Juan 11:19-56

¹⁹Enuuque ecatse Marta, María jadya tatse paya jadya jucuare. Jetiama tatseja ata cuana peya cuana jadya tuna cuacuare tatse nime perera.

²⁰Marta tunajatu cuejacuare Jesús amena japadama juajeyaque. Bahue juatsu tujatu cuinanatsu tsurutsacuare. María bacue cuinanacuare ama etare juque.

²¹Martatu juticuare ecuana queja. —Ique Cuatsashaquique, mique rehua juchineque juatsu taa ecue enuu majuquena ama juchine.

²²Ique taa bahue Yusura mique mira dutya bacayaque tyayaque. Mira ni tuque eisarau ecue eatsehuequija ishu, Yusura taa tuque micue quisarati ebacau, —jadya tujatu atsacuare Jesús.

²³—Micue nuutu emaju jaraya ama, —jadyatu Jesúsra acuare.

²⁴—Jejee, adebayadya tuque era, tuque emaju jarasiriyaque ama. Bahuedya ique tuque dutya emaju cuanaque netitsuranucayaque huecaca chacha netitsuranucabuqueque, —jadyatu Martara Jesús acuare.

²⁵—Idya emaju cuanaque chacha amerequique. Idya emaju cuanaque nityatsuraquique. Eaqueja catyatiya cuanaque, arepa majuya ama bucha tuna chacha netitsuranucabuque.

²⁶Eaqueja catyatiya cuanaque tuna majutsu, chacha netitsuranucabuque. Yusuja yacuaju tuna chacha anibuque majunuca ishu ama. ¿Ejeneyadya mira? —jadyatu Jesúra acuare.

²⁷—Jejee, Ique Cuatsashaquique. Ejeneyadya tuque era. Midyami Mesías, Yusuja Emepeque. Yusuja Ebacuaque mique. Midya mique ecuana ihuacuareque, —jadyatu Martara Jesús acuare.

²⁸Jadya quisarati amena aatsutu Marta cuacuare ejanaque María cuejara. Inime eque piji tujatu cuejacuare peya cuanara ebacauju: —Ecuana Cuatsashaquique ri rehua. Ihuaramerehua tura mique. Jecuepa, —jadya tujatu aticuare.

²⁹Jadya bacatsutu nere netitsuraquena jucuare. Jadya juatsutu Jesús tsehue quisaratira cuacuare.

³⁰Junatima jari ecuana Jesús tsehue epuju jucuare. Martara tsurutsahuaju jari ecuana jucuare.

³¹Tuequedyatu tuja ata cuana María nime perera cuahua cuanaque tuque nere netitsura juatsu cuinanaquenayaju baatsu, tuna tupujudya acuare, tuque uhuacuareju enuuque enapara cuana cuaya bucha baatsu.

³²Tumetu Mariara ecuana queja junatitsu bacuare Jesús. Junatitsutu nuyunaticuare Jesúsja yacuaju. —Ique Cuatsashaquique, mique rehua juchineque juatsu taa ecue enuu majuquena ama juchine, —jadya tujatu aticuare.

³³Mariatu paya jadya jucuare. Tumebaedya tuque tajiaje juhua cuanara paquerecuaredya. Tuque dyaque peya inime baatsutu Jesús dyadi niju pau, peya inime jadya jucuare. Dyaque peya inime ishutu ecana acuare.

³⁴Tume tujatu ecana bacaduracuare tuhua jucuare cuanaque: —¿Eju tunajatu Lázaro emajuque ishachine? —Banacue, Ecuana Cuatsashaquique, —jadya tunajatu acuare.

³⁵Tuhua junatitsutu Jesúsra enapacuare.

³⁶Paya baatsutu israelita cuana tuhua jucuare cuanaque jadya jucuare: —¡Dyaque iyuhueda tujatu Lázaro yanume juchine!

³⁷Umae cuana bacue jucuare: —Riyajari casa aniya atucama cuanaque capetatisha ishu. ¿Eje bucha amae di taa rejari aquena juchine Lázaro maju ishu ama? —jadya tuna jucuare.

³⁸Tumetu Jesús cuacuare Marta, María, peya cuana tuhua jucuare cuana tsehue Lazaroja uhuacuareju. Dyaquetu capeyainimeticuare. Lazarotu eisha jucuare tumu ebari caniju. Cani tsecuetu tumu ebari tsehue etumu jucuare.

³⁹Tuhua junatitsu tuna Jesúsra cuatsashacuare: —Nenityasicuacue tumeque tumu etsecue penequique, —jadya tujatu ecana acuare. —Jadya juume, Ecuana Cuatsashaquique. Riya taa tu ecayuamati amena. Pushi huecaca tuque ecuana amena ishachineque, —jadyatu Marta majuchineja enuuquera Jesús acuare.

⁴⁰—Yuneridya ni mi eaqueja nimee juya, Yusurami tuja casa bamereya micue yacuajudya. ¿Jadya ama jatsu mique ahua? Ique pana ejene acue, —jadyatu Jesúsra acuare.

