Xoão 6:42-69

⁴²Ininiã ninoa: —Iua kiki Xesosi Xosee ãkiri. Aaõkitapekari iri, inoro pakini. Kinirepa “Teoso tixine ĩkarirano” itxape iua? —itxana, itsoatinina.

⁴³Ininiã Xesosi txana: —Kona himaxirauatape. Kona hĩtsoatape.

⁴⁴Niri nipaniãtakiri akiritakitinanira posotari inini notamoni. Niri makiritakiniti kona posota inini notamoni. Itixi xipokini õtisaaki nõkitikana notamoni apoãkani iuaĩkana auinina ĩkapani.

⁴⁵Kitxakapirĩka Teoso sãkire sãpiretakani iõkatsopatari ia Teoso sãkire: Teosorako oerekariko ikinipoko kãkiti. Niri sãkire kĩpitakani, niri oereẽkini, apoka notamoni.

⁴⁶Kona aua kãkiti niri atamatakari. Nota Teoso tixine ĩkari, notanokara atamatapekari niri.

⁴⁷—Nota sãkire auiãkari, iuara auapininiika Teosokata. Ia nisãkire atão.

⁴⁸Nota iua komiri nitxaua kãkiti auapininiika inĩkitakakarino.

⁴⁹Hinirimane kitxakapirĩkarini nikari komiri iaxiti katxaãkari ãparaã makipakaniãtaã. Iaxiti katxaãkari inikanimana, txanima ipĩpena.

⁵⁰Kãkiti nikiniãri atão komiri Teoso tixine ĩkari kona ipina.

⁵¹Iua komiri, Teoso tixine ĩkari nitxaua nota. Kãkiti auapininiika inĩkitakakarino nota. Ia komiri niãkari auapininiika itxako. Ia komiri nisikakiti ia niĩtokara. Niĩto nisika kãkiti ikini itixiti auakani auapininiika inini tĩkane —itxa Xesosi.

⁵²Ikara atoko ininiã ninoa Xoteoakori taparakienatakakaua: —Natokopa itxa ia kiki iĩto isikiniua ate, anikiniri ĩkapani? —itxana.

⁵³Ininiã Xesosi: —Atãoenepitikara ikara atoko nitxai hĩte. Hĩtari iaxitikiri ĩto himanikakanisaaki, iarẽka himiãtakanisaaki, kona hĩxinire auapani ãtipirika.

⁵⁴Iua niĩto niãkari, niarẽka iãtakari, auapikako Teosokata. Xipokatxi õtisaaki nõkitikariko iua iuaĩkana auini ĩkapani.

⁵⁵Niĩto atão komiri itxaua. Niarẽka atão iãriã itxaua.

⁵⁶Niĩto niãkari, niarẽka iãtakari, aua nãkixinireẽ. Nota aua iua ãkixinireẽ.

⁵⁷Niri, ãtipirika auapika inakari, iokanatano nota ĩkorapokoriti. Iuara sikano nota ãtipirika nauini ĩkapani. Iua atokotxikana nota sikari nota niãkari ãtipirika auini ĩkapani.

⁵⁸Nota iua komiri Teoso tixine ĩkari nitxaua. Komiri hĩkiomaneakorini nikakiti ãtião. Iua komiri nikakari ipĩpe. Nota siãkiti komiriti niãkani, nisãkire auiãkani auapininiika Teosokata itxanako.

⁵⁹Ikara atoko itxa Xesosi sãkire aiko ãki Xoteo apotiitiniãtaãua Kapanaoõ sitatxiti oerekarauatakasaaki.

⁶⁰Xesosikata sikani isãkire potxitakani, ikara isãkire ikenakotakasaakina, ipimarauatakakana: —Pamimari ikara isãkire. Kipa imarotari ikara atoko inakari sãkiretxiti? —itxana.

⁶¹Masãpiretakotika Xesosi imarotari ikara atoko itsoatinina. Ininiã iua: —Hinirekatari hĩtakanapinino nota ia nisãkire xika?

⁶²Kiãtokopa hĩxinikakiti hĩtikiniãno nota hĩtari iaxitikirino kanĩkini mitxi nauiniãtaã? Atxiĩti iuasaaki hãuikatari nisãkire?

⁶³Iua Erekari Matamatakotinokara sikari kãkiti auini tĩkane. Kãkiti ĩto tapara !auari. Ikara sãkiretxi hĩtemoni nisãpiretakiti, iua Erekari Matamatakoti sãkiretxikana. Nisãkire auikiko auãkitakari kãkiti, ãtipirika Teosokata auini ĩkapani.

⁶⁴Txamari auapitika hĩte sauaki nisãkire mauiãkani —itxa Xesosi. Merepitipanika Xesosi imarotapekari iua sãkire mauiãkani tĩkane. Xesosi imarotari apaka imĩkapiritakiri tĩkane.

⁶⁵—Niri Teoso masikaposotiiretakiniti kona iposota apokini notamoni —itxa Xesosi.

⁶⁶Ikara isãkire xika itori Xesosikata sikani takanapari iua. Kona inirekaikarina iuakata isinina.

⁶⁷Ininiã Xesosi pimaãna imoianariakori tosi: —Hĩtepekana, hĩte apaka nirekatari hĩtakanapinino? —itxa Xesosi.

⁶⁸Ininiã Simão Petro apakapapiretari: —Apiananiri, kirimonipa asa atxiĩti? Pitenanira sãpiretari kãkiti auapininiika inini.

⁶⁹Ate imarotari Teoso mereẽkiti pininiua. Teoso ãkiri, auapika inakari ãkiri pitxaua pite —Petro txari Xesosi.