Exodus 12:3-8

³Keǥiyi niw is tivuuk he keet-etawan te Israel he ziyà te ikesepulù he andew kayi he vulan kinahanglan he megkuwa is kada pemilya te nati he kerehidu etawa kambing para te pemilya zin.

⁴Ne emun egkeerangan te senge pemilya he kenè dan egkaamin te egkaan is sengetiman he kerehidu, mebpetelewizè dan dutun te avey zin. Edtelazen dan heini sumalà te kezakel zan wey sumalà te egkekaan te kada etew.

⁵Iyan niw pilia is menge meemahan he uyaǥen niw he senge-tuig pa is keǥurang din wey wazè din sazir, egkehimu ke kerehidu, ne egkehimu zaan emun kambing.

⁶Elimahi niw haazà taman te ike-14 he andew kayi he vulan, su sikiyu is tivuuk he keet-etawan te Israel, edlepaan niw haazà dutun he timpu emun ebpengirum-irum en.

⁷Ne kuwa kew te lengesa kayi ne izazas niw haazà diyà te ǥawas he ziyà te pesikilizà te marku te gemawan wey egkezivavew te marku zutun te ǥemawan te menge valey niw he zutun niw egkeena is edlepaan niw.

⁸Dutun he kezukileman, egkeenen niw is usa he tinuug duma te memepait he utanen wey supas he wazè din tapey.