3Aha/ yuḵkina Tap̱a mo, a’di jin haki me’d mo jin minu maŋ mo, dhali aha/ takunu is ki me’d mo ’pena ris unim pem kun ta ’kup̱ ki aha/ mo.
4Atomm gi mowu a’di ’tamkunu aha/ is mo, mii jin kar ’kus me’d yi’de/ ’peni mo jin daḵu/ gwo me’d mo a’di tiḵ aha/ e mo,
5dhali atomm ma Haawiya a’di koṯẖki aha/ is mo, dhali agume/ gi mowu a’di jemki aha/ ’kup̱ mo.
6E mo ma c̱is pem mo tani aha/ yuḵkina Tap̱a mo, eya Arumgimis pem mo tani aha/ gwokina ’twa/i a’di gom mowoṯẖ mo. ’Peni gu’b gi mondheleladhelel piti mo tani a’di ciḵki ’twam pem mo, dhali kom pem a’di jidhirki’d mo e bwany’cem piti mo.
7Dhali mony’cesh a’di yaki’d ka kul is mo dhali ṯu’k ’ban ki washar washar mo, dhali moŋḵa’b ma ris wosha turga/ si’da/ uni deekin ki bir bir mo, dhali yiḵinki is mo haali/ a’di shwaki’da nyor mo.
8Aku’d yaki’d ka pije/ ’peni shush piti mo dhali o’d jin midi kup̱a kup̱ ’peni ’twam piti mo, akap̱any o’d jin ḵakaca ḵaka’c gac̱ki’d ka pije/ ’peni a’di mo.
9A’di goŋki momis is mo dhali thulu/ ka ’cesh mo dhala raḵ jin ’ceṯẖki’da ’tum a’di di’d e bwaŋ’kwariny sho’k piti mo.
10A’di merki’da p̱owa man’doyu gwo mo dhali p̱e mo, a’di p̱u’dki’d ki ’ta’b ap̱owa bi gi ’tham mo.
11A’di karki mondhurumi’d mmota tom piti jin ’kamki a’di is mo, adarha’dam piti a’di ta’da raḵ jin ’ceṯẖki’da ’tum gom yi’de/ mo.
12’Peni moŋkush jin kushi mo kagahara e bwambori a’di mo tani to p̱u’dki’d ’pena raḵ piti mo jin ta’da wasa/ mo dhali akap̱any o’d mo.
13Dhali Tap̱a si’da/ a’di gwoki’da gur gur e momis mo dhali a’di jin Caa e ki Ca a’di bahki ’twam piti mo, awasa/ mo dhali akap̱any o’d mo.
14Dhali a’di shinki’da thop̱am piti mo dhali c̱e uni bwa mo dhali a’di ki dhi’th mo ka war mo dhali ṯi’k uni ’pen mo.
15Dhali bway tur e ḵumma/ yi’de/ mo tani uni ’kokunu mo mmomish mo, dhali moŋḵa’b gi mony’cesh uni mishkunu mo be, gom miiŋ ḵucur pini mo jin ḵucurkina /eya ḵucur mo, ayy Tap̱a, gom du’d gi shi/in ’peni shush pini mo.
16A’di jidhirki’d ’peni mo jin eḵa/ eḵ mo, dhali a’di bu’thki aha/ mo, a’di ki dir aha/ ka pije/ ’pena ris yi’de/ mo.
17A’di ki ’cuḵ aha/ mo ’peni a’di jin ta ’kup̱ ki aha/ jin ’bitha’bi’th mo, dhali ’peni uni gwansan kun shi/ki aha/ i e mo, haali/ uni ’kona isi ’bitha gom aha/ mo.
18Uni p̱u’dkina p̱o/ aha/ ka teem pem jin ta joḵ ki joḵ mo, hili Tap̱a a’di ta mohal pem mo,
19A’di ki buḵ aha/ ka pije/ e mo jin ḵwashara/ ḵwashar mo dhali a’di ’cuḵki aha/ mo, haali/ a’di ’borkina bwa ki ’bor ki aha/ mo.
20Tap̱a a’di c̱iki aha/ adum pem jin ish ḵumma/ mo me’d isi mii ma ḵar/em pem mo, dhali me’d isi mii jin dhelelkika/ me’d pem mo tani a’di raḵki aha/ to ibway mo.
21Haali/ aha/ dhukina bway gi Tap̱a mo dhali aha/ dinaki mii tonthus mmoper mo ’peni bway ma Arumgimis pem mo.
22Haali/ aris gwoŋḵan piti kun onu mo tani uni ’koni bwambori aha/ mo, dhali gwoŋḵan piti kun bahu mo tani aha/ dinaki dhu uni ’pen ka pije/ ’peni aha/ mo.
23Aha/ dara gi mii ’ba/ ibwambori a’di mo, dhali aha/ karkina is pem ’peni mo jin ’konu ki mii ’ba/ mo.
