Marcos 6:37-54

³⁷Bale' wana ni Jesus konra, “Si'kamoynay mamin ma'kan ra.” Ket wanra, “Adti kami kadi' nin makasaliw nin tinapay a gumli ana nin ribu-ribo ta pigaw nin ipakan konra?”

³⁸Ket nitepet na ni Jesus, “Umno ray tinapay a main? Keen moyo pa nin kikiten,” wana. Sin ibat rayna nin kinikit ket wanra, “Lima ray tinapay tan rwa ray kuna' tamo'.”

³⁹Nigan-gan na konra a patekreen rasara nga'min a tutawo nin nagrupu-grupo sa rarabot.

⁴⁰Kanya' nin tinmekre' sara nin sisa'sanyasot tan sililimampulo'.

⁴¹Inagwang na ni Jesus a liman tinapay tan saray rwan kuna' mi'sa ya tinmangar sa langit ket nikisalamat ya konan Dios. Mi'sa tinau-tao nayti tan nibi na konran tumutumbok na nin itayak ra konran tutawo. Tinau-tao nasara anamaet a rwan kuna' para konran sarban tutawo.

⁴²Ket nakapangan sara nga'min a tutawo tan nabsoy sara.

⁴³Dininep ran tumutumbok a tara' nin tinapay tan kuna', ket main nin labinrwan balyag.

⁴⁴Saraytaw saray nangan, limanribo sarayna, saray lulalaki tamo' et.

⁴⁵Kaaram, pinaruran nasarayna ni Jesus a tumutumbok na sa baluto tan pinau'na nasaraynan mako sa rubari' sa babali nin Betsaida leg'an nasaran pinaibwat a tutawo.

⁴⁶Ket sin napaibwat nasarayna, nako ya sa sayay talugtog ta pigaw nin dumasal yadtaw.

⁴⁷Sin narate' anay yabi, itaw yaynay baluto a manruranan ran tumutumbok na sa butlay nin taaw ket si Jesus, itaw ya et nin bukud-bukod sa tangkar.

⁴⁸Na'kit na ni Jesus a mangkapaidap saran mansumaki ta sungsong yay siri. Sin bandan parbangon, tinmumbok ya konra nin manlumalako ya sa babon ranom. Ampadan nasarayna kumon ta pigaw nin mayi yayna konra.

⁴⁹Bale' na'kit ra nga'min a main nin manlumalako sa babon ranom ket nita'way ra bana' ta nipa'ka' ran lampong ya.

⁵⁰Pinasyan li'mo ra. Tampor nin nag'irgo ya si Jesus konra a wana, “Andi' kamo nin mali'mo! Si'koyti. Paksawen moyoy nakem moyo!”

⁵¹Rinmuran ya sa baluto ket linumteng. Ket naka'ngap saran maong a tumutumbok na

⁵²ta kai ra gapo nin natarusan a pipa'kaan nin nipamaka'baw na intaw ni Jesus sa saytaw say tinapay tan kuna'. Wanti bana' ta kai ti et maabot nin pakataros ra.

⁵³Sin nakaripay sarayna nin nakarate' itaw sa lugar nin Genesaret, niyabay rayay baluto.

⁵⁴Sin nakaarawas sarayna, saray tutawodtaw, naalilbi' rayan tampor si Jesus.