GWAY GI IDAWUU’D 44:8-23

⁸Eya Arumgimis mo tani aman dhukina ’ba/ ki ca ki ṯikir ṯikir mo, dhali aman mina c̱i /e momaŋ gom gway pini ki sule/ sule/ mo. Doshi ma dhali ’cunycuri yan mo.

⁹Hili /e ki ṯa’k am ka pije/ mo dhali dhu am ki mondhu is ki gwa’d mo, dhali /e diki ya ka pije/ nyaḵki ’kwani ma meem bam mo.

¹⁰/E ki dhu am mmodoḵ ka nyaŋ’ko’d mo ’peni uni gun ’kwar am ka gwap̱i/ mo. Dhali uni kun ta ’kup̱ ki am mo tani dilki aman to mo.

¹¹/E ki dhu am me’d ḵa’bal kun minu ’ciṯẖ ’kus mo, dhali /e ki c̱eker aman bwa mo e bwaman kal gi ’kwaniny’ceshi ’baar mo.

¹²/E ki yol ’kwanim pini ka maliim gana/ mo, /e ki ḵan gwo ki uni minu ’koki yol ka thaman kun caaca mo.

¹³/E ki dhu am ki uni gun nyaḵ ’ko ki am mmoc̱i aman gura/ mo, dhali aman dup̱u i e dhali ṯẖuny ’twa/ i is ki uni gwansan kun ’kamki am is mo.

¹⁴Dhali /e ki dhu am ki ku gun miinu mii ka maḵ mo e bwaman kal gi ’kwaniny’cesh mo. dhali aman p̱e’thkunu mmopir ’kup̱i is e bwaman ’kwaniny’cesh mo.

¹⁵Ka cim ’baar mo mom pem jin darka/ ka ’the mo di’di bwambori aha/ mo, dhali mon’the is a’di kumki aha/ bwam/em pem mo,

¹⁶gom gwo gi uni kun c̱iki aman gura/ mo dhali imansor aman mo tani dhali e bwambor uni gun ta ’kup̱ mo dhali a’di jin ŋap̱a’d mmori/a ri’c mo.

¹⁷Aris to gwansan p̱u’dki’d ap̱o/ aman mo, ba aman ’konaki ŋa /e mo, walla aman ’konaki ta thus gom gwom pini jin gamu me’d mo.

¹⁸Adum bam ’koki doḵ ka nyaŋ’ko’d mo, walla ŋaṯgin bam ’koki dheres ’peni bway pini mo

¹⁹ki /e mini ’taki ’ce’d am mo ’peni mo jin ’kon ma jala/ nycine/ mo, dhali kum am ’kup̱ ki mondhurumi’d jin ’kula’kul mo.

²⁰Waḵki/ aman ŋakina gway ma Arumgimis bam mo tani, walla he’th me’d bam goma rum p̱inycon mo tani,

²¹min ma Arumgimis ’taki diki gam mii yansana? Haali/ a’di mishki to kun ’kona duŋ ’kwani ka ḵwal is mo.

²²Yisa, gom gway pini mo tani aman ’koshkunu yula tente/ mo, dhali aman dhukunu mo me’d ḵa’bal kun dhunu mmo’ciṯẖ ’kus mo be.

²³Muri is pini mo. Ata isha /e e kan mo, ayy Tap̱a? Meri /e e mo. Dhalku/ ki ṯa’k am asho ki sule/ sule/ mo.