يَيَ 11:19-56

¹⁹يُوِقِ فبٍفبٍ نُ بَرَ قَ مَرَتَ نُن مَرِيَمَ شْنيِ، عٍ مَاشّمّ حْنقٍ كُنقَ بَدٍ.

²⁰مَرَتَ تٌ عِسَ قَقٍ مّ، عَ نَشَ سَ عَ رَلَن، كْنْ مَرِيَمَ تَن دْشْشِ نَشَ لُ بَنشِ.

²¹مَرَتَ نَشَ عَ قَلَ عِسَ بّ، «مَرِفِ، شَ عِ نُ نَ بٍ نُ، ﭑ مَاشّمّ مُ قَشَمَ نُ.

²²كْنْ هَلِ يَكْسِ، ﭑ عَ كٌلٌن عَ عِ نَ قٍقٍ مَشْرِن عَلَ مَ، عَ عَ رَبَمَ نّ عِ بّ.»

²³عِسَ نَشَ عَ قَلَ عَ بّ، «عِ شُنيَ كٍلِمَ نّ قَشّ مَ.»

²⁴مَرَتَ نَشَ عَ يَابِ، «ﭑ عَ كٌلٌن تَن، عَ كٍلِمَ نّ قَشّ مَ دُنِحَ رَحْنيِ، قَشَمِشِيٍ كٍلِمَ تّمُي نَشّ.»

²⁵عِسَ نَشَ عَ مَسٍن عَ بّ، «ﭑ تَن نَن نَ مَرَكٍلِ نُن كِسِ رَ. نَشَن نَ دَنشَنِيَ ﭑ مَ، عَ كِسِمَ نّ، هَلِ عَ قَشَ.

²⁶نَشَن يٌ بَلٌشِ، عَ دَنشَنِيَشِ ﭑ مَ، نَ كَنيِ مُ لْيمَ عَبَدَن. عِ لَشِ نَ رَ؟»

²⁷عَ نَشَ عَ يَابِ، «عِيٌ، مَرِفِ! ﭑ لَشِ عَ رَ عَ عِ تَن نَن نَ عَلَ شَ مِشِ سُفَندِشِ رَ، عَلَ شَ دِ، نَشَن لَن عَ شَ قَ دُنِحَ مَ.»

²⁸مَرَتَ نَ قَلَ شَنبِ، عَ نَشَ سِفَ عَ شُنيَ مَرِيَمَ قْشْ رَ، عَ عَ قَلَ عَ بّ عٍ دٌرٌ مَ، «كَرَ مْشْ بَرَ قَ، عَ نَ عِ شِلِقٍ.»

²⁹مَرِيَمَ تٌ عَ مّ، عَ نَشَ كٍلِ كٍرٍن نَ، عَ سِفَ عِسَ رَلَندٍ.

³⁰نَ تّمُي، عِسَ مُ نُ سٌشِ تَا كُي. مَرَتَ عَ لِ دّننَشّ، عَ نُ نَ مّننِ نّ سِندٍن.

³¹يُوِقِ نَشٍيٍ قَشِ كُنقَ بَدٍ، نَشٍيٍ نُ نَ مَرِيَمَ قّ مَ بَنشِ كُي، عٍ تٌ عَ تٌ كٍلِ رَ مَقُرٍن نَ، عٍ نَشَ بِرَ عَ قْشْ رَ تَندٍ. عٍ حْشْ عَ مَ عَ عَ نَ سِفَقٍ فَبُرِ يِرٍ نّ، عَ شَ سَ وَ نَا.

³²مَرِيَمَ تٌ عِسَ يِرٍ لِ، عَ قّقّ عَ تٌ، عَ نَشَ سُيِدِ عَ بّ، عَ عَ قَلَ، «مَرِفِ، شَ عِ نُ نَ بٍ نُ، ﭑ مَاشّمّ مُ قَشَمَ نُ!»

