Iosua 1:4-10

⁴Kavava langun na tur pa ia ta ra bil ma ta go ra Lebanon, ma na tuk tar ta ra ngala na tava alir Oiparat, a gunan par kai ra tarai Ket, ma tuk tar ta ra ngala na ta ta nam ra papar i ong ra keake tana.

⁵Pa na tale ta tikai ba na tur ta ra luaina matam ta ra lavur kilala u laun tana; ma da iau ga maravut Moses, damana ina maravut u; pa ina nur vue u, ma pa ina vana balakane u.

⁶Una ongor ma una balamat, tago una tibe go ra tarai boko ma ra gunan nina iau ga vavalima tana pire kadia lavur ngalangala ba ina tul tar ia ta diat.

⁷Ia kaka una ongor ma una balamat muka, upi una torom ta ra lavur vartuluai nina Moses kaugu tultul i ga tul tar diat i tam; koko una vana kan diat ta ra papar a lima tuna ba ta ra papar a maira, upi una mal pa ra lavur magit ta ra gunan u vana tana.

⁸Koko go ra buk na varkurai na panie kan ra ngiem, ma una nununuk tana ra keake ma ra marum bula, upi una pait ra lavur magit di ga tumu ia tana, tago ona u pait nam kaum vinavana na boina, ma ra lavur magit na tavua piram.

⁹Pa iau ga vartuluai piram laka? Una ongor ma una balamat; koko una burut ma koko una ururian; tago amur varagur ma ra Luluai kaum God ta ra lavur gunan ba una vana tana.

¹⁰Ma Iosua i ga vartuluai pire ra umana raprap kai ra tarai dari: