San Juan 11:19-56

¹⁹Akkwan Judea suras awane Maríarakas Martarakas uzkɨnpainna ɨara, kiwainanapa, uspa tayalamanpa, nalpihsh irɨt akwa.

²⁰Jesús amtu piankamarawane, Martane ussa wanmalna ɨt. Sunkana Maríane yaltain nukkulta.

²¹Martane Jesústa kaizta: —Anpat. Nu akki tuaratne, ap nalpihsh irakianai.

²²Sunkana nane nu chiwazha Diosta paikumtu aizpa Dios nua mɨlanazi pianish.

²³Jesúsne kaizta: —Up nalpihshne mamasa uznazi.

²⁴Martane kaizta: —Nane nu kaizta aizpa watcha i pianish. Usne mamasa minpa payura irɨttas kuhsnazi.

²⁵Suasne Jesúsne ussa kaizta: —Nane irɨttas kuhsnintumika ish, awaruza uzninnanapa. Irakas, nawa nɨjkultamikane mamasa uznazi.

²⁶Wan ka uztuzkas nawa nɨjkultuzkas mizurainkas sunkanain iamanazi. ¿Sun nɨjkultukish?

²⁷Ussa kaizta: —Watcha, Anpat. Nune Dios narɨtmika i. Nune Dios painkul, au sura atmika i. Sun nɨjkultus.

²⁸Sun kiztawane, Martane aizpihshta, Maríara, akwana ɨt kit puintain kaizta: —Kamtammikane kashain tu. Usne nawa ɨninta, nua akwanpa.

²⁹Sun mɨrawane, sun urain Maríane kuhsak kit Jesústa izna ɨmɨzta.

³⁰Jesúsne pɨpulura naptachi mama. Usne Marta uskasa wanmaltakin tuara.

³¹Judío awane uskasa yalta purat kit uzkɨnnaara, us tayalmanpa. María kuhsak kit azain puzta izarawane, uspane ussa kanpaara. Us kamkin azna ɨmtuka minñara.

³²Jesús tukin pianarawane, Maríane paiña mittɨkin wakpuj wain kit kaizta: —Anpat. Akki tuaratne, ap nalpihshne irakianai.

³³Maríakas Judío awa uskasa amturuzkas azara. Sun iznarawane, Jesúsne ayukta kwail maz kit tayal kit

³⁴mɨmanara: ¿Mɨntama ussa kamanas? Sɨnkaara: —Anpat. Us tukin izna ɨzhain.

³⁵Jesúsne azta.

³⁶Judío awane usparuzpain kaizara: —Usne ussa watcha pashira.

³⁷Sunkana mɨnpazha kaizara: —Usne kasu izsachimikasha izkulninta. ¿Usne chiwazha kishinaka, Lázaro imanpa?

³⁸Jesúsne mamasa ayukta kwail maz kit tayal kit kamkin ara. An kamkin kul azi. Napmukin sɨptɨt tu katsa ukkasa.

³⁹Jesúsne ka ɨninta: —Uk tainkarain. Martane, irɨtmikawa kwampihshne, kaizta: —Anpat. Kwail piamka. Ampara payu i me kamtɨt.

⁴⁰Jesúsne sɨnkara: —Nane nua ka kaiztau: “Nawa nɨjkultune, nune Dios kal kimtu aizpa piankamanazi.”

⁴¹Suasne uspane uk tainkaara. Jesúsne chiyura izak kit tɨnta kaizta: —Ap Taitta. Aishtaish kiztus, pailta payukima nawa mɨmtu akwa.

⁴²Nane nu nawa pailta payukima mɨmtu pianish. Mane nane uspa puraruz akwa sun kiztus, nu nawa ɨninta nɨjkulanapa.

⁴³Sun kiztawane, Jesúsne tɨnta kwianta: —Lázaro, suas puzti.

⁴⁴Irɨtmikane chihtɨkas mittɨkas iptɨt tu puzta. Matsɨhkas maza pĩnkasa iptɨt. Jesúsne kaiznara: —Iptɨt pĩn chɨhttain, ɨnpa.

⁴⁵Suasne sun izarawane, akkwan Judío awaruzne Jesústa nɨjkulara. Uspane Maríara kanpanat kit Jesús kit aizpa izara.

⁴⁶Sunkana mɨnpazha usparuztas Fariseo awaruza ɨat kit Jesús kirɨt aizpa kainaara.

⁴⁷Suasne Fariseo awaruzkas pariya ɨnintuzkas anza katsa Judío ɨnintuzkasa wanmakkat kit kaizara: —¿Aune chima kianapas? An ampune akkwan iztasparɨt kal kimtui.

⁴⁸Sunkana us paiña kal kimɨztune, au ussa chɨhkatne, wanne ussa nɨjkulanazi. Suas Romano awa mikwaruzne aanazi, Dios katsa yalta azpianna, au Judío awa kwalkasa waya kiana, wan chiwal piantanakima.

⁴⁹Sunkana mazane usparuztas, Caifás muntɨtmikane, sun año pariya ɨninmika azi. Usne kaiznara: —Une sun kimtu aizpa pianchimai.

⁵⁰Une sun piankamtain. Maza ampu au wan Judío awa akwa irane, anza wari. Suasne Romano awaruzne au Judío awaruza piantaamanazi.

⁵¹Sunkana Caifásne sun pit paiña minpain kaiztachi. Caifásne sun año katsa pariya azi. Diosne ussa an ñamin sun kimtu aizpa piankamnin kit kizninta: “Jesúsne Judío awaruz akwa inazi.”

⁵²Sun Judío awa akwa imtukas, usne mamaz sura uztukas inazi, Dios usparuza maza kwalkanain, Dios painkulkanain wanmakkanapa.

⁵³Sun payurain Judío ɨninturuzne Jesústa piantana nɨjkulara.

⁵⁴Katmizna Jesúsne Judío awa ɨninturuz purakin izpanarachi. Usne Judea sukis puz kit Efraín pɨpulura ɨt. Sun pɨpulu pul su kashakin uz. Sua nukkulta paiña kammuruzkasa.

⁵⁵Judío awaruzpa Pascua pishta taiznapain. Pascua pishta taiztachasmin, akkwan awane nanmals Jerusalén pɨpulura nuara, Dios iztakin sɨnam saninnanapa, Pascua pishta izanapa.

⁵⁶Uspane Jesústa sayara. Dios katsa yalta wanmakkamtuasmin, uspane usparuzpain ka mɨmaara: —¿Chima minñamtu? ¿Usne pishtara ansa?