1Bodu ruwamo si kakaba murinai, Pharaoh i bomeumeu kata, Nile okowina parinai i bimsiri.
2Ba Nile okowina kamonai cow asi 7, budobudosi ba sinisi gaigairesi si gae ba sinamona okowa parinai si kamkam.
3Ba murisi yai yebo cow asi 7 kinanisi goyosi mom ba togetogesi Nile okowinai si gae, ba cow budobudosi parisi yai si msiri.
4Ba nakosi cow togetogesi ba goyosi mom, si bomsiri wai cow budobudosi ba kinanisi gaigairesi asi 7 si kam roboisi. Ba niko meumeu kamonai Pharaoh i utu sikwana.
5Ba i kenouwapa ba, i bomeumeu mena wai i kinana kata, pegapega keyamina kesana ba gayamina asi 7 gaigairesi ba nuwarubarubasi si rutiti.
6Murisi yai yebo pegapega kesana gayamina asi 7 i gae, saba kega i uwa kabitam ba kao ba sibe si kara bisivisivisi.
7Ba pegapega kara bisivisivisi si bomsiri wai pegapega gaigairesi asi 7 si tonanisi. Damanina ba Pharaoh i kenomataka ba i nota momei kata kona wai i bomeumeu.
8Mara i tom wai nuwanuwana i kairagaraga wai, kaikairapusi ba nuwanuwasuyisi ereonowasi Egypt kamonai asi wara i porapora wai si botu ba ana meumeu i wonisi. Saba kega kesana kotoi rubana basusi ita wonei.
9Damanina wine aba potapotana Pharaoh kurina i wona, “Karaku mosi au goyona a nota panani.
10Siri kesana kui yagisi yauku ba am bread kapukapuna pipiyina kurikai, ba ku patuma yovena ku terikai Potipar ana yove yai.
11Pom kesana bread kapukapuna pipiyina ba yauku, ka bomeumeu wai ama meumeu basusi wai, bubausi yai.
12Ba Hebrew sebare yarakina, Potipar ana saibisaibirina yabata patuma yovenai ka mamana. Ba kesakesasike ama meumeu ka wonei wai basusi i wonikai.
13Ba mekabage i wonikai wai, nanakasike i tupuwa, kata yauku au ku saibira ku tere meyiku, ba bread kapukapuna pipiyina kamyona, ku kasiyaragi ba si kau birorokei.”
14Pharaoh wara i porai Joseph kurina wai, yagiyagina wata patuma yovenai si urabai si botu. Ba uyawina ba kana mutukoro si tomni, ba si gara rutaveyei ba i botu Pharaoh kurina.
15Damanina ba Pharaoh, Joseph kurina i wona, “A bomeumeu wai kega kesana kotoi basuna i woniku. Ba si woniku kata kom pipiya te bomeumeu wai basusi ke wonewonisi.”
16Joseph i kaobeyei i wona, “Yauku ikesiku kega rubarubana, saba God ana wainai basuna ina berim.”
25Damanina ba Joseph, Pharaoh kurina i wona, “Am meumeu ruwamo ba basusi wai kesana. God karaku wata awaika ina wosei wai e bimamatara damanim.
26Nakosi cow gaigairesi asi 7, ba pegapega gayamisi gaigairesi asi 7 wai, bodu 7 e bigubei, kosi wai meumeusi basusi kesanina.
27Nakosi cow asi 7 togetogesi, ba kinanisi goyosi mom okowai si gae, ba pegapega gayamisi asi 7, kao ba maramatana sibena i rara bisivisivisi wai, kona gomara bodu 7 kamonai e bigubei.
28Nikona awonim wai nanakasike. God awaika muri yai ina wosei wai i beyim.
29Bodu 7 kamonai Egypt kupurinai mariya ina kamsewasewai,
30ba bodu 7 murinai gomara kaikapona ina botu wai, nao mariya nuwanuwasi ina wapa kairavina gomara kupura ina kasibigoyoni.
