Hetman 5:4-23

⁴Bikpela, taim yu lusim ol maunten bilong Seir, em kantri Idom, na yu kam daun, orait graun i guria na ren i kam daun. Tru tumas, wara i stap long ol klaut i kapsait na i kam daun.

⁵Ol maunten i guria long ai bilong God, Bikpela bilong Sainai, long ai bilong God, Bikpela bilong yumi Israel.

⁶Long taim bilong Samgar, pikinini bilong Anat, na long taim bilong Jael, ol bisnisman i pret long ol raskol na ol i no moa wokabaut long ol bikpela rot. Ol man i mas wokabaut i go i kam, ol i save hait na bihainim ol liklik rot tasol.

⁷Debora, ol Israel i no mekim wanpela samting. Ol i stap nating inap long taim yu kamap. Na yu olsem wanpela mama bilong lukautim ol.

⁸Taim ol Israel i bihainim ol nupela god, pait i kamap long ol. Ol Israel i gat 40,000 man bilong pait, tasol i no gat wanpela i karim hap plang bilong pait na i holim spia.

⁹Tingting bilong mi i stap wantaim ol ofisa bilong ami bilong Israel, na wantaim ol dispela man i laik pait. Litimapim nem bilong Bikpela.

¹⁰Yupela man i save sindaun long satel long ol waitpela donki, na yupela man i save wokabaut long lek, yupela i mas tokaut long dispela samting.

¹¹Harim. Ol lain manmeri i bung long ol hul wara na i givim wara long ol sipsip samting, ol i tokaut long Bikpela i win. Ol i tokaut long ol man bilong Israel i win. Na ol manmeri bilong Bikpela i lusim taun bilong ol na ol i kam daun.

¹²Yu go pas, Debora, yu go pas. Yu go pas na singim wanpela song. Na yu go pas, Barak, pikinini bilong Abinoam. Yu kirap na wokabaut. Yu kisim ol kalabusman i go.

¹³Ol gutpela man bilong pait i kam bung long ol lida bilong ol. Ol man bilong Bikpela i kam long em na ol i redi long pait.

¹⁴Ol Efraim i kam daun na wokabaut i go long ples stret. Ol i bihainim ol man bilong lain Benjamin. Ol hetman bilong lain Makir i kam daun na ol ofisa bilong Sebulun i kam daun.

¹⁵Ol lida bilong Isakar i kam wantaim Debora. Na Barak tu i go wantaim ol. Ol Isakar i bihainim em i go long ples stret. Tasol ol man bilong Ruben i gat tupela tingting na ol i no inap i go.

¹⁶Bilong wanem yupela ol Ruben i stap wantaim ol sipsip? Ating yupela i save laikim tumas long harim ol wasman i singautim ol sipsip, a? Tru tumas, ol man bilong Ruben i gat tupela tingting.

¹⁷Ol lain bilong Gat i stap long wara Jordan long hap sankamap. Tasol bilong wanem lain bilong Dan i wok long ol sip? Lain bilong Aser i stap long nambis bilong solwara. Ol i stap nating long nambis bilong ol yet.

¹⁸Tasol ol man bilong lain Sebulun na lain Naptali, klostu ol i kisim bagarap long ples bilong pait.

¹⁹Ol king i kam long taun Tanak, ol i pait klostu long wara bilong Megido. Ol king bilong Kenan i pait, tasol ol i no win. Ol i no kisim sampela silva i go.

²⁰Ol sta long skai i pait. Ol i bihainim rot bilong ol antap, na ol i pait long Sisera.

²¹Tait bilong wara Kison i karim ol i go. Dispela wara i stap bipo yet, tait bilong en i strong tumas. Bai mi taitim bun na wokabaut strong i go.

²²Na ol hos i save ran i go kwiktaim, ol i paitim graun long lek bilong ol.

²³Ensel bilong Bikpela i tok, “Taun Meros i mas kisim bagarap. Na ol man i stap long dispela taun ol tu i mas kisim bagarap. Long wanem, ol i no bin i kam bilong helpim Bikpela. Ol i no i kam olsem ol soldia bilong helpim Bikpela long pait.”