Isanquienare Maricoshi 6:37-54

³⁷Yacanaqueri, icantiri: —Pimperita avinti iroyeari. Icanti iroamere: —¿Picoavetampa nojate namanantaite tanta nompantajeiteariri? Oshequi ompinatea noacantajeiteariri maaroni, eiro imoncaratarotsi airequite.

³⁸Yacanajiri: —¿Jaoca ocaratiri pitantane timatsiri? Pijate, pamenaitero. Ari ineaitiro, icantaqueri: —Apapacoroni ocarati tanta, aisati apite shima.

³⁹Icantiri: —Poisaviqueri atiripee ara saveshishiqui. Pampatoyeteri, aisati pinashitacaayeteari.

⁴⁰Ari yapatojeitaqueri, isavicajeitanaque. Aparoni apatojeitainchari icarati 100 atiri. Itimi oshequi itsipapee apatojeitainchari aisati. Inashiyetaca pashinipee apatojeitainchari, icarayetaque 50.

⁴¹Ari yaaquero Jesoshi tanta aisati shima, yamenanaque jenoqui. Icantiri iriri: —Ariove, Apa, aviro paquenarori oca noyearica. Icarajaquero tanta. Ipaqueri iroamere irovayeteneri apatojeitainchari. Aisati shima, yovayetaqueneri maaroni atiri,

⁴²ari yoajeitanaca. Iquemajeitanaca, te intsonqueroji.

⁴³Yaayetajiro timaarantapaajantsiri, ijaayetajiro cantiriqui ocarati 12.

⁴⁴Icarajeiti oacarori 5,000 shirampari.

⁴⁵Impoiji itianquiri Jesoshi iroamere, icantiri: —Pintetanajea pitotsiqui. Pijivajeitanaquena intatiqueronta, anta Vetsairaqui: nontiancajeitajerita ivancopeequi yoca apatojeitainchari.

⁴⁶Impoiji ijatanaque Jesoshi toncaariqui, iquenquetsatacairi iriri.

⁴⁷Otsitenijencaiteanaji, inianquijatacotanaque iroamere incajarequi. Itimaiti Jesoshi apaniro quipatsiqui.

⁴⁸Ineaqueri iroamere, icomacomajeiveta, iotaqueri imaojempequitaque. Aiquero oipiacotajiriri tampea. Ari oquitaitetimataji ijatashitajiri iriori Jesoshi. Yaniijatanajiro incajare, te intsitiyeji. Iro iravisanaquerime,

⁴⁹iro cantaincha ineajeitavajiri, yaniijatapaajiro incajare. Ijijeivetavacari irio camaari. Ari icajemajeitanaque: —Eeeee. Coraquenive camaari.

⁵⁰Ari ineajeitavaqueri maaroni. Itsaroajeitanaque. Ineanatapaajiri: —Pinquimoshirejeitaje. Narotaque pocajantsiri. Eiro pitsaroashijeitatsi.

⁵¹Itetapaaja pitotsiqui, itsipajeitapaajari, opeanaja tampea. Yoajeitanaque cavaco catsini.

⁵²Ineajeivetacari incaranqui itasonquiro tanta, iro cantaincha tequera inquenqueshireimateaji.

⁵³Ari imonteanacaro, yareejeitapaaca Jenesaretequi. Yaatacojeitapaaque.

⁵⁴Imitajajeitapaaque, intsipaite iojeitavaqueri atiri.