31Ba mariya kupurinai nuwanuwasi ina wapa kairavina gomara muri yai ina botu wai, ina goyo saki.
32Nikosi meumeu ruwamo Pharaoh i berei wai basuna God ana nota tupana i terei kata ina tupuwa ba mara yoginaikei ina wosei ina tupuwa.
33Kona kairavina Pharaoh pipiya kuikuirina, ba notanotana ina nuveni, ba ina terei Egypt kupurina tupana ina koyagi.
34Pharaoh yebo babada ina bineisi kata bodu gaigairesi 7, mariya maranai kam ereonowana Egypt kamonai sina yauna, ba sina keyauwari riba 5, ba sini gaeni.
35Ba nikosi bodu gaigairesi te botubotu wai, kamonai kam sini utubitaura ba, sini gaena, ba meyaga kaikaposi yai sina taura sirana, ba sina pota kabitamni.
36Nikasike sina wosei wai, kata muri yai bodu 7 kamonai gomara ina botu ku Egypt wai, kam rubarubana pipiya sina kam, kega wai gomara kupura ini goyoni.”
37Niko nota Pharaoh ana babada yabata si nonori wai i gaire saki.
38Kata Pharaoh, babadisi i toirubaisi, “Memena sebare nikasike, God ana Kanuma, kamonai e mamana wai tana panani?”
39Damanina ba, Pharaoh, Joseph kurina i wona, “Gubanai nikosi meumeu wai God kom i beyim, ba kega kesana kotoi kuikuirina kona notanotana bage kom rutainim.
40Kom au bitaupauma yovena kuni badei, ba au pipiya ereonowasi kom wata am sisiya sina nonori ba sina bosisiri. Kom am bibadana wai yauku wata gaburiku ai, kairavina yauku wai taupauma.”
41Ba Pharaoh, Joseph kurina i wona, “Karaku nina a binebineim kata Egypt kupurina ereonowana kuni badei.”
42Damanina ba, Pharaoh kana ring ere kana matakira yaronai i botaveyei ba Joseph yaro rakorakonai i terei, ba kaiwabo kasi gara i kotei ba posaru gold yai si wosei wai kamyonai i rorokei.
45Ba Pharaoh, Joseph kana waba i binei Zaphenat-Panea, ba meyaga kana waba On kana priest, Potiphera, natuna wasike kana waba Asenat i berei kaowana. Damanina ba Joseph, Egypt kupurina ereonowana i badei.
46Joseph kana bodu 30 ba, ana bagibagi Pharaoh gwabinai i dagui. Ba Joseph, Pharaoh i kasibau taveyei ba Egypt kupurina tupana i nanaga roboi.
47Bodu gaigairesi 7 kamonai wai, kupura i mariya saki.
48Kosi bodusi kamosi yai, Joseph kam ereonowana Egypt kamonai si bao wai i utubitaura, ba meyaga kaikaposi kwapu parisi yai i gaena bunaga.
49Joseph grain i gegaena wai si rakata saki, nanakasike bage sega tore yai rutainina wai, baiyavina i boterei kairavina si pesara saki wai, kega rubana ita baiyavi.
53Ba bodu marimariyisi asi 7, Egypt kamonai si botu ku damona,
54ba gomara bodusi asi 7 i dagui, mekabage Joseph i wona wai, nanakasike i tupuwa. Kupura ereonowana si gomara ba Egypt kamonai wata kam i mamana.
55Egypt kupurinai kam masawai si kakaba, ba pipiya damina si yuyauni wai taupauma kurina kam kairavina si borasa, wai i poraisi Joseph kurina ba i wona, “Mekabage ina wonimi wai, ko wosei.”
56Maranai gomara kupura tupana i yauna roboi wai, Joseph grain i gegaena wai yovesi i botavetaveyana, ba Egypt biyisi kurisi i gimogimona, kairavina gomara Egypt kupurinai i goyo saki.
57Pipiya kupura ereonowanai si botubotu ku Egypt ba Joseph karinai kam si gimogimona. Basuna gomara wai dobu ereonowanai i goyo saki.
