Pisalem 119:45-80

⁴⁵Au ga heehee moholo mai gi di au, idimaa au e hagamahi e daudali au agoago.

⁴⁶Au ga hagadele au helekai gi nia king, au hagalee langaadia.

⁴⁷Dogu madagoaa ma ga hagagila aga au helekai, gei au e tenetene, idimaa au e haga dahidaamee nia maa.

⁴⁸Au e hagalaamua ge e haga dahidaamee au haganoho. Au ga hagabaubau au helekai aago.

⁴⁹Gi langahia e goe dau hagababa dela ne hai mai gi di au, go dau dangada hai hegau, ma guu hai au gi hagadagadagagee huoloo.

⁵⁰Dogu noho i lodo ogu hagammaemmae, au gu manawa lamalia hua, idimaa dau hagababa la gu benebene dogu mouli.

⁵¹Digau hagamuamua le e hagabalumee au, gei au digi huli gi daha mo au haganoho.

⁵²Meenei Dimaadua, au e langahia eau au haganoho ala i mua loo. Malaa, aalaa nia mee e haga manawa lamalia au.

⁵³Au e hagawelewele huoloo ma gaa mmada gi digau huaidu ma gaa oho au haganoho.

⁵⁴Au helekai la aalaa agu mee e dadaahili i dogu mouli bodobodo i hongo henuailala nei.

⁵⁵Meenei Dimaadua, ma gaa boo gei au e langahia Goe, mo di maanadu di hai o au haganoho.

⁵⁶Au e gida dogu tenetene mai i dogu daudali au haganoho.

⁵⁷Meenei Dimaadua, ma deelaa hua Kooe dela e hiihai ginai au. Au gu hagababa bolo au e hagalongo gi au haganoho.

⁵⁸Au e madau adu gi di Goe mai i lodo dogu manawa hagatau bolo Goe gi dumaalia mai gi di au, gii hai be dau hagababa dela ne hai.

⁵⁹Au gu daamada gu hagabaubau dagu hai dela e mouli iei au, gei au gu hagababa bolo au ga daudali au helekai aago.

⁶⁰Au hagalee hagaduai, au ga hagalimalima ga daudali au helekai.

⁶¹Digau huaidu guu dugu di nadau hele belee hele au, gei au hagalee de langahia au haganoho.

⁶²I di madahidi waelua di boo, gei au e ala aga e hagaamu Goe, idimaa Goe dela e gabunga au mee gii donu.

⁶³Au di hoo ni digau huogodoo ala e hai hegau adu gi di Goe, go digau huogodoo ala e hagalongo ge e daudali au haganoho.

⁶⁴Meenei Dimaadua, henuailala e honu i do aloho dee modu, aago ina au gi au haganoho.

⁶⁵Meenei Dimaadua, Goe gu hagagila aga dau hagababa, gei Goe e humalia mai gi di au, go dau dangada hai hegau.

⁶⁶Gaamai gi di au di iloo nia mee mo di kabemee, idimaa au e hagadonu au helekai.

⁶⁷I mua dau hagaduadua au, gei au nogo hai agu mee hala, gei dolomeenei gei au gu daudali au helekai.

⁶⁸Goe e humalia, gei e hai au mee humalia! Aago ina au gi au helekai.

⁶⁹Digau hagamuamua guu hai nadau helekai tilikai i di au, gei au e daudali hua au helekai mai i lodo dogu manawa hagatau.

⁷⁰Digaula nadau iloo ai, gei au haganoho la aalaa nia mee e haga manawa lamalia au.

⁷¹Ogu dadaaligi le e humalia mai gi di au, idimaa nia maa e hai au gii kabe au helekai.

⁷²Au haganoho ala ne gaamai gi di au la koia e hagalabagau ko au laa hongo nia bahihadu huogodoo o henuailala.

⁷³Goe dela ne hai au, gei Goe dela e benebene au haga humalia. Gaamai gi di au di kabemee, gi iloo eau au haganoho.

⁷⁴Digau ala e hagalaamua Goe la ga manawa lamalia ma ga mmada mai gi di au, idimaa au dela e hagadonu au hagababa.

⁷⁵Meenei Dimaadua, au e iloo bolo Goe e hagi aga au mee gi di ala dela e donu, gei Goe dela ne daaligi au idimaa goe dela e manawa dahi.

⁷⁶Heia do aloho waalooloo gi haga manawa lamalia ina au, gii hai be dau hagababa dela ne hai mai gi di au, go dau dangada hai hegau.

⁷⁷Goe gi manawa dumaalia mai gi di au, gei au ga mouli, idimaa au haganoho la aalaa nia mee e haga manawa lamalia au.

⁷⁸Heia digau ala e hagamuamua la gi langaadia, idimaa digaula e hai baahi mai gi di au, gei au, au ga mamaanadu hua au helekai aago.

⁷⁹Heia digau ala e hagalaamua Goe la gi lloomoi gi di au, aalaa go digau huogodoo ala e iloo ginaadou au helekai.

⁸⁰Heia au gii dohu di daudali au haganoho gi de langaadia au i dogu magedaa.