GWAY GI IDAWUU’D 119:45-80

⁴⁵Dhali aha/ mina ya ’baḵany gana/ mo haali/ aha/ ŋap̱kina gwoŋḵan gi ’twam pini mo.

⁴⁶Aha/ si’da/ mina o gwo gom gwonyc̱im pini ibwambori imaliḵ mo dhali aha/ minu ’koki kar ki mo ma ’the is mo

⁴⁷haali/ aha/ gamkina mom pem jin ’kunyka/ bwa mo e gwoŋḵan pini kun ’kwarkunu mo, a’di jin enka/ mo.

⁴⁸Aha/ taḵa gwoŋḵan pini kun ’kwarkunu mo, a’di jin enka/ mo, dhali aha/ mina kulum gwoŋḵan pini kun bahu mo eya du mo.

⁴⁹Kayi gwom pini e e c̱iŋkinam pini mo, e a’di jin karkina /e aha/ mmota ga ’teŋ kap̱e/ mo.

⁵⁰Yansan ta momalas pem mo e monṯo’c bwa mo ki gwom pini jin ona /e is c̱i aha/ mondiki/e mo.

⁵¹’Kwani kun dar gi mii ma gayiin mo tani uni p̱e’th aha/ ki p̱etha sor mo, hili aha/ dinaki ṯu’k mo ’peni gwoŋḵan pini jin c̱inu mo.

⁵²Ki aha/ kulumkina gwoŋḵan pini kun onu mo ibwa mo ’peni kadhamo/ mo tani aha/ bu’thkina momalas mo, ayy Tap̱a.

⁵³Anyor jin deḵu jin ’batha’ba’th mo tani bu’thki aha/ mo gom ’kwani kun ta thus ki thus mo, uni kun dhalki gwoŋḵan pini jin c̱inu ’pen mo.

⁵⁴Gwoŋḵan pini kun bahu mo tani uni warkin ki gway pem jin yuḵka/ mo e gu’b pem gi moyam pem jin yaka/ luŋ mo be.

⁵⁵Aha/ kakina gway pini e mon’thiny mo, ayy Tap̱a, dhali dhu gwoŋḵan pini jin c̱inu mo.

⁵⁶Mom’bor mii yansan a’di biṯki’da p̱o/ aha/ mo ki aha/ dhukina gwoŋḵan gi ’twam pini mo.

⁵⁷Tap̱a a’di ita tom pem jin ’tuntulka/ bwa ime’d mo. Aha/ ona gwo is mmodhu gwom pini mo.

⁵⁸Aha/ ’thona mii ma ’them pini ka dum pemi ’baar mo. Miiyi mii ka ’the gom aha/ isi gi gwom pini jin ona /e is mo.

⁵⁹Ki aha/ kulumkina gwo ibwa gom bway pini mo tani aha/ woṯẖkina sho’k pem ’ba/ e gwonyc̱im pini mo.

⁶⁰Aha/ hurkina ki ’ta’b mo dhali diki ta adiiṯe/ mo mmodhu gwoŋḵan pini kun ’kwarkunu mo.

⁶¹Ba anyoḵ gi ’kwani kun ta thus ki thus mo tani uni bu’thki aha/ ka gume/ mo dhali aha/ dinaki this gwoŋḵan pini jin c̱inu e mo.

⁶²E mombwam/e mo tani aha/ cukina mis mmomaŋ /e mo, haali/ gom mii ma ḵar/em pini gi gwoŋḵan pini kun onu mo.

⁶³Aha/ nyaḵkina ya ka ris uni gwansan kun ḵo/ki /e mo, uni gwansan kun dhuki gwoŋḵan gi ’twam pini mo.

⁶⁴Mony’cesh, ayy Tap̱a, a’di ’tu’dkunu mo ki mo/en pini jin ṯelu sho’k mo. Ṯori aha/ gwoŋḵan pini kun bahu mo.

⁶⁵/E ṯu/ulkina ṯu/ul ki ’bore/ gom c̱iŋkinam pini mo, ayy Tap̱a, isi ki gwom pini mo.

⁶⁶Ṯori aha/ gwo isi ki ṯor gana/ mo mmonyiṯẖ to mo dhali moyuḵ mo, haali/ aha/ gamkina gwo is e gwoŋḵan pini kun ’kwarkunu mo.

⁶⁷Nṯwa/a/ ki aha/ wo’ckunu is she/ mo tani aha/ yakina yam per mo, hili shwane/ aha/ dhukina gwom pini mo.

⁶⁸/E ’bora’bor mo dhali mii mii kun ’bora’bor mo. Ṯori aha/ gwoŋḵan pini kun bahu mo.

⁶⁹’Kwani kun ushina ga/ ga/ mo tani uni ’thoḵki aha/ ka ṯor mo, hili ka dum pemi ’baar mo aha/ dhukina gwoŋḵan gi ’twam pini mo.

⁷⁰Adum buni momaṯa/ momaṯ me’d ḵwalany mo, hili aha/ ’kunykina bwa mo e gwoŋḵan pini jin c̱inu mo.

⁷¹A’di ’boro’d gom aha/ ki aha/ jwakaṯkunuwa du mo ki aha/ mina da/ar gwoŋḵan pini kun bahu mo.

⁷²Gwoŋḵan jin c̱inu ki ’twam pini mo tani a’di ’boro’d gom aha/ mo, mmobol ’dolkon gana/ ma alip̱ e mo dhali ’ku’kus ’dolkon kush mo.

⁷³Me’d pini a’di uḵki’da uḵ mo dhali /e c̱iki aha/ jamas mo. C̱iyi aha/ mo jin mishu gwo ’ban mo ki aha/ mina da/ar gwoŋḵan pini kun ’kwarkunu mo.

⁷⁴Uni gwansan kun ḵo/ki /e mo tani mini p̱ar aha/ e mo dhali ’kuny bwa mo haali/ aha/ tana gi mo ma ’teŋ kap̱e/ e gwom pini mo.

⁷⁵Aha/ misha, ayy Tap̱a, ki gwon dwall pini kun toru gwon dwall ’twa/a ’cesh mo tani uni tana ḵar/e mo dhali /e dorki aha/ ki isa nyor ki mii ma isiŋ ganam pini mo.

⁷⁶Dhalki mo/en pini jin ṯelu sho’k mo thoson is mo mmomalas aha/ mo isi ki gwom pini jin ona /e is gom c̱iŋkinam pini mo.

⁷⁷Dhalki momiimiim pini p̱u’du’d e aha/ mo ki aha/ mina di ki e mo, haali/ gwoŋḵan pini jin c̱inu mo tani a’di ta jim pem jin ’kunyka/ bwa mo.

⁷⁸Dhalki uni kun ushina ga/ ga/ mo tani idhunu ki mo ma ’the is mo haali/ uni ceshki aha/ ki gwo ma maḵ mo. Gom aha/ mo tani aha/ mina kulum gwo ibwa gom gwoŋḵan gi ’twam pini mo.

⁷⁹Dhalki uni gwansan kun ḵo/ /e mo tani ṯu’kkina bor ki aha/ mo, ki uni mini mish gwonyc̱im pini mo.

⁸⁰Dhalka dum pem a’di dar gi mii ’ba/ e gwoŋḵan pini kun bahu mo ki aha/ minu ’koki kar ki mo ma ’the is mo.