João 11:19-56

¹⁹Toenzepa eaundudopyry itynrumo. Toenzepa ipemugudo idâly, âkelo kurâ domodo warâ etubanâzemo, iwirymo iguehobyry tiuntuduo.

²⁰Jesus tâtyam saindyly egary tindatuo myani Marta iose idâly, Maria olâ âtâdâlâ.

²¹Aituo Marta Jesusram aguely: — Tarâlâ âmâ-ro watay, wi niguewâpyra tâise keankâ!

²²Igueypyem lelâlâ wâne, tutuze olâ urâ, Deusram mâenkaduo amyguehobyry adyese awyly — kely.

²³Aituo Jesus eyam aguely: — Igueypyem lelâ idâzesedyly nitaymba ise âwiry. Kurâem itonze lelâ — kely.

²⁴— Xypyry etay kurâem itondyly, tutuze urâ — kely Marta.

²⁵Aituo Jesus aguely: — Iguewâtyby modo kurâem ietoni urâ, aunloenlâ typyguenryem itomoem. Tâwâlâ ise yeinwânni modo iguely.

²⁶Yagâpa nitaymbamo ise yeinwânni modo. Deusram ise, tyigueduo, idâlymo aunloenlâ eagâ tâitomoem, nigueontaymbamo ise. Tâinwânse âmâ? — kely Jesus.

²⁷— Idânârâ amyguehobyry modo tâinwânse urâ. Deus, “Xirâ onro anaxi igonose urâ” kehobyrylâ mawyly tâinwânse urâ. Deus imery lelâlâ mawyly tâinwânse urâ warâ — kely Marta.

²⁸Agueypyem Marta idâly tywidyam agueze. Tydawere aguely, ânguy nidapyra itoem. — Idy, Jesus naintai. Âgâsedyly-ro warâ — kely.

²⁹Awârâ tindatuo myani Maria inepa kehoem saudyly. Jesus agâ oxioze idâly.

³⁰Etymoam kuru Jesus naimpyralâ, Marta agâ xina oxiodobyrydâlâ.

³¹Târâ âtâ oday Maria etubanâze idâypy modope myani. Mâkâ saudyly, tâmaegoze kehoem egasely tientuo, tâgasezemo lâpylâ myani. Aituo nhapygue idâlymo, — Âguedy etadâdobyryam keanra idâly ohogüenze — tâkewâduomo.

³²Jesus eydâ atoam saintybyem, Maria âzeguhoam idyly enado. Aitybyem eyam aguely: — Tarâlâ âmâ-ro watay, wi niguewâpyra tâise keankâ! — kely.

³³Aituo Jesus, Maria eogunru nhedyly; eagonro modo eogunru nhedyly lâpylâ warâ. Aituo Jesus toenzepa itywandyly, tuoday âsewânily warâ.

³⁴Aituo nhapâiguelymo: — Âdykâka keankâ Lázaro eguepybyry mâentadâdylymo? — kely. — Egârâ, Pymâ — kelymo.

³⁵Jesus eogumadyly.

³⁶Aituo tonlo modo aguely: — Lázaro tywyneze lelâlâ galâ awâkâ Jesus! — kelymo.

³⁷Tâlâ olâ wakenri: — Epy kua niedâ awâkâ. Ton-honreba olâ keankâ Lázaro niguepa itoem aiese — kerim.

³⁸Jesus idâly Lázaro eguepybyry etadâdobyryam, tâtagueim tuhugue tânahugueinram. Toenzepa kehoem itywandyly.

³⁹Aituo aguely: — Awârâ tuhu etywâdaungâ! — kely. Aituo âguedy eaundupyry Marta aguely Jesusram: — Alâ nidâ! Tywângue awâkâ! Etadâdobyry quatro iguandyly idyly iwerâ — kely.

⁴⁰Aituo Jesus aguely: — “Yeinwântâ lelâlâ âmâ-ro watay, Deus eon-honru ese âmâ” uguehobyry mâenanâguebaka âmâ? — kely.

⁴¹Aituo mârâ tuhu imâsedo nhetylymo. Jesus kayam MYK idyly, aguely: — Pabai, tuomare urâ, âyam auguely tydase mawylygue.

