GWAY GI IDAWUU’D 31:6-20

⁶/E shi/ki uni gwansan i e mo uni gun c̱ina hirdhe/ ki p̱e’th ki tomp̱inycon kun luŋu mo. Bahili aha/ gamkina gwo is e Tap̱a mo.

⁷Aha/ mina bwa ’kuny mo dhali ’bor mo gom mo/en pini jin ṯelu sho’k mo, haali/ /e hilki mom pem jin ṯocu aha/ bwa mo, dhali /e yip̱ki ’kup̱ mo goma ris uni kun ta ’kup̱ gi aha/ mo,

⁸dhali /e diki c̱i aha/ e me’d gi uni kun ta ’kup̱ gi aha/ mo. /E dhuki sho’k pem e mo ma ’cesh jin beeyabee mo.

⁹Miiyi mii ma ’the gom aha/ mo, ayy Tap̱a, haali/ aha/ dina e mo ma c̱is mo. Em pem shi/ki is mo gom jwakaṯ jin jwakaṯki’d mo, eya ḵashiram pem mo dhali buŋgwar is pem si’da/ mo.

¹⁰Haali/ mondiki/em pem ’baaru mo jasi ki mondiṯ bwa mo, dhali yil pem ki jasi mowuwa shure/ mo. Mom’bi’th pem ushki me’d mo gom mondim pem jin ’bushura/ ’bushur mo, dhala simam buŋgwar is pem tana ’kala/ ’kala/ mo.

¹¹Aha/ tana jin ṯẖunyu/ ’twa/ i is ka ris uni kun ta ’kup̱ ki aha/ mo, dhali aha/ shi/u i e ki uni gun nyaḵ ’ko ki aha/ mo, dhali aha/ tana to jin guna uni ki e mo ki moŋḵo/ is mo, unim pem kun mishi aha/ mo, dhali uni gwansan kun p̱arki aha/ e mo e bway tur mo tani uni ’cuḵki aha/ i ’kup̱ mo.

¹²Aha/ ŋakunu me’d jan ’de/ jin wuki’d mo. Dhali aha/ wakina e ki toŋ’kul bwa jin waki’d mo.

¹³Nye, aha/ ciḵkina ris ’kwani ’baar mo shilki gwalish mo mmo’dowa ŋur ŋur ’twaŋkal kuku/ mo, me’d jin ’tuntulkina uni isi monṯal ’de/ ap̱o/ aha/ mo, me’d jin wu’thkina uni awu’th mmobu’th mondiki/em pem mo.

¹⁴Hili aha/ gamkina gwo is e /e mo, ayy Tap̱a. Aha/ ona gwo mo ki: /E tana Arumgimis pem mo.

¹⁵Mom pem uni ’kon e me’d pini mo. ’Cuḵi aha/ mo ’peni me’d ma ris uni gun ta ’kup̱ ki aha/ mo dhali uni kun ṯo’cki aha/ bwa mo.

¹⁶Dhalki bwam/em pini a’di kushu mo mo e c̱iŋkinam pini mo. Tayi aha/ is ki me’d mo e mo/en pini jin ṯelu sho’k mo.

¹⁷Dhalku/ ki dhal aha/ mo mmodi ki mo ma ’the is mo, ayy Tap̱a mo, haali/ aha/ yuḵkina /e mo. Dhalki uni kun mii tonthus idhukunu ’te/ ki mo ma ’the is mo dhali dhalki uni ii ’ce us kan e mo ma Haawiya mo.

¹⁸Dhalka le’d kun tana ṯor tana ’diye/ mo, uni oki gwo sor ap̱o/ uniŋ ḵar/e mo e mo jin dhuna uni ’ba/ ki ca mo dhali mo ma bujur mo.

¹⁹Ayy mom’boro’d pini wa’di ish ka enthusa! A’di jin karkina /e gom uni gwansan kun ḵo/ki /e mo dhali wagas mo gom uni gwansan kun bu’thki mo jin huru jwa e /e mo, e jis/e gi iya/ gi ’kwani mo.

²⁰Dhali buŋ’kus pini mo tani a’di ibagki uni mo ’pena risa wu’th gi ’kwani mo. /E dhuki uni ki ’dantar e bwaŋ’kwariny ma darha’dam pini mo ’pena risa le’d jin biruwa bir mo.