JOAN 11:19-56

¹⁹Jume' juriom betana intok, juebenaka aman Maata' teamtau intok Maria' teamtau aanen, juka' bem abachi mukuka'a betana am jiapsi jo'abaekai.

²⁰Ju'u Maata' teame, juka' Jesujta aman a' yebijsuseka'po a' ju'une'eiyaakai, aapo a' nankibaeka yeu siika. Taa ju'u Maria' teame a' jo'awapo taawak.

²¹Ini'i Maata intok ju'u Jesujtau: ―In yo'owa, enchi inim aneo, ju'u in abachi ka muk ean ―ti au jiiak―.

²²Taa ket ne ju'unea, juka' Liojta, si'imeta juka' aapo'iku bicha em a'awa'uta, a enchi a' bittua'po ―ti au jiiak.

²³Ju'u Jesus, aapo'iku: ―Ju'u em abachi juchi jiapsine ―ti au jiiak.

²⁴Ju'u Maata intok junak: ―Lutu'uria, ju'uneanee chukula taewait, jume' kokkoarim jiabijteneeo, juchi a' jiapsinee'u ―ti au jiiak.

²⁵Junak ju'u Jesus iniau: ―Ineponee juna'a, ju'u kokkoarim nasuk yee jiabijtetuaka, jiba yuu jiapsiwamta yetet utuane. Junuen, wa'a nee sualeme, kia mukiataka juni'i, juna'a juchi jiapsine.

²⁶Intok jabetaka juni'i, ketun inim jiapsaka intok nee sualeme, ini'i, jakwoo juni'i ka mukne. Jaisa empo inika'a suale ja'ani ―ti au jiiak.

²⁷Aapo intok: ―Jeewi in yo'owa. Inepo nee enchi junen ju'u Krijtotuka'u enchi suale. Ju'u Liojta yoemia ju'u inim bwiau yebijneeka bo'o bitwame ―ti au jiiak.

²⁸Chukla inika'a teuwaasukai ju'u Maata, ju'u a' waaibeu Maria' teamtau chaaebaeka au siika intok junau: ―Ju'u yee majtame im aane intok eu chaae tebo ―ti jiaka, ka kusisi a' tejwaak.

²⁹Kia inika'a jikkajaka jiba ju'u Maria, kikteka intok Jesujta ane'u au siika.

³⁰Ju'u Jesus junama ili jo'ara Betaania' tea'u ketun kee aman kibaken. Taa ketun, jiba jum Maatata au yepsaka'po aanen.

³¹Junak jume' juriom a' jo'apo a' jiapsi yechaka aamak ama ane'um, junuen Mariata, kikteka intok sep yeu sikamta bichakai, inime'e aet cha'aka sajak, bempo, juka' Laasaro tuka'uta ma'ariu sika aman a' bwanbae'eti eakai.

³²Junak intok ju'u Maria, Jesujta ane'u yepsakai, aapo'iku tonommea kikteka intok: ―In yo'owa, enchi im aneo, ju'u in abachi ka muk ean ―ti au jiiak.

³³Ju'u Jesus, juka' Mariata intok jume' juriom aamak ama yajakame bwaname bichakai, tua a' sioka'u intok a' jiapsipo tua a' juiwa'u aet ayukan.

³⁴Intok aapo: ―Jakunsa eme'e a' teekak ―ti ameu nattemaek. Bempo intok: ―Itom yo'owa, a'abo sika a' bitne ―ti au jiiak.

³⁵Junak ju'u Jesus bwaanak.

³⁶Junak jume' juriom: ―Ake'em a' bicha, tua a' nakken ―ti jiian.

³⁷Taa juname betana waate: ―Ini'i, waka'a liptita a' bittuakame, jaisa juka' Laasaro tuka'uta, ka a' mukne' betchi'bo a' ania ean ja'ani ―ti jiiak.

³⁸Jesus, juchi tua jiapsipo a' juiwaka, jum tetapo wojo'orita ya'ariu ruktek. Ini'i, senu kau tejtukan. Intok ini'i, senu bwe'u tetae pattitukan.

³⁹Junak ju'u Jesus: ―Juka' tetata em omola kechaa ―ti jiiak. Ju'u Maata, ju'u mukukamta mak weri: ―In yo'owa, ini'i jiba tua jumak, jaibu tua juuba, bwe'ituk jaibu naiki taewaim jipue mukiatakai ―ti jiiak.

⁴⁰Taa ju'u Jesus iniau: ―Jaisa inepo, juka' Liojta betana tua eiyaawatchika, a jita a' joa'uta em a' bitnee'uta, ka eu teuwaala ja'ani. Inika'a enchi a' sualeo ―ti au jiiak.