³³عِسَ تٌ مَرِيَمَ تٌ، عَ نَ وَقٍ، يُوِقِ نَشٍيٍ نُ نَ عَ قْشْ رَ، نٍيٍ قَن وَقٍ، عَ نَشَ سُننُن، عَ بْحّ نَشَ رَحَاشُ عَ مَ.

³⁴عَ نَشَ مَشْرِنيِ تِ، «وٌ عَ رَفَتَشِ مِندٍن؟» عٍ نَشَ عَ يَابِ، «مَرِفِ، قَ، مُشُ شَ نَ مَسٍن عِ بّ.»

³⁵عِسَ نَشَ وَ.

³⁶نَ كُي، يُوِقِيٍ نَشَ عَ قَلَ، «عَ مَتٌ، لَسَرُ نُ رَقَنشِ عَ مَ كِ نَشّ!»

³⁷كْنْ ندٍيٍ عٍ يَ مَ، عٍ نَشَ عَ قَلَ، «ثٍ، يِ نَشَن دْنشُي يَ رَبْو، عَ مُ نُ نْمَ لَسَرُ رَتَنفَدٍ قَشّ مَ شّ؟»

³⁸عِسَ بْحّ مَن نَشَ رَحَاشُ عَ مَ. عَ نَشَ سِفَ فَبُرِ يِرٍ. قْنمّ ندٍ نَن نُ عَ رَ، فّمّ بٍلٍبٍلٍ دْشْشِ نَ دّ رَ.

³⁹عِسَ نَشَ عَ قَلَ، «وٌ فّمّ بَ نَا.» مَرَتَ، قَشَمِشِ مَافِنّ، عَ نَشَ عَ قَلَ، «مَرِفِ، عَ شَ مَرَفَتّ شِ نَانِ نَن تٌ! عَ عَ لِمَ عَ قُرٍ شِرِ بَرَ مِنِ يِ وَشَتِ مَ.»

⁴⁰عِسَ نَشَ عَ قَلَ عَ بّ، «ﭑ مُ عَ قَلَ شّ عِ بّ، عَ شَ عِ دَنشَنِيَ، عِ عَلَ سّنبّ مَكَابَشِ تٌمَ نّ؟»

⁴¹نَ كُي، عٍ نَشَ فّمّ بَ قْنمّ فَبُرِ دّ مَ. عِسَ نَشَ عَ يَ رَتٍ كٌورٍ، عَ عَ قَلَ، «ﭑ بَبَ عَلَ، ﭑ بَرَ عِ تَنتُ عِ تٌ ﭑ شُي رَ مّشِ.

⁴²ﭑ تَن حَن عَ كٌلٌن، عِ ﭑ شُي رَ مّمَ تّمُي بِرِن، كْنْ ﭑ نَ قَلَشِ حَمَ نَن مَ قٍ رَ نَشٍيٍ تِشِ بٍ، عٍ شَ لَ عَ رَ عَ عِ تَن نَن ﭑ شّيشِ.»

⁴³عَ نَ قَلَ شَنبِ، عِسَ نَشَ عَ شُي عِتٍ سّنبّ رَ، عَ عَ قَلَ، «لَسَرُ، مِنِ!»

⁴⁴عَ تَن قَشَمِشِ نَشَ مِنِ عَ سَنيِيٍ نُن عَ بّلّشّيٍ مَشِرِشِ كَسَنفٍ كُي، عَ يَتَفِ مَن مَكُنقُكُنقُشِ دُفِ فبّتّ قَن نَ. عِسَ نَشَ عَ قَلَ مِشِيٍ بّ، «وٌ كَسَنفٍ بَ عَ مَ، وٌ عَ مَقُلُن، عَ شَ نْ عَ حّرّدٍ.»

⁴⁵يُوِقِ نَشٍيٍ نُ بَرَ قَ مَرِيَمَ يِرٍ، عٍ عِسَ شَ كَابَنَكٌ تٌ، عٍ فبٍفبٍ نَشَ دَنشَنِيَ عَ مَ.