⁴²Ydatâlâ mawyly tutuze urâ, tâwâlâ lelâlâ wâne yangahu oday kulâ unâgu. Ago olâ iwerâ auguely, merâ kurâ domodo auguely indatoem, âmâlâ ugononi awyly nheinwântomoem warâ — kely Jesus.

⁴³Arâ adâkebygueduo adaenkely: — Lázaro, igasegâ kuohoram! — kely.

⁴⁴Aituo Lázaro kurâem itondyly, egasely. Ituwyn-hobyry aralâ, ixinary, ihuru, ewâry, emary alelâ. Panugue emyan-huymbyem awyly. Aituo Jesus aguely: — Awârâ ituwyn-hobyry etywâdaungâ, adakobâdoem — kely.

⁴⁵Jesus Lázaro kurâem nhetonduo, judeu domodo Maria etubanâze idâwâtyby modo ewy nheinwândyly lâpylâ.

⁴⁶Tâlâ olâ myakâwâm fariseu domodoram aitobyry egatuze idâim.

⁴⁷Aituo fariseu domodo, kurâdo eynynâ Deus agâ aguewâni modo iwymârydo, judeu domodo iwymârydo warâ âtâdyguylymo. Âjigue aguelymo: — Âdakiendylyka awâkâ Jesus? Adyesenry modo kehoem awâkâ anhekyly. Kurâ domodo aidyly tohoguezemo-ro warâ.

⁴⁸Alâ aguienehonzezedyly-ro watay, idânârâ kurâ domodo awâkâ einwânsemo lâpylâ. Aituo ise kywymâry Roma donro modo kagâ iewiâpadaynlymo. Kagâ âseguebyze âesemo, kainzemo, Deus ety sakalaguezemo warâ — kelymo.

⁴⁹Ilâem Caifás myakâwâm kurâdo eynynâ Deus agâ aguewâni modo iwymâry kuru. Aituo myani aguely: — Âdy mâuntuwâbyra âmaemo!

⁵⁰Jesus kydyâen-honre, kydadainhopa kitoem! Tokalâ iguelylâ ise koendonro, idânârâ kyiguepa kitoem — kely.

⁵¹Âdatâkely awyly nutuwâbyra myani mâkâ. Kurâdo eynynâ Deus agâ aguewâni modo iwymâry lâwâne mâkâ ilâem, Jesus izetonro keba olâ myakâwâm. Alâ wâne, Deus nhutuen-honly, Jesus, judeu domodoem iguely awyly. Tyangahu odano kulâ mâkeba myani mâkâ agueho, Deus nhutuen-hoymbylâ.

⁵²Kurâ judeu domodoem kulelâ inkâba Jesus iguely, idânârâ kurâdo onro anano modoem. Mâkâ iguely, idânârâ tâinwânni modo tâinkonro lelâba, mâkâ nheinwântomoem, tokaleom ara lelâ itoem.

⁵³Ilâ umelâ myani judeu domodo iwymârydo Jesus xyâhoem aguelymo.

⁵⁴Awylygue Jesus kurâdo tâentoem kehoem nadakobâbyra awyly. Judeiadâpa âxiguely. Âtâ anary Efraim kehoam idâly; âji âdy peba ato iwaguepa myani mârâ âji. Xina agâlâ akâwâm târâ awyly.

⁵⁵Iwaguepa akâwâm Páscoa etyguedo. Toenzepa poji anaym tâtyuneim modo Jerusalémram idâly âty iraynâ. Kâzewenry ara aguidyly, kydokoguely wao warâ kydâzetyguedoem. Tâzetyguedoem ohonze myani idâlymo.

⁵⁶Fariseu domodo, kurâdo eynynâ Deus agâ aguewâni modo iwymârydo warâ, “Jesus âdykâ awyly mâuntulymo-ro watay, xina xurutaungâ, xina nhawânehon-hoem” kehomobyry wâgâ, myani ohonze idâypy modo Jesus nhuinlymo. Âjigue adapâiguelymo: — Âdara inanajimo? Âese wânkâ mâkâ âtyam? — kelymo.