Isanquienare Maricoshi 11

1

2

3

4

5

6

7

8

9

10

11

12

13

14

15

16

¹Iquempejijeitapaacaro Jerosarequi, Vetejajequi, aisati Vetaniaqui: onaquenta toncaari pajitachari Orivomashi. Yora Jesoshi itiancaqueri iroamere apite,

²icantavaqueri: —Pijatapainte anta nampitsiqui onta amontetacari. Pareetapaaquearica, pineapaaqueri aparoni voro, tequera irantearitasanote, tequera inquijacoyeeteari. Ainiro itsatacota: pintsatacoreapeeri, pamaquenari.

³Ariorica incanteetavaquempi: “¿Paitaquea pitsatacoreantariri voro?” Ari pincantanaqueri: “Irio coiriri Avincatsarite. Coajica iroimpiajempiri aisati”. Ari irishinetempiri.

⁴Ari ijatanaque iroamere. Ineapaaqueri voro anta avotsiqui. Itsatacota ashitacoroqui pancotsi. Itsatacoreapaaqueri.

⁵Ainiro isaviqui atiri, isampitavaqueri: —¿Paita pantiri? ¿Paita pitsatacoreantariri voro?

⁶Yacanaqueri, icantiri oca icantavaqueriri Jesoshi. Ari ishinetavaqueri yaanaqueri voro.

⁷Ari yacatsatacotanaqueneri Jesoshi. Yoanquetaqueneri imititsaqui iitsaarepee, impoiji iquijacotacari.

⁸Ari yaniitacaanaqueri avotsiqui, ipincatsajeitavaqueri maaroni ishaninca, imaaroncajeitaqueneri quitsaarentsipee avotsiqui. Yora itsipapee ipesaqueneri inchatoshi, aisati yoaqueneri avotsiqui.

⁹Yora jivajeitaqueriri aisati impoijeitaqueriri, icajemajeitanaque: —Jeritapaaque oavisacojeiteeneri, tsame aacameetsajeitavaqueri. Coraqueni, iriotaque itiancaqueeneri Avincatsarite.

¹⁰Peerani Iravirini ipincatsariventirini ashanincani: meecaquea, impincatsariventaquee yoca aneavaquerica. Iriotaque ishanincani Iravirini. Tsame ampincatsajeiteri Tasorentsi inquitequiniri.

¹¹Ari yareejeitapaaca Jerosarequi, iqueapaaque ivancoqui Tasorentsi. Itsoteaquero yamenayetaquero, iro cantaincha ishaavijiiteanaque catsirincaiteri. Isoquijanaji, ijatanaji Vetaniaqui. Itsipajeitanajari iroamerepee.

¹²Ari oquitaitetamanaji aisati, yojocanajiro Vetania, irijate Jerosarequi. Nianqui aavetacari itashe.

¹³Ineaquero paricoti inchato, pajitachari iyera. Otimaveta oshi. Ari ijatashitiro, icoavetapaacaro oitsoqui. Te aneeroji, irointi oshi. Tequeratsita omoncaratajea oitsoquitantajeari.

¹⁴Icantanaqueri Jesoshi iroamere: —Tecatsi iroajeitajeari atiri oitsoqui aisati.

¹⁵Ari yareejeitaja aisati Jerosarequi. Iqueapaaji ivancoqui Tasorentsi. Yojocajeitapaaqueri maaroni pimantajeivetachari aisati maaroni amanantajeivetachari. Itatsinquitayetapaaqueri imesatepee yora pinavacaavetariri iirequite. Aisati itatsinquitayetapaaqueri isavicamentopee pimantajeivetariri sampaquiti.

¹⁶Itsaneapitsajeitacari irayetanaqueme vaararontsi anta ivancoqui Tasorentsi.

