Kitisane 5:4-23

⁴Alatala, i to keli Seyiri yi, i to keli Edɔn yamanani, bɔxɔn yi xuruxurun, kundaan yi findi igen na, tule gbeen yi fa.

⁵Geyane yi xuruxurun Alatala yɛtagi, Sinayi geyana Alatala yɛtagi, Isirayilaa Ala.

⁶Anataa dii xɛmɛn Samagara waxatini, Yayeli waxatini, kira gbeene bata yi rabeɲin, sigatine yi sigama kiradine nan xɔn.

⁷Taane bata yi rabeɲin Isirayila yi. E yi kalaxi han n tan Debora fa waxatin naxan yi, n yi fa findi Isirayila kaane nga ra.

⁸E bata yi ala gbɛtɛne sugandi. Nayi, yɛngɛn yi keli e taane yi, koni, yɛ masansan wure lefana hanma tanban mi yi toɛ muxu kedenna yii muxu wuli tonge naaninna yɛ Isirayila yi.”

⁹“N bɔɲɛna Isirayila sofa kuntigine fɔxɔ ra, e nun muxun naxanye tinxi e xa siga yɛngɛni. Tantunna Alatala xa!

¹⁰Ɛ tan naxanye ɛ masiga tima sofali fixɛne fari, ɛ tan naxanye dɔxi dagine ma, ɛ tan naxanye sigan tima kirane xɔn, ɛ tuli mati

¹¹ige maxanle xuiin na ige ramaradene yi. E Alatalaa tinxinyana fe falama, a wali faɲine Isirayila kuntigine xa! Nayi, Alatalaa yamaan bata sa dɔxɔ taane so dɛɛne ra.

¹²E yi a fala, e naxa, ‘Xulun, xulun! Debora, xulun! Xulun, xulun! I bɛtin ba! Xulun! Baraka, xulun! Abinowan ma dii xɛmɛna, i sa fa i ya kasorasane ra!’

¹³Nayi, naxanye lu e nii ra, ne yi siga kuntigine fɔxɔ ra, Alatalaa yamaan yi e malan n fɛma, siga sofa kɛndɛne xili ma.

¹⁴Efirami bɔnsɔnna muxuna ndee yi fa naxanye Amalɛkine nɔ. Bunyamin bɔnsɔnna muxune fan yi biraxi i fɔxɔ ra. Kuntigine yi keli Makiri yi siga yɛngɛni. Sofa kuntigine yi fa sa keli Sabulon bɔnsɔnni.

¹⁵Isakari kuntigine yi bira Debora fɔxɔ ra, Isakari bɔnsɔnna muxune yi biraxi Baraka nan fɔxɔ ra, e godo lanbanni mafurɛn! Koni, matandi gbeen yi lu Rubɛn bɔnsɔnni.

¹⁶Nanfera i luxi sansanne kui i lu xuruseene wuga xuiin namɛ? Matandi gbeen yi lu Rubɛn bɔnsɔnni.

¹⁷Galadi kaane yi lu Yurudɛn baan kidi ma! Nanfera Dan kaane luxi kunkine dɛxɔn? Aseri kaane yi lu dɔxi baan dɛ, e lu dɔxi kunki tideni so dɛɛne ra.

¹⁸Sabulon bɔnsɔnna muxune tan yi tin sayaan ma yɛngɛni, Nafatali bɔnsɔnna muxune fan na kiini xɛɛne ma.”

¹⁹“Mangane fa nɛn, e yi yɛngɛn so. Nayi, Kanan mangane yi yɛngɛn so Taanaki yi, Megido tigine dɛxɔn, koni, e mi gbeti yo tongo, e mi sese sɔtɔ yɛngɛni.

²⁰Sarene yi yɛngɛn so kore xɔnna ma, e yi Sisera yɛngɛ e funfuni.

²¹Kison baa igen yi en yaxune xali, Kison baa igen naxan yi minima xabu a fɔlɔni. I wɛkilɛ! En siga yɛngɛni!

²²Nayi, soone torone xuiin yi mini, e danguma e giyɛ, e tuganma alo soo sɛnbɛmane.

²³Alatalaa malekana nde yi a fala, a naxa, ‘Dangan Meroso taan xa, ɛ a muxune danga, bayo e mi fa walixi Alatalaa fe ra, e mi fa Alatalaa sofa kɛndɛne malixi.’