Juan 6:42-69

⁴²Zee nzhé re xaa: —¿Che naleet xaa ne nak Jesús, xgann Che? Rese be nlabeyy xuz xaa nu xnaa xaa. ¿Xomod né xaa nal: “Nyaad na naz yiba”?

⁴³Zee lee Jesús nzhé: —Nawdizht gu sbaa.

⁴⁴Nik tub xaa nyent mod yiid lo na, chelee Xuz na, xaa mxaal na, nayiidnot xaa lo na; zee seban na xaa ba mbizh gwluzh.

⁴⁵Re xaa mzaa kwent kwaan nzhé Dios lo lee xaa yilo nzhé xaa: “Yo mbizh seed Dios rese xaa”. Snee rese xaa kwaan nzhon xtizh Xuz na nu nseed lo xaa, nyiid xaa lo na.

⁴⁶’Nu nanakta nel ngune stub xaa lo Xuz na; xaa ngune lo xaa nak na, xaa nyaad naz lo Dios.

⁴⁷Wlipa na nii na, xaa kwaan ngwii lo na, le xaa gan yalnaban kwaan tira.

⁴⁸Lee na nak kwenta pan kwaan nzaa yalnaban kwaan tira.

⁴⁹Re xey be xaa yilo ndaw pan kwaan nyaad naz yiba naz wen, per nixa ndaw xaaya ngut xaa.

⁵⁰Per kwaan kaza na kwent lo gu nak pan wlipa kwaan nyaad naz yiba, nu loka xaa kwaan gawa tira nayeta xaa.

⁵¹Lee na nak pan ba, kwaan nyaad na naz leen yiba; nu loka xaa kwaan gaw pan ne tira ban xaa. Lee pan kwaan za na nak leeka baal cheen na, nu za naya kwent cheen rese myet yizhyo ne zee ban xaa.

⁵²Lee re xaa mzelo mkediizha: —¿Xomod nzho mod zaa xaa ne leeka kwerp cheen xaa gaw be?

⁵³Jesús nzhé lo re xaa: —Wlipa na nii na lo gu, na nak Xaa Mzhin Ngok Myet nu chelee gu nagawt gu baal cheen na, nu nagot gu xren na, nabant gu.

⁵⁴Loka xaa kwaan gaw baal cheen na nu go ren cheen na nkano xaa yalnaban kwaan tira, nu na seban xaa mbizh gwluzh.

⁵⁵Nel baal cheen na nak laaw xaa kwaan wlipa, nu xren na nak kwaan wlipa nzho xaa.

⁵⁶Lee xaa kwaan nzhaw baal cheen na nu nzho xren na tubka nzo xaa zee kwaan na, nu na nzo tubka kwaan lee xaa.

⁵⁷Lee Xuz na, xaa mxaal na nkano yalnaban, nu na mban kwent cheen lee xaa; nu leeka see, loka xaa gaw baal cheen na, ban xaa kwent cheen na.

⁵⁸Kaza na kwent cheen pan kwaan nyaad naz yiba. Lee pan ne nanakt mod kwaan nyaad naz yiba kwaan ndaw re xey be, xaa yilo, nel nixa ndaw xaaya ngut xaa, per loka xaa gaw pan kwaan za na, tira ban xaa.

⁵⁹Jesús nzhé re kwaane, paro nkasa re nu nseed nu xtizh Dios yezh Capernaum.

⁶⁰Gorna mbin re xaa kwaan nzhé Jesús, zyen doo xaa nzhake tich xaa mbezh: —Nagan doo la kwaan nii xaa ne yek be; ¿che nzho mod gon be xtizh xaa?

⁶¹Jesús mzeen kwaan kawdizh re xaa, zee nzhé xaa: —Nawent nzhak lextoo gu nzhon gu kwaane.

⁶²¿Xomod gak lextoo gu chol ne gu lee na, Xaa Mzhin Ngok Myet, yixoob paro nzob na yilo?

⁶³Mbi Naban nak xaa nzaa yalnaban, per kwerp nyent mod zaa yalnaban. Nu lee re kwaan nii na lo gu nak cheen Mbi Naban nu cheen yalnaban.

⁶⁴Per seesa nzho lak gu nanet wii lo na. Nel axta yilo, nela Jesús cho xaa nanet wii lo xaa, nu ne xaa xana xaa zaa xaa lo re xaa nzhekla gut xaa.

⁶⁵Zee nzhé xaa: —Kwaanzee nii na lo gu nik tub xaa nyent mod yiid lo na chelee Xuz na nayiidnot xaa lo na.

⁶⁶Kwaanzee zyen doo xaa nzhake tich Jesús, mlaa xaa xaa nu nya xaa.

⁶⁷Jesús mnabdizh lo chiibchop nu, xaa kwaan mseed lo xaa, nu né xaa: —¿Che noka re gu nzhekla nya?

⁶⁸Simón Pér mkeb nzhé: —Xaa Nabeyy, ¿cho lo ya nu? Lee xtizh lu nak kwaan nzaa kwent xomod le nu gan yalnaban kwaan tira.

⁶⁹Re nu ne lee lu nak Xaa Nali nze lo Dios nu ngwii nu lo lu.