¹⁷Ari yoametantaque, icantajeitiri: —Peerani isanquenatironi irineane Tasorentsi, icantini: “Irootaque oca novanco. Aca inquenquetsatacaajeitantenari maaroni atiri”. Tempa piojeivetaro. Iro cantaincha avirojei pipeaquero ivanco coshinti.

¹⁸Ari iquemajeitavaqueri maaroni yora apatotimentariri, irootaque yoajeitantanacariri cavaco. Aisati iquemacotaqueri jivatacaajeitiriri saserote, oametantirori sanquenarentsi, maaroni. Icantajeivetaca: —¿Jaoca ancantaniroteriri Jesoshi, avanteariri? Iro cantaincha tecatsi incanteri, itsaroacaajeitacari. Tempa ipincatsajeitiri atiri Jesoshi.

¹⁹Iqueanaji catsirincaiteri, ari yojocanajiro Jesoshi nampitsi.

²⁰Oquitaitetamanaji aisati, ipianaja anta onaquenta iyera. Ineapaaquero, ocamanaque, irosati anta ovaritsaqui.

²¹Iquenqueshiretaquero Petero icantanaqueri Jesoshi oshaiteji. Icantiri: —Oametanari, pamenero iyeraca poamaimatanaqueri oshaiteji. Camanaque.

²²Yacanaqueri Jesoshi: —Pishireteari Tasorentsi.

²³Queariotaque oca noncamantajeitempiri. Ariorica pincanteri Tasorentsi: “Povaajero otishinta, poviincajero anta incajarequi”. Eirorica pitseencashiretitsi, aisati ariorica pioshiretasanotaque ovaanaquea, ari irimataquempiro.

²⁴Irootaque noncamantantempirori oca: ariorica pinquenquetsatacayeri Tasorentsi, paitarica pincanteriri, pinquenqueshirete: “Aitaque irimataquenaro nocantaqueriri”. Pishiretearirica, aitaque irimataquempiro.

²⁵Ariorica pinquenquetsatacayeri Tasorentsi, pijivate pincavintsayeri pishaninca: eiro piquishimentiritsi paitapeerica iranteri. Impoiji aisati avirori, eiro iquishimentimpirotsi Apa Tasorentsi pantayetiri avirori.

²⁶Eirorica picavintsairitsi pishaninca, eiro icavintsaimpitsi avirori Tasorentsi.

²⁷Ari yareejeitanaja aisati Jerosarequi, yaniitamanaji anta ivancoqui Tasorentsi. Yora jivatacaajeitiriri saserotepee, oametantirori sanquenarentsi, aisati savicacaantatsiri ipocashijeitaqueri.

²⁸Icantajeitapaaqueri: —¿Janica oametimpirori pipincatsaritantari pimayetantarori pantayetiri? ¿Janicampa meeca peaquempiri pincatsari, pimayetantacarori pantayetiri?

²⁹Icantavaqueri Jesoshi: —Meeca aparo nosampijeitempi avirori. Ariorica pancaquena avirori, noncamantempiro.

³⁰Yora Joa ivaotisatantayeti. ¿Janicampa tianquiriri ivaotisatantayeti? ¿Iriompa Tasorentsi tianquiriri? Tericampa, ¿irintimpa atiri tianquiriri? Panquenaqueti.

³¹Ari icantavacaanaca saserotepee: —Ariorica ancanteri: “Iriotaque Tasorentsi tianquiriri”, icanteecari: “¿Paita caari piquemisantantari Joa?”

³²Aisati eiro acantiritsi: “Iriotaque atiri tianquiriri”. Iquisheecari. Pineaquero, yora saserote itsaroacaajeitacari atiripee; maaroni atiri ineacameetsajeitaqueri Joa, icantajeiti: “Tempa irio Tasorentsi tianquiriri Joa icamantanti”.

³³Irootaque icantantariri saserotepee: —Te nioteji janicarica tianquiriri. Icanti Jesoshi: —Aisati narori, eiro nocantimpitsi janicarica tiancanari nopincatsaritantari nomatantarori oca.