Jasi 5:4-23

⁴Kamongo, emba yuu Siya dokona yuu kyau singi dupwa dee yuu Itome yaki nyepala epene dokopa yuusili minyapala yake dokona piso apu epeya. Kinyi, kopa dokona piso ipwa kulimbwanyi peyo epeya.

⁵Isaraele wambunya Kamongo Anatunya lenge kambu dokonape dee yuu kyau Sainai dokona Kamongona lenge kambu dokonape piso yuu kyau dupwa yuusili minyili lao pyuku pyuku leya.

⁶Dokopa akali lapo mena kamele maki maki pyuo lanyuo mata dupwana bange keyange reto kana nyuo bisinase pyuo papingi dupwa akali Samika Anatinya ikinyingi ando kareyamo yuu gii dokopape dee enda Jaele ando kareyamo yuu gii dokopape yuu dokona kata sukusa dopa pyuo paa nayami. Dee wambu lapo kata londe panya peyami dupwa nemba nemba kata kuki dupwana iki peyami.

⁷Isaraele wambu dupwame nakamana taone dupwa kame soo yaki nyiyami. Depora, emba ene epapa naenepa mende pii nao mee kareyami. Emba Isaraele wambunya endangi dopale ingyuo epee.

⁸Enakana Isaraele wambu dupwa mee bange anatuŋu lenge enenge dupwa rombo palyuo nyiyami dokopa yuu dokona yanda sipureya. Dokopa Isaraele yanda singi akali taosande akalisa kisima (40,000) dupwana mendalipi konambe kakupi minya nayami.

⁹Nambana mona doko Isaraele wambunya yanda singi dupwana akali iso karenge dupwa keta silyamo. Dee wambu lapo mee rae maiyuo yanda pela peyaminyi dupwana keta silyamoko. Kamongo doko lakandalapape.

¹⁰Wambu mena donge kewa lengena mata dokona isa petenge bange retapala petaminyi dupwape dee nakama mee kata papingipi pii dake polo lamailapape.

¹¹Selapa. Wambu pii malu lao ipwa kamuo nyingi yuwale repeta karaminyi dupwame Kamongome anamasi minyiyamo dupwanape dee Isaraele wambu dupwame wini piyaminyi dupwana lao lao karaminyi. Dokopa Kamongona wambu dupwa nakamana yuu taone andake karenge dupwa yaki nyepala nakama lano epeyami.

¹²Dokopa lao, Depora emba wambo puu. Kenane mende pyao wambo pupi. Akali Bereke Apinomena ikinyingi wambo pao embena karapusi wambu dupwa lanyuo puu, leyami.

¹³Dokopa enakana akali yaki nyii nange dupwa nakamana lita dupwa keta epeyami. Dokopa Kamongona wambu dupwa baa keta epo rapa rapa pipala yanda pela epeyami.

¹⁴Yuu Eporaime wambu dupwa nakamana yuu dokona piso akali Benjamenena rara wambu dupwana matarena epo yuu anda lama lama dokona epo sukusa pyaka siyami dokopa yanda singi isingi akali dupwa yuu Maki piso epeyami. Dee akali mupwa dupwa yuu Sepyulane dokona piso epo piyami.

¹⁵Isakana rara dokona akali mupwa dupwa poropeta enda Depora role pyao epeyami. Kinyi, Isakana rara dee Bereke opetaeko epeya. Dokopa nakama Bereke moko minyuo yuu pau lama lama dokona peyami. Dopa piyamopape Urupenena rara dupwa lili pyuo pingisi palipala nakama parama panda paa narama lao see nayami.

¹⁶Akipamo nakama mena sipisipi dupwa pipya karo kaeyamisi? Nakama kareyami doko mena sipisipi rapu pingi akali dupwame mena sipisipi kee larami doko selana kareyamisi? Waa. Urupenena rara dupwa lili pipala pingisi paleya. Dokona nakama parama panda paa narama lao see nayami.

¹⁷Dokona Gate rara dupwa ipwa Jotane neta pyakalyingi dorena kareyami. Dokopa Danena rara dupwa sipu dupwana yulu pyuo karo kaeyami. Dokopa Asana rara dupwa ipwa kota kipwa kipwa wangu dupwana kareyami. Doko nakama ipwa kee kama dupwana mee kareyami.

¹⁸Dopa piyaminyipape Sepyulane wambupi dee Napatalai wambupi dupwa nakama kumarami dokona suu pyaa napala nakama range kumuo maiyuo yanda pingi yuu dokona yanda pyuo kareyami.

¹⁹Dokopa yuu Tanake dokona ipwa Meketo repeta dokona kiŋi dupwa epapala yanda piyami. Yuu Kenane kiŋi dupwame yanda piyaminyipape nakama kana kulingi mendepe nyuo lanyuo paa nayami.

²⁰Bui dupwa yake dokona pyakando pyuo oko soo peyami. Dopa pyuo peyaminyi dokopa nakama Sisirapa yanda pimwai ingyuo piyami.

²¹Ipwa Kisone lenge doko palipala nakama peparae soo peya. Dokona namba porai ingyuo karo kimbu pyao piso paro.

²²Dokopa mena ose dupwa poraiyuo makando nakamana kimbu dupwame yuu pyao inju epeyami.

²³Kamongona aŋala dokome lao, Yuu Metose keta randa maipwape. Dee yuu dokona palaminyi dupwa keta randa maipwape. Nakama yanda singi dopale ingyuo epo Kamongo nyiso banya lao yanda pela epa nayami.