Juan 6:42-69

⁴²Daɨdíaɨoɨ: —¿Bímɨe José jitó Jesúñede? Ie moona onódɨcaɨ ie ei dɨga. ¿Nɨe izói “Monámona ana bitɨ́mɨedɨcue” daɨírede? —daɨdíaɨoɨ.

⁴³Jira Jesús íaɨoɨna daɨde: —Gugúriñeno.

⁴⁴Buna cuemo bínide, cue Moo, cue orédɨmɨe naɨ átɨñenia. Ie mei íiraɨruido afémɨena cáadɨmɨena itátaitɨcue.

⁴⁵Uai lloraɨnɨ cuegánicuaɨ llote: “Nana afémacɨ Juzíñamui llófuegamacɨza íitiaɨoɨ.” Daɨí nana Moomo cacádɨno, afémɨemona fɨbítagamacɨ cuemo bitíaɨoɨ.

⁴⁶Bie izói cue daɨna dáarie Moo Juzíñamuina cɨona daɨíacañede. Dama Juzíñamuimona bitɨ́mɨe Moona cɨona.

⁴⁷Uáfuena ómoɨna dáɨitɨcue: cuemo ɨ́ɨnotɨmɨemo zíiñona cáaillɨnona ite.

⁴⁸Cue cáatate güílledɨcue.

⁴⁹Omoɨ jáiairagɨma zaféredɨzicɨmo manana güitíaɨoɨ, mei íadɨ nana jae tɨ́idɨmacɨ.

⁵⁰Iadɨ cue daɨna monámona ana bite güílledɨcue güitɨno tɨ́iñeitiaɨoɨ.

⁵¹Cue dama afe bie monámona ana bite cáatate güílledɨcue. Bie güille güitɨ́mɨe zíiñona iite. Bie cue ille güille dama cue ɨ́eizɨ. Afena íitɨcue nana énɨe imacɨ cáallena, —daɨde.

⁵²Iemona judíuaɨ danɨ íaɨoɨri júfidotiaɨoɨ. Daɨdíaɨoɨ: —¿Nɨe izói bímɨe dama ie ɨ́eizɨna caɨna écaite? —daɨdíaɨoɨ.

⁵³Jesús íaɨoɨna daɨde: —Uáfuena ómoɨna dáɨitɨcue: Nanoide Ɨima Jitódɨcueza; cue ɨ́eizɨ omoɨ rɨ́ñeniadɨ, daje izói cue dɨe omoɨ jíroñeniadɨ naɨ omoɨ cáaillɨnona iñede, dájena cuemo jaɨnáiñena jira.

⁵⁴Cue ɨ́eizɨ rɨtɨ́mɨemo, daje izói cue dɨe jiródɨmɨemo comecɨ zíiñona cáaillɨnona ite; ie mei íiraɨruido afémɨena cáadɨmɨena itátaitɨcue.

⁵⁵Cue abɨ uafue güille. Cue dɨe uafue jiróllɨi.

⁵⁶Cue ɨ́eizɨ rɨtɨ́mɨe, jɨáɨ cue dɨe jiródɨmɨe ja cuemo dájena ite. Daje izói afémɨemo dájena itɨcue.

⁵⁷Cue caade Moo orécacue, jira afémɨedo cáadɨcue; daje izói cue rɨ́itɨmɨe cuedo cáaite.

⁵⁸Monámona ana bite güílleri úritɨcue. Bie güille omoɨ jaiáidɨgɨma güiga maná izóiñede. Nana afémacɨ tɨ́idɨmacɨ; mei íadɨ bie güille güitɨ́mɨe zíiñona iite, —daɨde.

⁵⁹Jesús Capernaúmo ite Juzíñamui uai llófueriracomo nana bífuiaɨ íaɨoɨmo llófuete.

⁶⁰Bie llófuiana cacáillamona, aillo Jesudo jáidɨmacɨ daɨdíaɨoɨ: —Bie afémɨe daɨna afe jeire ollɨ́uai ɨere féirede. ¿Bu áfena jeire órena? —daɨdíaɨoɨ.

⁶¹Iemona Jesús íaɨoɨ gugúrillana onóbicaide. Onóillano jɨcánote: —¿Aféfuiaɨ ómoɨna ɨáɨruificaitade?

⁶²Ie mei Nanoide Ɨima Jitó nano ie illánomo caifo ie jáillana omoɨ cɨóadɨ, ¿nɨɨe izói íitɨomoɨ?

⁶³Caɨ joreño caɨ cáatate. Ɨeizɨ cáatañede. Omoɨna cue daɨnáuaillaɨ joreño izoide uafue uaillaɨ. Cáataitiaɨoɨ.

⁶⁴Mei íadɨ ómoɨmona dámɨerie naɨ ɨ́ɨnoñediaɨoɨ, —daɨde. Jesús afe ɨ́ɨnoñedɨmacɨ nanómona onode. Afe llezica íena éoidɨmacɨmo fécaitɨmɨena onode.

⁶⁵Ie mei daɨde: —Ɨemona ómoɨna dáɨitɨcue, Moo átɨñenia buna cuedo bínide, —daɨde.

⁶⁶Aféruimona aillo Jesudo jáidɨno íena fɨénocaidiaɨoɨ. Ja íedo macáñediaɨoɨ.

⁶⁷Ie jira ie doce dɨga llófuegamacɨmo jɨcánote: —¿Omoɨ daje izói jáiacadɨomoɨ? —daɨde.

⁶⁸Mei íadɨ Simón Pedro uai ote: —Ocuíraɨma, ¿bumo jáiredɨcaɨ? Zíiñona cáatate uaillaɨ omo ite.

⁶⁹Ja caɨ ɨ́ɨnotɨcaɨza. Onódɨcaɨ caade Juzíñamui Jitódɨoza. Crístodɨo, —daɨde.