Jon 6:42-69

⁴²Idi diron, “Eĩ Jesus sã de? Josef naal, in sina tama ado ada keleĩ. Naig fe di, ĩ irok, ‘Aya saa ilun tamal asin’?”

⁴³Jesus solof iron, “Ã aug to nauseir gouf.

⁴⁴Taka yogon oroyam, aya wageun isiya kisi feleya sã, anĩ ere, Dei aya sur fiyan inim, ĩ namen kabĩ yale fen, aya garan irou isiyouf. Age fe di, idikeleya naa bun, aya ĩ alesnẽf.

⁴⁵Profet neid itotoya bun eig ye yenek, ‘Idi ganan Negurem ifelnẽdiyouf.’ Taka ĩ Dei karĩ fiye ken, ĩ bun keleĩ yalef, aya bun isidig.

⁴⁶Taka nem Dei to ilen, Negur bunem isin im dogol. Ĩ yogo dogol Dei ilen.

⁴⁷Aya ã momoi bagai arokeneik, taka ĩ momoi yef, mata faimud ibodkeleya ado.

⁴⁸Aya mata nẽ bret.

⁴⁹Ãgenei tubuĩ tar gerere tuan mana don, anĩ ere, idi gare den.

⁵⁰Anĩ ere, bret enei saa ilun tamal isif, are tamo yãf, to laa fouf.

⁵¹Aya mata ibodõya bret, are saa ilun tamalem isin. Taka ĩ bret enei yoko, ĩ mata faimud ibodõf. Bret enei aya bouwau, are teneub ganan bun, tamo kayau mata dalouf nigin afenẽdiyouf.”

⁵²Age ye di, Juda tamo dogo dogol fatuk bagai luwa diroun, “Naig fe fen, tamo enei yogon bouwa ifanada tãf?”

⁵³Jesus idi irokenẽdin, “Aya ã momoi bagai arokeneik, ã Tamo Naal nẽ bouwa to wãgauf, in naud to wãgauf are, ã namein mata to ibodok.

⁵⁴Taka ĩ neu bouwau yokon, neu naudou yoko, ĩ mata faimud ibodkeleya ado, anĩ aya fau idikeleya naa bun alesnẽf.

⁵⁵Ere nigin, neu bouwau are saaf bagai, neu naudou are naan bagai.

⁵⁶Taka ĩ neu bouwau yokon, neu naudou yoko, ĩ aya nameun ibodok, aya ĩ namen abodok.

⁵⁷Mata ibodõya Dei aya sur fiya di, aya Dei bunem mata abodok gen, taka ĩ aya yõyaf, aya bunem mata ibodõf.

⁵⁸Bret enei saa ilun tamal isin. Ãgenei tubuĩ tar mana don are gare desin, anĩ ere, taka ĩ bret enei yoko, faimud mata ibodkalauf.”

⁵⁹Ĩ od enei Kapenaum taun an, Juda neid uub fõ bun ifelneĩd fen, wogõ yen.

⁶⁰Od enei karĩ de fen, in dõ fiya tar musei diron, “Ifelnadaf eĩ totol bagai. Aim anĩ keleĩ youf?”

⁶¹In dõ fiya tar od enei nigin nauseir de di, Jesus anĩ kelei ken, idi irokenẽdin, “Od enei ã morõ ifeneik de?

⁶²Ba, Tamo Naal ĩ ibodon nẽ kel isel mog ulogouf are, ã ere kisi gouf?

⁶³Awa Uurem mata ifenẽdig, bouwa are gorõ. Od aya wogõ ayein are Uur, od anĩ mata ifenẽdig.

⁶⁴Anĩ ere, ã tunĩ momoiya sã.” Ere nigin, Jesus idi nigin gariya bun kelein, aiyaim ĩ nigin to momoi den, aim ĩ nigin kiwai inouf.

⁶⁵Ĩ od tobol fe iron, “Anĩ nigin, aya od enei arokenein, Dei ĩ nigin wau to yalouf, ĩ aya bun isiya kisi feleya sã.”

⁶⁶Od enei bunem, in dõ fiya tar musei keku den, baban Jesus to dõ difiyen.

⁶⁷Jesus in dõ fiya tar tuwelf to fedin, “Ãg aya utornag ulagauf de?”

⁶⁸Simon Pita solof iron, “Odug, amã ai bun malauf? Õ mata faimud ibodkeleya nẽ od ado.

⁶⁹Amã momoi mau fen, keleĩ, õ anĩ Negur nẽ Fateul.”