⁴¹Junak intok ju'u teta omola biaktawak. Ju'u Jesus intok teekau jikau bicha bitchuka intok: ―In yo'owa, enchi ne bai sae, bwe'ituk empo ju'u in teuwaa'ut nee jikkaja.

⁴²Ju'uneane, ju'u in teuwaa'ut, jiba em nee aet jikkaja'po. Taa inika'a nee teuwaa jume' inim aneme aniabaekai, junuen inime'e, em a'abo nee bittuaka'po bem a' sualne' betchi'bo ―ti jiiak.

⁴³Chukula, inika'a teuwaasuka, kusisi nokaka: ―Laasaro, junum a'abo yeu weye ―ti jiiak.

⁴⁴Ju'u intoko mukia tuka'u, yeu siika, mampo intok wokpo tajo'orimmea biijti takai. A' pujbat intok ket tajo'orimmea bi'iti takai. Ju'u Jesus inimmeu: ―Tajo'orim em a' woitaria, a' weene' betchi'bo ―ti ameu jiiak.

⁴⁵Inia betchi'bo jume' juriom betana juebenaka Jesujta sualek. Jume' Mariata mak aman yajakame intok Jesujta yaaka'uta a' bichakame.

⁴⁶Taa inime betana waate, jume' paiseeom teammeu lauti sajaka intok inime'e juka' Jesujta yaaka'uta ameu teuwaak.

⁴⁷Junako jume' paiseeom intok jume' te'opopo tekiakammeu yo'owe, inime'e, ju'u jurio yoemratau, si'ime ju'u yo'oraata ama emo nau toji tebok intok inimmeu: ―Jaisa tua tee aune. Ini'i o'ou, machilaata juebenak, a jita a' joa'ue a' jooa ―ti jiian―.

⁴⁸Itepo inika'a junuen a' su'u tojako, si'ime ju'u inim yoemra a' sualne. Junak jume'e, jum bwe'u jo'ara Rooma' tea'po yo'ooraa, sontaaom a'abo bittuaka intok inime'e itomak nassuaka, itom bwe'u te'opota tatapnee intok inim yoemrata a' lu'utane ―ti jiian.

⁴⁹Taa inime'e betana seenu, Kaipaaj teame, ju'u junae wasuktiat, si'ime jume' te'opopo tekiakammeu che'a yo'o tuka'u, ini'i inimmeu: ―Eme'e kaita em tatta'aa ―ti ameu jiiak―.

⁵⁰Intok kia eme'e ka a' mammate juni'i, ito betchi'bo che'a a' tu'ireaka'u, junuen inim senuk itom yoemrata betchi'bo, wepu'ulaik jiba a' muknee'u. Intok ka junuen si'ime yoemrata a' lu'utanaa'u ―ti ameu jiiak.

⁵¹Taa aapo ju'u Kaipaaj teame, ka aapo a' ea'po junuen jiiak. Ala aapo junae wasuktiat, jume' te'opopo tekiakammeu che'a yo'o ya'atakai, aapo, Liojta betana aet ju'uneetuawaka junuen, Jesujta ju'u jurio yoemrata betchi'bo a' muknee'uta a' teuwaak.

⁵²Intok ka kia junae yoemrata betchi'bo jiba, taa ketchia si'imem jume' Liojta yoemiam, aniat na'ikimtulame junuen nau am toji betchi'bo.

⁵³Junuen san, jiba junae taewait naateka, ju'u jurio yoemratau yo'oora, juka' Jesujta a' me'e tebo betchi'bo, inime'e nau etejoka a' lutu'uria yaak.

⁵⁴Inia betchi'bo san ju'u Jesus, ka intok ju'u jurio yoemrata nasuk ame bichapo weaman. Ala aapo, jum a' ane'u betana yeu sika intok aman bweka pa'ariau yeu ka au mekka kateka, ili bwe'u jo'ara Epra'im tea'u bicha siika. Junama'a a' majtimmak tawakai.

⁵⁵Junama'a jaibu ka mekka be'een, jume' juriom bwala jissu'aka pajko jiba bem joa'uta a' yuma'anee'u. Yoemra intok juebenaka junama'a ili ka bwere jo'aram be'ekatana junaman bwe'u jo'ara Jerusalen tea'u nau yajak. Inime'e junuen, juka' pajkota, kee a' naateo, Liojta bichapo emo tu'utewamta a' ya'abaekai.

⁵⁶Junama'a waate, Jesujta jaiwan. Intok jum te'opopo anekai, bempo: ―Jaisa eme'e jiia, jaisa a'abo pajkou yebijnee ja'ani, oo ka a'abo weene ―ti nau nattemaen.