Zatù 5:4-23

⁴He Nengazen, hein migenat ka he ebpuun diyà te Buntud he Seir, wey migawas ka te tanà he Edom, midlinug wey mid-uzan te utew mereǥes.

⁵Nehuyung is menge vuntud diyà te etuvangan nu, Nengazen. Iyan ka kes Megbevayà te Israel, ne impezayag nu is keugelingen nu ziyà te Buntud he Sinai.

⁶Hein timpu ni Shamgar he anak ni Anat, wey te timpu ni Jael, tenged te kegkahandek wazà mid-ikul zuen te zekelà he zalan. Is ebpemenhipanew ne ziyà ebpemen-ikul te dezeisey he menge zalan.

⁷Wazè en egkesuat he ed-ubpà diyà te Israel, taman te kebpekeuma nu, Debora, te migkilala he iney te menge Israilihanen.

⁸Hein mid-azap sikandan te veǥu he menge ed-ezapen, nehitavù is tebek diyà te tivuuk he Israel. Piru te 40,000 he menge Israilihanen ne wazà minsan sevaha kandan he zuen din kelasag etawa vangkew.

⁹Utew ingkelipey te gehinawa ku is menge pengulu te Israel wey is menge Israilihanen he mibpurung mebpezumazuma kandan. Ereg he edeliǥen is Nengazen!

¹⁰Sikiyu is menge sepian he ebpemen-untud te meputì he menge asnu he ziyà ebpeminuu te mekempet he pinuuwà kayi, wey sikiyu zaan is menge pubri he ebpemenhipanew zà, pemineg kew!

¹¹Pemineǥa niw is edseysayen te menge etew he ebpemenliǥuy ziyà te menge teheb. Edseysayen dan is kezeeǥan te Megbevayà pinaaǥi te menge sundaru zin diyà te Israel. Ne midhendiyà is menge etew te Nengazen te pultahan te inged he ke sikandan te,

¹²“Egenat ki, Debora, egenat ki ne egkanta ki te kedalig te Megbevayà. Ne Barak he anak ni Abinoam, duma ka zaan wey bihaǥa nu is menge bilihaǥen nu.”

¹³Is nesamà he menge uuyag he menge etew te Nengazen midtupang dan duma kedì te kedsurung te dungganen wey gemhanan he menge etew.

¹⁴Is duma kandan ebpuun diyà te Efraim he lugar he ǥaked dengan te menge Amalikanhen. Ne midtinundug kandan is tribu ni Benjamin. Midtupang is menge peremandar he ebpuun te pemilya ni Makir, wey is menge upisyal he ebpuun te tribu ni Zebulun.

¹⁵Miduma zaan ki Debora wey ki Barak pehendiyà te menge suǥud is menge pengulu te tribu ni Isacar. Piru is tribu mulà ni Reuben, wazè dan mekehukum ke eduma zan etawa kenà.

¹⁶Ne tribu ni Reuben, maan is mibpetaǥak kew zuma te menge kerehidu? Iyan be igkeiniyat niw is pengumawan te ebantey te menge kerehidu zan? Is tribu ni Reuben kenà ebpekidsevaha umbe kenè dan ebpekehukum ke hengkey is engayan he ebeelan dan.

¹⁷Wazà daan medwaleng is tribu ni Gad diyà te zapit te edsilaan te Jordan, ne is tribu ni Dan ne wazè dan daan engkezi is terebahu zan diyà te menge varku. Ne wazà daan medwaleng is tribu ni Asher ziyà te ed-ubpaan dan he veyvey te zaǥat.

¹⁸Piru impedserakan mulà te tribu ni Zebulun wey te tribu ni Naftali is untung dan su mibpekidtebek dan.

¹⁹Nekeuma is menge hadì he menge Canaanhen ne nekidtebek dan te menge Israilihanen diyà te Taanak he uvey te veyvey te Wahig he Megido, piru wazà sikandan meketavan te minsan sevaha zà he pelata.

²⁰Kenà iyan dà nekidtebek engki Sisera is menge Israilihanen su elin is menge vituen.

²¹Naanud sikandan diyà te zal-ug te Kishon, kes kezaan he zal-ug. Ebpedayun a he ebpekidtebek duma is kelig-en.

²²Ne egkezineg is debakdebak te menge kudà.

²³Ne migkaǥi is belinsuǥuen te Nengazen te, “Edrewakan is Meroz! Ebpurungan edrewaki is menge meǥinged kayi su wazè dan medtavang hein ebpekidtebek is Nengazen te mekeǥeǥehem he menge etew.”