Yoohanee 6:42-69

⁴²Misá maaqí qiqau maafá Yísufa Yooseefaana ámaaku máridanoo. Miná ánausa ákausara maasá íridaqa. Náqi fee qídanoo fee naríara innaarúnaindaraasee qídanoo fee. Akooqóoqaraafa máridanoo.

⁴³Yísufa iriséenoo qinau sía ínnee narínni narínni qiníara mandá ufa qiaqa.

⁴⁴Sía faiqí moó fannoo káqi qinée ianánnai ánifaranoo. Qiní qíkoofa rarisámeeqee quqáinna fasiqa ánaaseesa misá kai qiní naundurá ubeekáma qímaqeefaranoo. Misá miqífaqa taikára fáasaana misá uqéereeqee náaru máriranaki quqánnisaanaura.

⁴⁵Óoqai tamummáqara fasiqa maaqí qímasee ákara riqau. Ánutufa aiqámausa naamúaqira ufa qímannimiannoo. Qinée mi-ufána íridaqa maaqí qímasee ínni qímannimidaqa. Aiqámausa qiní qíkoona ufa iriséeqa miná aamúa qíra ufa írimariasa qinée ianánnai ánidaqa.

⁴⁶Sía moó fannoo qiní qíkoona qáfeenoo. Ánutufinaindari qúmufa kai mifá kai qiní qíkoona qáfeenoo.

⁴⁷Qinée ánoona ufa uqanna qímannimidaqa faiqí moó fannoo írirana qinísaa rusímarinafa náaru márirana dóo máreenoo.

⁴⁸Qinée káqi márira feemuara foora márunausa máridaqa.

⁴⁹Óoqai ínni nikeekú nikaakú Mooseena faqa káasau maqa maaqakina nímaru aukuanna innaarúnaindaraa féemu mináuqa manna fée qímariqau. Mi-feemúfa úfaasu márifandinna feemuna námasaida kísaaqasaa moómoo aukuana máriufaqa káqi kúqimariqau.

⁵⁰Máa̱ qinée káqi márira feemuara foora máridee qímarunausa faiqí námasee sía kúqifandinna feemusa máridaqa.

⁵¹Qinée káqi márira féemu innaarúnaindari qumu márunausa máridaqa. Faiqí ánaasee moó fannoo qinée ámianna feemuna námasainafa náaru náaru máriannoo. Qinée nímianna feemufa qiní qimaqí máridanoo. Maa-maqa maaqána afaaqasása máriasa káqi máriaqeera nímidaqa.

⁵²Yísufa miqí qímasoofaqa Yuda máqannaasa narí áfumau narí áfumau áanoo qídaqa qiqau. Náqimásee maa-fasiqáfa narí amaqí maasá qíminaqa naanáuree qídaqinoo fee.

⁵³Yísufa iriséenoo qímanniminoo qinau. Qinée kúqaa ánoona ufa qímannimidaqa. Ínnee qiní faiqí nímaaku qimaqí fidíka sía náifanoo sía káqi márirafa ínniki máriannoo.

⁵⁴Moo fásiqa ánaasee fannoo qiní qimaqí faqa qiní fidíka faqa námasainafa náaru márirana dóo máreenoo, márainara taikára faasaana miná uqéeraanaura.

⁵⁵Qiní qimaqí nárana uqanna máridanoo qiní fidíka nammári uqanna máridanoo.

⁵⁶Faiqí ánaasee moó fannoo qiní qimaqí fidíka néemarifa qiníki máridanoo qinée minakí faqa máridaqa.

⁵⁷Qiní qíkoofa Ánutufa káqi márira óosana faqaafa qiní diqiqoofaqa maaqóo máridaqa minásaaqaraa márirana máraidaqa. Miqí kai ínoo qiní námasainafa qinísaaqaraa márirana máraannoo.

⁵⁸Dóo qinée innaarúnaindaraa náranara foora máridaqa. Sía ínni nísaifaqausa néemaru náranausara foora máridaqa. Misá miná námasee máriiqa aiqáma faiqí faiqi óosanamau fíqa kúqimariqau. Maa-naranná námaseeqa náaru náaru káqi márifaranoo.

⁵⁹Yísufa mi-ufána Kapeeranaumma máqusai ufa suqíra maqaki qímanniminau.

⁶⁰Yísuna faiqi námu akaqáusa mi-ufána iriséeqa qiqau. Óo yáfee maa-ufána amana íriannoo fee. Irisée sía áuqaaqaa ira úfa máridanoo.

⁶¹Misá miqí qímasee nóori runúsee randóofanoo Yísufa narí kai iriséenoo qímanniminoo qinau. Ínnee qiní ámiqira afeeka ufara rufíasee qiní minnísararee qídee.

⁶²Qinée kafáa uqéeree qúmuafannannai óoru fúanaqa ínnee miná qáfamasee náqi fee ífaree. Mi-karí qiní ufara kúqaa ánoonee qímasee firaaqóo rufíeefaranoo.

⁶³Amaqíara qúnnana amaqí fífau ainaina máridanoo sía miná naaqée qíqa maraquna fannoo kai ánoona máridanoo mifá káqi márirana nímidanoo. Qinée qeeqá dóokinaa ufa qímannimimarunafa mifá maraquna máridanoo káqi márirana ánoona máridanoo.

⁶⁴Dóo qinée akooqóo kooroomásee qímannimunaqa ínnee akaqáusa síamma írimariafanoo. Yísufa narí faiqi námu óosana fáasai írinau. Misáki akaqáusa miná ufa sía írusa fáasai Yísufa níndafanau. Misáki moodáa fannoo ueeqáaninnana fáasai qáfanau.

⁶⁵Yísufa minára maa-ufána átiki kafáa qímanniminau. Qinée minára fáasai qúnnana sía amana moó fannoo narí kai qinée ianánnai ániannoo. Qiní qíkoofa dadaaqínanoo kai qinée ianánnai ániannoo.

⁶⁶Miqí qímasoofaqa Yísuna faiqi námu moómoo Yísuna minnísee sía kafáa miná fáqa fírara qiqau.

⁶⁷Yísufa míquna níndafamásee quandáfi narí faiqi námu (12) qísaukuqara taikásee qíkunnoo óoqu qaara marasée faiqi námu maaqí qímasee qímanniminoo qinau. Ínnee faqa misá naanna reefáree qiní minníqiseeqa fifáree.

⁶⁸Simoona moo áuqu Peetooroofa miná iriséenoo Yísuna qímaminoo qinau. Óo karaambáiqa aní minnísee yánasaa fee atooqáanauree. Náaru márirana nímira úfa anée kai márananuananoo.

⁶⁹Dóo maqee maasá aníara kúqaa ánoonee qídaqa aníara Ánutufinaindari náaquqarafa máriifoo qídaqa.