Jon 11:19-56

¹⁹ma iri Juwis badeh, solo-an labai ame hawe Mata uru Mariya ta bahabah uru ta imek ta nadu tine uru.

²⁰Mata ndranuhun, idah kameh Jises eme, iy eme edek ili ndruni iy udu ndra ndrukulu san ranah. Mariya le ari udu asiu turu udu.

²¹Mata eme asehek i ta Jises, “Laban, buku ou ado aliy nane, nadu tine winiyan bamak bwe.

²²Arile, jo tanan, na idah kameh Kindrei edeu saba lakou ewek tam buku ou ndremenya iy ta aliy.”

²³Ano Jises asehek sahou i tan i buku doh, “Nadu tinem kameh amak eme loken ja.”

²⁴Mata anya, “Jo tanan, idah kameh iy amak ja na len hamon.”

²⁵Jises tiye i tan, “Amak udu bolo lek eme awas ja badeh, jo le ari. Iy are lau atehei budon tan mara-ei eme tek, iy imek arile kohan handru kameh udu mwasin.

²⁶Ma are lau iy bamak bwe le, iy atehei budon tan mara-ei eme tek, iy winiyan bamak bwe. Ya ou atehei budon tam in ta aliy?”

²⁷Iy tiye i tan, “Ehe Laban, jo atehei budon tek in tam, tasah ou Mesaya, ma ou Nadu Kindrei. Ou le mene, Kindrei suni ou ame andri bolo kon munyak.”

²⁸Iy asehek sahou ano le badeh, iy edek eme hamon eme luhi nadu tinen Mariya eme hawen ma iy asehek i tan, “Ndramak ta leheya ndrame, iy anya ou ala hawen.”

²⁹Mariya anuhun le badeh, iy suri iy ere loken suwi suwi, ma iy edek ili hawe Jises.

³⁰Jises bame basos bolo kon bwe le, iy udu ndra san ranah nane Mata asahan hawen.

³¹Oro Juwis rayah ado hawe Mariya ado asiu ta tikisiy hawen. Eme oro anyolom Mariya suri iy suwi suwi ere loken, ma iy edek iu ili manan. Ano oro an hamon tan ala manan, tasah oro abudon anya, “Kora-on iy kili keden kili mada lek.”

³²Mariya edek ili isos ndrukulu san nane Jises udu aliy, ma iy anyolom iy, iy eme taku ili bada katin ma iy asehek sahou i ta Jises, “Laban, i buku ou ado aliy badeh, nadu tine winiyan bamak bwe.”

³³Jises anyolom iy eden, ma iri Juwis nane adek an hamon tan aden ale, iy anyolom iri aden eme bwidi ndrinen eden tinan labai ta tikisiy.

³⁴Iy eme lelen iri, “Aha ndratehei iy udu heh?” Iri anya, “Laban, ou ame anyolom.”

³⁵Eme ma Jises eden.

³⁶Iri Juwis asehek, “Aha kanyolom iy eden. Iy aso-ok Lasarus tinan labai!”

³⁷Arile iri rayah asehek anya, “Iy le mene adeh, sihi mada ndramak ari bwe asak. I buku sah iy winiyan basebenei iy ndramak kede-eh ja bwe?”

³⁸Jises tikisiy tinan labai, iy eme edek ili mirihik ta mada lek. Lek doh udu munu bek iri turuki madan na bek tinan.

³⁹Jises tiye i tiri, “Aha katundruwi bek udu mada lek kede-eh ki-iu kili len.” Mata nadu tine ndramak nane imek asehek sahou i buku doh, “Laban, manahun ndrala, iy udu bolo lek badeh len hahuw ai.”

⁴⁰Ano Jises asehek sahou i tan i buku doh, “Jo nane ndrasehek tam eh, i buku ou atehei budon tam mara-ei eme tek eh, idah kameh ou winiyan anyolom boto-on ta Kindrei.”

⁴¹Iri ame tundruwi bek udu mada lek nane ili len. Ano Jises anyolom ili kandrah, ma iy asehek sahou, “Tama jo edeu wurah i tam ta ou anuhun jo.

⁴²Jo ndratanan len marakon ou anuhun jo, arile jo asehek sahou dah ta lau badih ma mwan ales ado hawek kada-ah, ta iri kameh katehei budon tiri kewek tam, tasah ou suni jo eme.”

⁴³Iy asehek ma iy aloh boto-on labai, “Lasarus ou ame manan.”

⁴⁴Ndramak imek nane dah edek eme manan, minen ma katin badeh, iri su-iy na kari kolau. Ma kolau ra-ei ja iri su-i madan na aliy. Jises eme asehek i tiri, “Aha kala katolowei kolau ta lek udu badan kodo-oh ki-iu, ma iy kedek.”

⁴⁵Iri Juwis solo-an an hamon ame ta atou Mariya, ma iri anyolom saba lakou Jises amekes, ma iri atehei budon tiri marakon i tan.

⁴⁶Arile iri rayah ala hamon asehek i tiri Parasi ta saba lakou nane Jises amekes.

⁴⁷Eme iri lau tinan tiri pris ma iri Parasi luhi iri kansol ame atukum ma asehek i tiri. Iri ndremenya iri i buku doh, “Taha kamekes kili buku sah handru? Iy ndramak kede-eh amekes iri lahou tinan ma kalem solo-an labai.

⁴⁸I buku taha bamekes ari lakou bwe, idah kameh iri lau marakon atehei budon tiri, ma iri an hamon tan. Ano, iri lau ta bahun badu Rom ame kameh tohowei asiu tinan ta Kindrei tataha iu, ma andrei iri lau tataha marakon au.”

⁴⁹Ano ndramak tiri ari nyaran Kayapas, iy in bwena tiri pris na le jaha doh. Iy asehek bohon a tinan i loken, “Aha kede-eh tana aha se lakou bwe!

⁵⁰Aha babudon se bwai? Mwasin ta ndramak ari le, iy kimek ta saluwe lau marakon. Ndra-in ta lau marakon amak laleyah.”

⁵¹Iy basehek sahou na budon tan amwenen bwe, iy asahan kabin tiri pris na jaha nane doh, iy eme amekes sahou i buku propet ta adi Jises kimek ta saluwe lau marakon badu Juwis;

⁵²ma iy imek kameh tiri Juwis le bwe, iy imek ta atukum nadu Kindrei iri mene ndratalan, kame hamon ka le se.

⁵³Ma udu ndra bada len doh ili badeh, iri amekes sa-oh ta adai iy.

⁵⁴Eme ma Jises badek bala bame hawe iri Juwis ja bwai. Iy ruwani kon nane iy udu aliy, iy edek iu ili kon ari doh mirihik ta kon lomale an, ili loboho kon ari iri aloh Iparayim, ma iy manyah udu hawe oro lau tan ado kon doh udu gwek.

⁵⁵Len ndrabun iri aloh Pasoba ma nyamon tinan ta jabi ramen yis bolon bwe tiri Juwis anya kasahan, eme iri lau solo-an badu loboho doh adek au ala le loken Jerusalem, ta sikine ndraka-an udu tiri iu, ano iri baramekes Pasoba.

⁵⁶Iri badeh, asilah Jises, iri ales ado bolo kowah ta asiu tinan ta Kindrei, iri ndremenya iri ari, ari i buku doh, “Saba budon taha handru? Sebwe iy winiyan bame ta nyamon tinan dah bwe nadeh?”