1Ijkuak Apolos ok okatka Corinto, Pablo okintlajpalojtiah kan ik altepemeh non kateh okachi tlakpak, asta okalakito kan altepetl de Éfeso. Ompa okinmajsito sikimeh tokniwah non kineltokah Cristo Jesús.
2Iwa okintlajtlani: —¿Ononkiselijkeh n Espíritu Santo ijkuak ononkineltokakeh Cristo Jesús? Yejwah okinankilijkeh: —Ayik tikkaki kox onka Espíritu Santo.
3Ijkuakó n Pablo okintlajtlani: —¿Tlan tlakuaatekílistli ononkiselijkeh? Yejwah okinankilijkeh: —N tlakuaatekílistli non Juan okitemachti.
4Pablo okinmili: —Milák, Juan okinmiliaya n tlakah mamokuaatekikah iwa makiteititikah yejwah de milajka okinekiah kikawaskeh tlan amo kuali okichijtinemiah, pero okimiliaya omonekiah kineltokaskeh akin walaskia satepa de ye, kijtosneki makineltokakah n Cristo.
5Ijkuak okikakeh tlan Pablo okinmili, omokuaatekijkeh itech Itoka n Toteko Jesús.
6Iwa ijkuak Pablo okintlali imawah impah, n Espíritu Santo owala intech iwa opé tlajtoah ika oksikimeh tlájtolteh iwa okitematiltijkeh tlan Dios okimiliaya tlamochiwaskia.
7Yejwah okatkah kemi májtlaktli iwa n ome tlakah.
8Eyi mestli Pablo oyaya kan se sinagoga. Ye ompa okitematiltiaya itlajtol Dios ika miak yolchikawálistli. Okinnonotsaya n judíojteh noiwa makalakikah kan Dios tlanawatijtok.
9Pero sikimeh oyoltlakuawakeh iwa mach okineltokakeh itlajtol Dios, yej teixpa otlajtoayah fiero de n kualitlájtoli. Ijkuakó Pablo omoxelo de yejwah, iwa okinwík n tokniwah kan se kali kan momachtilo de se tlakatl non itoka Tirano, iwa ixmostla ompa omotlapowiayah.
Hechos 19
Hechos 19:1-9