Jezu eya xine.

⁶⁶Morara kary etaryke tyya xine toeramase ropa toto tuhke, Jezu ekahmahpõkomo.

⁶⁷—Amarokõ ke? tykase Jezu, tõturupose mokaro a, 12mãkomo a. —Urumekãko roropa hmatohu? tykase eya xine.

⁶⁸Ynara tykase Ximão Peturu, —Omoro rokẽ yna esẽme mase. Onekarohpyry ke rokẽ orihpyra exĩko ynanase jũme, tykase eya Peturu.

⁶⁹—Seromaroro oenetupuhnõko ynanase, awaro yna exiryke. Kure mase ipunaka. Ritonõpo poe mase, tykase Peturu eya.