⁴¹Tura jadya ahuaju tunajatu tumu nityasicuacuare. Ebarucue queja bajiyutsutu Jesús Yusu tsehue quisaraticuare: —Ecue Etata, yusurupai mique aya, mira ique bacaya tibu.

⁴²Adebaya tuque era, mira ique dutya huecaca era isarayaju bacayaque. Etsuri jebuda tsehuedya mique isaraya, rehua eatsehue cuanaja baca ishu, tunaja yuneridya ique micue ecuadishaque ejene ishu, —jadyatu Jesúsra Yusu acuare.

⁴³Jadya juu jadya juatsu tujatu isaracuare jebuda: —¡Lázaro, cuinanacue tuhuaque!

⁴⁴Tumetu emajuque chacha netitsuracuare. Cuinanacuaretu caniju ishatanachineque. Chamacamatu cuinanacuare emetucu ecatse ehuachi ecatse jadya pirurichineque jirama tibu. Tuja ebutsequini bacue eraca tsehue edunu jadique. —Pana jira neacue. Pabucucu, —jadya tuna Jesúsra acuare. Jadya ayaju tunajatu jiracuare.

⁴⁵Jadya Jesúsra ahuaque baatsutu umada israelita cuana María tajira cuahua cuanaque catyaticuare Jesús queja.

⁴⁶Peya cuana bacue cuacuare fariseo cuana queja, Jesúsra eje bucha ahuaque cuejara.

⁴⁷Tumetu fariseo cuanara pae cuanaja huaraji cuana cuejaticuare. Masadama tuna dutya israelita cuanaja huaraji cuana dyaque arida cuanaque casitaticuare. —¿Eje bucha tuque ecuana Jesús eau? Dutyara bayaju taa tu aya Yusuja casa bamere ishuque. Jadya tibu taa ecana amena jetiama tuaqueja catyatiya.

⁴⁸¿Eje bucha jatsu tuque ecuana eau, tuja tume cuanaque ajaca ishu? ¿Eje bucha jatsu tuque ecuana eau, ecuita cuana tuaqueja catyatijaca ishu? Tuja cuanara ni ecuari bacanishaya, tume taa tu ecuanaja enaruqui Romajura ecuadishau rehua sudaru cuana ecuanaja epu tilla ishu. Tume taa tunajatu Yusuja etare erihuishatillanau. Ecuanaja baba cuanaja bahue eque taa tunara ecuana eanishajacau, —jadya tuna tuna cama jucuare.

⁴⁹Caifástu tumeque mara pae dyaque muidaque jucuare. Tuquetu quisaraticuare: —Micuana micuana baecua ni ai buchique.

⁵⁰Dyaque jida neiyera jutidya Jesús, dutya ecuana etillatau tibu. Dyaque jida peadya camadya pamaju, dutya ecuana emajuuju, —jadya tuna Caifásra acuare.

⁵¹Turatu adebacuare ama eje buchique tura quisarati ayaque. Arepa tuque tumeque mara pae dyaque muidaque juya ama buchatu Jesús tsehue cahuaiticuare jutidya. Jadya ama buchatu Yusura adebamerecuare Jesús israelita cuanaja ishu majudadiyaque. Jadyatu quisaraticuare ai tuja taca inime ama. Yusura adebamereyaque tujatu quisarati acuare.

⁵²Jesústu israelita cuanaja ishu camadya ama majudaditaqui jucuare. Tuquetu majudaditaqui jucuare dutya queja cuanaja ishu, dutya ecuana peadya camadya bucha juishu.

⁵³Caifásja quisarati bacatsutu tumeque huecaca eque israelita cuanaja huaraji cuanara Jesús iye ishu inime bajejetibunecuare.

⁵⁴Jadya tibudyatu Jesús amena ejitaju cuita israelita cuanaja epu ebari cuanaju junenicarama jucuare. Tumetu Judea juque cuinanatsu, ecuana tsehuedya dirunucacuare Efraín bacani epuju. Tumeque eputu jucuare tsecada anitaya cuanaque japadama. Tuhuadya ecuana tuatsehue anidirucuare.

⁵⁵Jetiama israelita cuanatu epu cuana juque cuabarecuare Jerusalénju, amena Pascua chine japadama juajeya baatsu. Tumeque chine ishu tuna tunaja bahue cabajejetitaqui jucuare.

⁵⁶Fariseo cuanara, pae cuanaja huaraji cuanara patuna amerecuare: —Ejeque ni micuana bahue juya Jesús ejuque, necuejacue ecuana, ecuanaja inati ishu —jadya. Jadya tibudyatu Yusuja etareju ai jidamaque eaniu cuanaque cabajejetira cuahua cuanara sarecuare Jesús. Cabacaduratibarecuarepa ecana tuna cama: —¿Eje bucha ni tu juya? ¿Ejeudyatu Jesús chine ishu, aijama ni taa? —jadya tuna jubarecuare.