A Umana Tena Varkurai 5:4-23

⁴Luluai, ba u ga vana rikai maro Seir, Ba u ga vana pa kan ra langun Edom, A rakarakan a gunagunan i ga dadadar, ma ra bala na bakut i ga tua, Maia, a umana bakut dia ga tua ma ra tava.

⁵A umana lualuana dia ga guria ta ra luaina mata i ra Luluai, Maia pa, Sinai iat i ga damana ta ra mata i ra Luluai ra God kai Israel.

⁶Ta ra e kai Samgar natu i Anat, Ta ra e kai Iael, pa ta na i ga tur ta ra umana nga tur, Ma ra umana tena vinavana dia ga vana irai ta ra umana nga ra pui.

⁷Pa ta tena varkurai i ga ki Israel, dia ga tar ngo par, Tuk tar ba iau Debora iau ga tut rikai, Ba iau ga tut, nina ba iau ga varvangala livuan tai Israel.

⁸Dia ga pilak pa ra umana kalamana god; A vinarubu i ga tur ta ra umana mataniolo; Dave vang, di ga gire ta bakbakit ba ta rumu Pire ra ivat na vinun na arip na marmar na tarai dia ga ki Israel?

⁹A balagu i malamalapang upi ra umana luluai Israel, Nina dia ga tul tar diat ma ra gugu livuan pire ra tarai Israel; Avat a pite pa ra Luluai.

¹⁰Avat ava ki ta ra umana as dia pua, Avat ava ki ta ra umana bo na kurit dia ngatngat muka, Ma avat ava vanavana ka ta ra nga, avat a varvai ure.

¹¹Ta ra gunan ba pa di valongore ra nilai ra umana tena panak, ma ba di kulupe ra tava tana, Ta nam iat ra pakana diat a varvai ure ra lavur bo na papalum kai ra Luluai, Maia pa, ra lavur bo na magit i pait ia ba i kure Israel. Ma ra tarai kai ra Luluai dia ga vana ur tadav ra umana mataniolo.

¹²Tavangun, una tavangun, Debora; Tavangun, una tavangun, kaile ta kakailai; Una tut rikai, Barak, ma una ben vavilavilau kaum umana vilavilau, u natu i Abinoam.

¹³Ma diat dia ga ki valili ta ra umana luluai, ma ra tarai dia ga vana ur; Ra Luluai i ga vana ba upi amir a kure ra umana lebe.

¹⁴Dia ga vana rikai kan Epraim upi uro ra malamale, Ma Beniamin i ga mur u tana livuan ta kaum vuna tarai; A umana tena varkurai dia ga pot maro Makir, Ma diat dia vatur vake ra buka kai ra lualua na tena vinarubu dia ga pot maro Sebulun.

¹⁵Ma ra umana luluai Isakar dia ga tur maravut Debora, Ma Barak bula i ga maravut varogop ma Isakar; Dia ga vutvut tadav ia ta ra bala na male; Maravai ra umana tava alir kai Ruben Dia ga vavalima tana.

¹⁶Ta ra ava u ga ki livuan ta ra umana kikil na sip, Upi una valongore ra umana kaur na vuvu nina di ga ororo ra sip me? Maravai ra umana tava alir kai Ruben dia ga nuknuk vatikene pa ia ta ra bala i diat.

¹⁷Gilead i ga ki ta ra papar a tava Iordan maro; Ma Dan, ta ra ava i ga ki ta ra bala i ra umana parau? Aser i ga ki ka ta ra olaolo na ta, Ma i ga bang maravai ta kana umana tava.

¹⁸A tarai Sebulun dia ga nuk vaikilik pa kadia nilaun, ma dia ga tul tar diat mulai upi ra minat. I ga damana bula ma Naptali ta ra bala na kamara ba pa ta bakbakit tana.

¹⁹A umana king dia ga pot, ma dia ga varubu; A umana king Kanaan dia ga varubu, Ta ra gunan Tanak maravai ta ra tava Megido, Ma pa dia ga kale ta tabarikik tana.

²⁰A bala na bakut i ga ebar ma diat, Ra umana tagul dia ga tut ure Sisera.

²¹A tava alir Kison i ga kap vue diat, A tava alir Kison iat, nina i ga ki papa amana iat. Ea, a tulungeagu, una ongor ta kaum vinavana.

²²A umana kau i ra umana os dia ga ruarua ra pia, Dia ga ruarua ra pia ba dia vilau.

²³Na kaina piram Meros, ra angelo kai ra Luluai i ga biti, Da tata vakaina ra tarai dia bang tana; Tago pa dia ga maravut ra Luluai, Pa dia ga maravut ra Luluai ba i ga varubu ma ra umana lebe.