1Kata Jacob tamana Canaan tanonai memena i mamana wai, Jacob yebo namai i mana.
2Ba nikona wai Jacob ba ana rakaraka asi rurutuwa. Joseph wai sebare yarakina kana bodu 17. Ba tuwatuwana, tamana kaokaowana Bilha ba Zilpa natunatusi yabata, aba payapaya si potapota, ba wose goyogoyosi si wosewose wai i nenae tamasi i bi mamatarei.
3Jacob wai, Joseph i nuwayauyauna sakiyei kega bage natunatuna mutusi, kairavina kona wai i morapa ba i tuwei. Kana gara rubisarusaruna veoromina ba ere yarona i wose.
4Ba tuwatuwana si kitai kata tamasi wai, Joseph i nuwayuyauni wai si bomapumapuwei ba kega si bisisiya kabitam kurina.
5Mara kesana Joseph i bomeumeu ba tuwatuwana i wonisi wai si yagisi saburere ba si subi sinikikiyei.
6Kurisi i wona, “Niko au bomeumeu ko nonori.
7Kota waere yai kwapu kamonai wheat keyamisi ta gedogedowa, ba au wheat gedowina i msiri totorina, ba ami gedowa si subibiri ba kurina si rudune.”
8Ba tuwatuwana kurina si wona, “Kom ke nosinosi kuni taupauma ba kuni badikai?” Damanina ba ana meumeu ba sisiya kairavina, yagisi i su bobunuisi ba nakata naki kurina si yagisi.
12Mara kesana Joseph tuwatuwana si nae ku Shechem, tamasi ana aba payapaya namai si potapotaisi ba sita kam.
13Ba Jacob, Joseph i wonei, “Au waina kuna nae ku Shechem tuwatuwam aba payapaya te potapotaisi wai kurisi.” Joseph i kaobeyei, “I gaire saki.”
14Kata tamana i wona, “Ke nae tuwatuwam, aba payapaya yabata kuna kinanisi, kata kosi damanina kona kega ba kuna veramaga kuni waraberiku.” Damanina ba Hebron kawa sanaginai wata i pora taveyei i nae, ba i verakasibau ku Shechem wai,
15sebare kesana Joseph waere yai i bubuwa neubuwa wai i panani ba, i toirubai, “Kom awaika ke nuwenuweni?”
16Ba i kaobeyei, “Tuwatuwaku a nuwenuwenisi, kuta woniku memena asi aba payapaya te potapotaisi?”
17Ba sebarena i wona, “Kosi wai a nonorisi si wona kata si nenae ku Dothan.” Kata Joseph i kibisi i nae Dothan gwabinai i pananisi.
18Saba kosi rabarabai naki i botubotu si kinani, ba muri yai ita verakasibau kurisi wai, si tarapiri kata sita kasibunui.
19Kosi si kaoboneyana, si wona, “Nao meumeu biyina nina, e botu wai.
20Ko botu, tana kasibunui ba ku dogu tani garu kirei. Ba tana wona kata garagara aba payapayaya, bikokonina i kuta bunui ba mede ana meumeu basuna tana kitai.”
21Reuben nikona i nonori wai kega i nuwagaire ba ana waina iti baisi wai i wona, “Kega tana kasibunui.
22Kega tara tana bobisoroi. Ba nina kupura momnai ku dogu tani garu kirei. Ba kega kona kasibigoyoni.” Reuben nikona i sisiyei kata muri yai bibuni yai ita botu Joseph ita taina geyei ba ita urabai ita veramaga tamana kurina.
23Kata Joseph i verakasibau tuwatuwana kurisi wai si botawani ba kana gara nuwarubarubana si sika taveyei,
24ba si yauni ku dogu gasarina mena, si garu kirei.
25Ba si makira sita kam ba si tarakata wai, Ishmael biyisi Gilead yai si botubotu wai si kinanisi. Asi camel wai spice, balm ba myrrh, si bonuvisi ba si kabara si gaigakira ku Egypt.
26Damanina Judah tuwatuwana ba teiteina i wonisi, “Teita tana kasibunui ba tarana ba ata goyona tani buneyei wai awaika gairena kurita ina tupuwa.
27Ko botu, Ishmael biyisi kurisi tani gimonei, ba kega goyona kurina tana wosei, kota mom ata tara.” Ba tuwateiteina si damanina.
28Kata Midian bigimona biyisi si botu, wai teisi Joseph dogu ai si taina geyei, ba si gimonei wai silver asi 20 rubana si yauni, ba Ishmael biyisi si yauni si nae ku Egypt.
29Maranai Reuben i veramaga ba dogu i kinani ba Joseph kega nai wai, i nuwapoya saki kana gara i taina sikeyana.
30I veramaga teiteina kurisi ba i wona, “Teitaikei kega nai. Ageee! Kata awaika ana wosei?”
31Joseph kana gara si yauni ba goat si kasibunui wai taranai si pakipaki.
32Ba kana gara nuwarubarubana si yauni si nae tamasi kurina, ba si wona, “Ke kinani, nikona ka panani, ke kitai kata niko natum kana gara kona?”
33I kita taveyei, ba i wona, “Aeee, kona mom kana gara! Natuku Joseph garagara aba payapaya bikokonina i sika bigarugarui!”
34Jacob kana gara i rusika, ba kao pesarisi i keno karawaga.
35Natunatuna ereonowasi sebasebare ba bibaine, si botu bimorumorubina kairavina saba kona kega ana waina siti morumorubi wai i wona, “Kega! Ana kenokeno karawaga yepo ana gakira ku dogu natuku kurina.” Damanina ba natuna kairavina i tou.
