HECHOS 19:1-9

¹Nu'bʉ mí 'bʉpʉ Corinto ra Apolos, nɛ nu ra Pablo bʉya i 'yo gätho yʉ hnini maxøts'e, nɛ bi zøm bʉ ra hnini Éfeso. Nɛ bin tįmhbʉ bʉ 'da yʉ 'yɛ̨c'yɛi.

²Nu ra Pablo bi 'yän bʉya: ―Ha bin 'da ahʉ rá Hogandąhi Oją nu'bʉ gmí 'yɛ̨c'yɛihʉ, bi 'yɛ̨na. Nu'ʉ bi dąti: ―Hin'na, njąm'bʉ dá øhmbe gue i 'bʉh rá Hogandąhi Oją, bi 'yɛ̨n'ʉ.

³Nubʉya bi 'yän'na ra Pablo: ―'Bɛ'a ním hma gá hyąmhbʉ 'bʉ gmín xixyąhʉ, bi 'yɛ̨mp'ʉ. Nɛ bi 'yɛ̨n'ʉ bʉya: ―Tengu thoho bi man ra Xuua Nxixyą, bi yɛ̨n'ʉ.

⁴Nɛ nu ra Pablo bi 'yɛ̨mbi: ―Guim bɛ̨mhbʉ 'bɛ'a bi man ra Xuua, nguetho nu'a ra Xuua bi xixyą yʉ ją'i to'o bi päh yʉ́n 'yomfɛ̨ni nangue yʉ́ ts'oqui, nɛ bi xih yʉ ją'i da 'yɛ̨c'yɛi n'da ba ɛ̨hɛ m'bɛjua, gue ra Jesús ra Cristo na, bi 'yɛ̨na.

⁵Nɛ nu'bʉ mí 'yøh rám hman ra Pablo, nu'ʉ bi mba ma xixyąbi nangue rá thuhu ra Hmu Jesús.

⁶Nɛ nu'bʉ mí dospa yʉ́ yą yʉ ją'i ra Pablo, bi hyąn rá Hogandąhi Oją ʉ. Nɛ n'dan'yo yʉ nde bin yą'ʉ bʉya, nɛ bim pøngahyą bi man rám Hman Oją.

⁷Nɛ nu'ʉ yʉ ją'i gue bi 'yɛ̨c'yɛi, í jua'i 'dɛ'mayoho ʉ.

⁸Nu ra Pablo bim 'bʉpʉ nhyuzna bʉ Éfeso bʉya. Bi hyut'an zambʉi bin yą bʉ ja rá niją yʉ judío, bi xih yʉ ją'i hague dán zä di manda Oją bʉ ja yʉ́ mbʉi, nɛ bi hyoni 'bɛpʉ dí 'yɛ̨c'yɛi yʉ ją'i.

⁹Pɛ nu'ʉ 'da bi ʉ't' yʉ́ mbʉi, hingui nde da 'yɛ̨c'yɛi, nɛ bi man ra ts'ore nangue rá 'yu Oją, guepʉ madím pɛti yʉ ją'i. Janangue'a bi 'ue'a ra Pablo bʉya nɛ bi mbähä yʉ 'yɛ̨c'yɛi bʉ ja n'da ra nguxädi, nu'a ra Tiranno ra xänbate bʉ. Nu'bʉ xʉm pøn yʉ́ xädi, i cʉt'a ra Pablo bʉya nɛ gätho yʉ pa mín xänbate bʉ.