HECHOS 19:1-9

¹Numanahn che quenan Apolos ya̱n Corinto ne, chuh Pa̱blo cua̱hn icoya̱hn, ne nda̱ ye ya̱n Efeso. Min ndihche ye neve se che ritahno se Dihvo vo Jesucristo,

²ne tumerune ye sa̱hn: ―¿A quenun Vaco Ndah yahn Dendiohs nchuhn cuahn che chitahno ne Jesucristo ne? Ndahconan sa̱hn chahn: ―Nde hua nihnevan nuhn yahn Vaco Ndah yahn Dendiohs.

³Tuhme ndaconan tumerune ye sa̱hn chahn: ―¿Ta̱ca̱ chedenune nchuhn tuhme ne? Ndahconan se: ―Chedenune nuhn nduhca̱ che chehdenune Jua̱n Bautista ihyan.

⁴Ra̱hn Pa̱blo ri ye sa̱hn: ―Jua̱n ne, chehdenune ye ihyan ca̱va che co ro che a nto ino ihyan chahn nunde yahn ye. Namin ra̱hn Jua̱n ri ye ihyan te va che cotahno ye a̱ma ihyan che cochi ye adive. A ihyan min che Jesús che a va ca̱de che chi ye, ndedevahn ye ihyan iyehnse.

⁵Cuahn che chihnevan sa̱hn chahn che tihca̱ ne, chedenune se, cah se Dihvo vo Jesucristo.

⁶Nahn ta̱h Pa̱blo sa̱hn, ne quenun Vaco Ndah yahn Dendiohs sa̱hn, din che nte se ta̱ma te o deva̱co ma̱n, cahndudo se Ndudo yahn Dendiohs ma̱n.

⁷Va̱n nducoya̱ca ne, ri se tenduh ndichio ihyan se.

⁸Numanahn che quenan Pa̱blo min ino iyo ne, rahn ye ya̱co, rahndudo ye numa ino ye, redin ye che renahn ihyan yahn vederihquentiyon yahn Dendiohs.

⁹Ate a̱ma ya̱hn ihyan ne, nducote cheche chedave yahn ye ne, hua chitahno ye, ne chihnga̱ ra̱hn ye yahn ndudo ndah yahn Dendiohs. Chemin che Pa̱blo nduco nducoya̱ca ihyan che ritahno ye Dihvo vo ne, chihcoma̱n ye ihyan chahn, ne cuahn ye, ndo da̱ma ye chete escuela yahn a̱ma ihyan che duche ye Tiranno. Min cahndudo ye ro ro.