⁴⁶كْنْ ندٍيٍ نَشَ سَ دّنتّفّ سَ قَرِ سّنِيٍ بّ، عِسَ قٍ نَشَن نَبَشِ.

⁴⁷نَ كُي، سّرّشّدُبّ كُنتِفِيٍ نُن قَرِ سّنِيٍ نَشَ يُوِقِيٍ شَ كِيتِسَ شُنفبٍيٍ مَلَن. عٍ نَشَ عَ قَلَ، «وٌن مُنسٍ رَبَمَ؟ يِ شّمّ نَ كَابَنَكٌ فبٍفبٍ نَن نَبَقٍ.

⁴⁸شَ وٌن عَ لُ عَ يّتّ يِ، بِرِن دَنشَنِيَمَ نّ عَ مَ، رْ مَكَيٍ قَن قَمَ وٌن مَ هْرْ مْبَنشِ كَنَدٍ، عٍ وٌن سِ سْنتْ!»

⁴⁹عٍ شَ سّرّشّدُبّ كُنتِفِ كَيَقَ، نَشَن نُ نَ عٍ شُنيِ رَ نَ وَشَتِ، عَ نَشَ عَ قَلَ عٍ بّ، «وٌ تَن مُ سٍسٍ كٌلٌن يِ قٍ كُي.

⁵⁰كَ وٌ مُ عَ قَهَامُشِ عَ مِشِ كٍرٍن قَشَقٍ حَمَ بّ، نَ نَن قَن وٌ بّ، دِنّ وٌن سِ بِرِن شَ سْنتْ؟»

⁵¹كَيَقَ شَ نَ وْيّنيِ مُ قَتَن عَ تَن يّتّ شَ رَ. عَ تٌ نُ قِندِشِ نَ وَشَتِ سّرّشّدُبّ كُنتِفِيٍ شُنيِ رَ، عَلَ نَن نَ مَسٍنيِ قِ عَ مَ، عَ عِسَ نُ قَقٍ قَشَدٍ عِسِرَيِلَ حَمَ بّ.

⁵²كْنْ نَ مَن مُ رَبَ عِسِرَيِلَكَيٍ فبَنسَن شَ بّ. عِسَ نُ قَقٍ قَشَدٍ نّ عَلَكٌ عَلَ شَ عَ شَ دِيٍ قَن مَلَن، نَشٍيٍ رَيٍنسٍنشِ يِرٍ بِرِن، عَ شَ عٍ بِرِن قِندِ حَمَ كٍرٍن نَ.

⁵³نَ كُي، كَبِ نَ مَلَنيِ لْشْي، يُوِقِ كُنتِفِيٍ نَشَ نَتّ تٌنفٌ عِسَ قَشَقٍ رَ.

⁵⁴نَ نَن عَ رَ عِسَ مُ نْ مِنِدٍ كّنّ مَ سْنْن. عَ تَن نُن عَ قْشِرَبِرّيٍ نَشَ كٍلِ نَا، عٍ سِفَ عٍقِرَ مِ تَا كُي فبٍنفبٍرٍنيِ قّ مَ.

⁵⁵يُوِقِيٍ شَ سَيَمَلٍكّ دَنفِ سَلِ تٌ نُ بَرَ مَكْرّ، مِشِ فبٍفبٍ نَشَ كٍلِ دَاشَيٍ تٍقٍ رَ دَرِ سَلَمُ، عٍ شَ عٍ يّتّ رَ سّنِيّن بٍينُن سَلِ شَ عَ لِ.

⁵⁶عٍ نُ نَ عِسَ قٍنقٍ. عٍ نَشَ عٍ بٌرٍ مَشْرِن هْرْ مْبَنشِ تّتّ كُي، «وٌ شَ مَحْشُنيِ مَ، عِسَ قَمَ سَلِدٍ، كَ عَ مُ قَمَ؟»