24Gom gwo gi wakan mo tani Tap̱a a’di iraḵki aha/ to ibway mo isi ki mii ma ḵar/em pem mo, dhali isi ki me’d pem jin dhelelkika/ mo e jis/em piti mo be.
25Gom uni kun ta ku isiŋ gana/ mo tani /e ki ṯor is pini jin tana /e a/isiŋ gana/ e uni mo, dhali ki wathi/ jin dar gi mii ’ba/ mo tani /e ki ṯor is pini jin dara /e ki mii ’ba/ e wathi/ mo.
26Dhali gom uni kun dhelelkin mo tani /e ki ṯor is pini jin dhelelkina /e e uni mo, dhali ki uni kun wanycarkina ii ki wanyjar mo tani /e ki ṯor is pini e uni ki c̱a’ckon mo.
27Haali/ /e ’cuḵki ’kwani kun dhu is ki gwa’d mo, hili uni kun dhu ’bam buni ki ca ki e ma waḵ mo tani /e mini thul uni ka ’cesh mo be.
28Nye, /e ḵanyki moŋkush ma lambam pem mo. Tap̱a Arumgimis pem a’di ’twaḵki mondhurumi’d pem ki moŋkush mo.
29Nye, ki /e mo tani aha/ misha sirica risa thuruḵ ma mee ki sho’k mo dhali ka Arumgimis pem mo tani aha/ mina mish nyalla/ ap̱o/ ’kup̱a gaŋgara/ mo.
30Arumgimis yansan mo tani bway piti ’boro’d ki ’bor gana/ mo. Dhali gwo jin ona Tap̱a is mo tani a’di nyo/ki gwoŋ gana/ mo. A’di ta’da goŋgoro/ goma ris uni gwansan kun bu’thki mo jin huru jwa e a’di mo be.
31Haali/ aja a’di ta’da Arumgimis mo? hili a’di jin ta Tap̱a mo. Dhali aja a’di ita wosh? isi ciki/ Arumgimis bana mo.
32Arumgimis jin deḵki aha/ ki mom’bi’th is mo, dhali kar bway pem ki ’dantar mo.
33A’di ki kar sho’k pem mmowa e ki sho’k ma buyymo mo, dhali a’di ki kar aha/ ki kar ’pempaŋ gana/ mo e mo jin turatur mo.
34A’di ṯorki me’d pem gwo mo gom mo ma mee mo, wakan ka bim pem mini mish gwana’da bwa me’da koroḵ mo.
35/E c̱iki aha/ agoŋgoro/ gi bway mowoṯẖ pini mo, dhali ki me’da bim poros pini mo tani /e thip̱ki aha/ mo, dhali ki mowoṯẖ pini mo tani a’di ki kar aha/ mmocaaca mo.
36/E ki c̱i aha/ mo jin waŋgala/ waŋgal gom ŋaṯgin pem kun dhuka/ e bwaŋ’kwariny pem mo, dhali sho’k pem diki yeres mo.
37Aha/ urkina ris uni kun ta ’kup̱ gi aha/ isho’k mo, dhali bu’th uni mo dhali aha/ dinaki doḵ ka nyaŋ’ko’d mo ntagi uni kup̱kunu mo be.
38Aha/ p̱uṯulkina uni i e mo, wakan ki uni molki cu mis mo. Uni ṯa’kkin e bwaŋ’kwariny sho’k pem mo.
39Haali/ /e deḵki aha/ ki mom’bith mo gom mo ma mee mo. /E ki dhu uni kun tiḵki aha/ e mo mmocic̱ ki jorom mo ibwaŋ’kwariny aha/ mo.
40/E ki dhu aris unim pem kun ta ’kup̱ ki aha/ mmoṯu’k aha/ ’ko’d buni i is mo dhali uni gwansan kun shi/ki aha/ i e mo tani aha/ ’ce’dkina uni sho’k mo be.
41Uni cuukin gom mowoṯẖ mo hili jaŋ kamu/ p̱iyi’d mmota uni is ki me’d mo. Uni cuukin ’twa/ e Tap̱a mo tani hili a’di diki thoḵ uni gwo mo be.
42Aha/ dorkina uni mmota agarisa/ ibwambori ’tham mo. Aha/ ṯa’kkina uni ka pije/ me’da je e bway tur kun iinu mo.
43/E ’cuḵki aha/ mo ’peni mo jin bira ’kwani abir mo, /E ki kar aha/ mmota a’kaŋ’kup̱ ki kal gi ’kwaniny’cesh mo. Ki ’kwani kun dika/ ki mish mo tani uni miiki aha/ to mo.
44Haali/ me’d jin ciḵkina uni gwo gom aha/ mo tani uni haki aha/ gwo e mo. ’Kwani kun wal ’twan tiya mo tani uni p̱u’dkin mo mmopar ki jiŋ ’kup̱a’dup̱un ’kup̱ ki aha/ mo.
45’Kwani kun wal ’twan tiya mo tani uni thiskin ma du e mo, dhali p̱u’du/ mo mmodee kagahara ’peni mo ma cur buni mo.