Yohana 11:19-56

¹⁹Wayahudi walozize nawabula kwa Matha na Maliyamu wawahongeze kwa kubanika mlukolo ywawo.

²⁰Matha eze eve kugamba Yesu eza, niyo aita akumsingila, mna Maliyamu kasigala kukaya.

²¹Matha amgamba Yesu, “Zumbe, hegu wendile wihano, mlukolo ywangu habanike!

²²Mna simanya kugamba hata vino haluse chochose noumlombeze Chohile nakwinke.”

²³Yesu amgamba, “Mlukolo ywako nauyuke.”

²⁴Matha niyo amhitula, “Simanya,” “kugamba nauyuke mwe zuwa dya udumo.”

²⁵Yesu amgamba, “Miye nuyo uyuso na ujima. Akunizumila miye nekale, hata hegu kabanika,

²⁶naho chila akwikala na kunizumila habanike mazuwa yose, Togola wayazumila ayo?”

²⁷Matha amgamba, “Heye Zumbe!” Ahitula “Nazumila kugamba weye nuyo Kulisito, Mwana ywa Chohile, yudya akwiza mwe isi.”

²⁸Matha eze alonge ayo, niyo aita akumwitanga lumbudye Maliyamu kwa chinyele, na kumgamba, “Mhinyi ehano,” “naho akwitanga.”

²⁹Maliyamu eze eve ivyo, niyo asunguza kwinuka ambasa Yesu.

³⁰Yesu nahanati kwingila mwe kaya, mna nachei ahadya hantu Matha ambwile.

³¹Wayahudi nawemndani hamwenga na Maliyamu wakamhongeza, weze wamwone kenuka akumpukila kuse. Wamtimila wakagamba akwila kwe mbila.

³²Maliyamu eze abule hantu hadya Yesu endile, eze amwone, amgwela heviga. Amgamba, “Zumbe,” “hegu wandile wihano, mlukolo ywangu habanike!”

³³Yesu eze amwone aila, naho eze awawone wadya Wayahudi wendile hamwenga naye nawo waila, niyo engilwa ni mbazi na chinyulu, niyo engilwa ni tumbwaziko mo moyo.

³⁴Niyo awauza. “Mumhamba hahi?” Wamgamba. “Soo uwone, Zumbe,”

³⁵Yesu niyo aila.

³⁶Wayahudi wagamba. “Kaulani ivyo amungile!”

³⁷Mna wantu watuhu wagamba, “Togola yuno amfumbule ameso yudya tuntu, vino hakudaha Kumtenda Lazalo asekubanika?”

³⁸Ivyo Yesu engilwa ni tumbwaziko vituhu mo moyo, abula kwe mbila, mbila yenye neimwe bome naho naigubikwa na yuwe mwe nchili.

³⁹Yesu agamba. “Usani idiyuwe!” Matha, lumbudye dya yudya abanike, amgamba, “Zumbe, akonga kulavya mpofa, kekala mwe mbila mazuwa mane!”

⁴⁰Yesu amgamba, “Togola sikugambile kugamba ukazumila nauwone ukulu wa Chohile?”

⁴¹Niyo wadyusa diya idiyuwe. Yesu niyo asinya kulanga kwembingu na kugamba, “Nakutogola weye, Tate, kwaviya weye waniva.

⁴²Simanya kugamba waniva mazuwa yose, mna silonga ivyo kwaviya wantu wano we hano, chani wazumile kugamba weye ni weye unisigile.”

⁴³Eze alonge ivyo, niyo etanga kwa izwi kulu, “Lazalo, fosa kuse!”

⁴⁴Niyo afosa kuse, kuno katalizwa sanda mwe viga na mwe mikono, naho uso wakwe ugubikwa na kasuche. Yesu awagamba, “Mfunguleni,” “Mumlekeni aite.”

⁴⁵Ivyo Wayahudi walozize wendile wamtalamkile Maliyamu weze wawone mbuli iyo adamanye Yesu, niyo wamzumila.

⁴⁶Mna wamwenga wawo waita kwa Mafalisayo na kuwagambila mbuli Yesu adamanye.

⁴⁷Kwa ivyo Mlavyantambiko mkulu na Mafalisayo waika chitala na kugamba, “Chitende vivihi? Mntu yuno adamanya vilagiso vilozese!

⁴⁸Chinamleka du ajendeleze, wantu wose nawamzumile, naho vilongozi wa Walumi nawo naweze kuibalanga inyumba yetu ya Chohile na wantu wetu wose!”

⁴⁹Aho yumwenga ywawo, akwitangwa Kayafa, endaga Mkulu ywa walavyantambiko mo mhilimo uwo, awagamba, “Nyuwe hammanyize chintu!

⁵⁰Hammanyize kugamba ni vyedi kwenyu mntu yumwenga abanike kwa chausa cha wantu, ukuleka wantu we isi njima wakomwe?”

⁵¹Uyo halongile ivyo kwaviya akunga mwenye, mna kwaviya endile Mkulu wa walavyantambiko mo mhilimo uwo, ivyo nakabunkula kugamba Yesu nabanike kwachausa cha hewemzumile Chohile,

⁵²naho ukubanika kwakwe siyo kwa chausa cha wantu we isi ino du, mna seiviya kwa chausa cha wana wa Chohile wazagale chani waikwe mwe umwe.

⁵³Kulaila zuwa idyo vilongozi wa Chiyahudi walonda sila ya kumkoma Yesu.

⁵⁴Yesu niyo hajendile vituhu mo lumpe mwe isi ya Yudeya, mna kahalawa aho na kwita hantu haguhi na jangwa, mwe mzi ukwitangwa Efulaimu, ekala uko hamwenga na wanampina wakwe.

⁵⁵Ngasu ye Pasaka ya Wayahudi naihaguhi, ivyo wantu walozize kulaila mwe kaya waita Yelusalemu chani wakelenguse Pasaka hainati.

⁵⁶Nawakamlonda Yesu, weze wadugane hamwenga mwe nyumba nkulu ya Chohile, wauzana, “Mwafanyanya vihi? Heze mwe ingasu?”