1Zĩ pìian kína Asueru Yudanↄ zãnguri Amana bɛ kpà a nanↄ Ɛsitaa. Ɛsita pì kínanɛ Mↄdekaimɛ a danɛ ũ, akũ Mↄdekai nà kínai.
2Kína a tãnka kũ à sì Amanaa bò à dà Mↄdekainɛ, akũ Ɛsita Amana bɛ nànɛ a ↄĩ.
3Ɛsita ɛ̀ra à gɛ̀ɛ yã o kínanɛ dↄ. À wùtɛ a gbá arɛ àtɛn wɛ́tɛ̃ kↄ́tɛ, à kútɛ kɛ̀nɛ de à yã vãni kũ Agaga buri Amana a lɛ́ kpàkũsũ Yudanↄii gboro.
4Kína wura gò dↄ̀a, akũ à fùtɛ à zɛ̀ a arɛ
5à pì: Tó ma yã kàngu akũsↄ̃ ma n pↄnna lè, tó yã díkĩna zɛ́ vĩ akũsↄ̃ ma yã kànnɛ, zaakũ Amɛdata nɛ́ Amana, Agaga buri zɛ̀o à Yuda kũ ò kú n bùsu gũnnↄ dɛdɛ ń pínki, ǹ o n takadakɛ̃rinↄnɛ ò takada kɛ̃ ò Amana yã pì litɛ kpɛdangara.
6Mani kɛ deran mà kisira kũ ani su ma gbɛ̃nↄ le gwaa? Mani kɛ dera mà wɛ́ kɛ pla kũ ma burinↄ dɛdɛnaaoo?
7Akũ kína Asueru pì a nanↄ Ɛsitanɛ kũ Mↄdekaio: À gwa, ma Amana bɛ kpà Ɛsitaa, akũ ma Amana pìi lòko lía kũ à yã vãni kpàkũsũ Yudanↄi yãi.
8À takada kɛ̃ Yudanↄ yã musu lákũ à kɛ̀árɛ mana nà. À kɛ̃ kũ ma tↄ́o à ma tãnka sèeda kɛa, zaakũ takada kũ ò kɛ̃̀ kũ ma tↄ́o ò ma tãnka sèedaa kɛ̀a litɛna vĩro.
9Gwe gↄ̃̀nↄ ò kína takadakɛ̃rinↄ sìsi. Mↄ aakↄ̃de Sivã gↄrↄ baro awɛɛ'aakↄ̃de zĩn ò yã kũ Mↄdekai dìtɛ Yudanↄnɛ kũ kína ìbanↄ kũ kínanↄ kũ bùsu gbãnadenↄo kɛ̃̀ pínki bùsu mɛ̀n basuddo awɛɛsupplanↄnɛ sɛna zaa India bùsun ari à gɛ̀ɛ pɛ́ Etiopia bùsuua. Ò takada kɛ̃̀ bùsu kũ bùsuuo kũ ń takadakɛ̃na burio, buri kũ burio kũ ń yão. Ò takada kɛ̃̀ Yudanↄnɛ kũ ń takadakɛ̃na takao kũ ń buriyão dↄ.
10Mↄdekai takada kɛ̃̀ kũ kína Asueru tↄ́o à kína tãnka sèedaa kɛ̀a à takada pìnↄ nà zĩ̀rinↄnɛ ń ↄĩ, akũ ò dì sↄ̃ bàalɛri kũ ò bò kína sↄ̃yĩkianↄa ò gɛ̀ɛo.
11Yã kũ kína dìtɛ pì Yuda kũ ò kú wɛ̃tɛ kũ wɛ̃tɛonↄ gbà zɛ́ ò kↄ̃ kakara ò gí kũ ń zĩdao. Tó buri ke bùsu zĩ̀kari ke lɛ̀tɛḿma kũ ń nɛ́nↄ kũ ń nↄgbɛ̃nↄ, ò ń dɛdɛ ò láka kũńwo ò ń mì dɛ ò ń pↄ́nↄ sɛ́tɛ.
12À ń gbá zɛ́ ò abire kɛ kína Asueru bùsunↄ gũn pínki mↄ kuri awɛɛplade Ada gↄrↄ kuri awɛɛ'aakↄ̃de zĩn.
13Ò yã kũ à dìtɛ pì takada kpã̀zã bùsu kũ bùsuuo pínki doka ũ. Ò a kpàkpaa kɛ̀ buri sĩnda pínkinɛ de Yudanↄ gↄ̃ kú soru gũn ò yã yía ń ibɛrɛnↄa zĩ birea.
14Kína yãditɛna pì yãin zĩ̀rii pìnↄ kɛ̀ likalika dina kína sↄ̃ bàalɛrinↄa ò gɛ̀ɛ. Akũsↄ̃ ò yã pìi kpàkpaa kɛ̀ Susa wɛ́ran.
15Mↄdekai bò kínabɛa à kíkɛ pↄ́ pura kũ pↄ́ búguo dana, à kífura zↄ̃kↄ̃ kũ ò pì kũ wuraao kuna. À táaru biza arukĩmba tɛ̃ra dana dↄ, akũ Susadenↄ ayuwii kɛ̀ kũ pↄnnao.
16Gu pù Yudanↄnɛ zĩ birea, òtɛn pↄnna kɛ kũ yáa dↄo, zaakũ ò ń gbá gbãna.
17Bùsu kũ bùsuuo wɛ̃tɛ kũ wɛ̃tɛo, gu kũ kína yã ditɛnaa pìi kàn pínki Yudanↄ pↄnna kɛ̀ kũ yáa dↄo ò dikpɛ kɛ̀ kũ pↄ́blegbɛ̃naao. Buri pãndenↄ gↄ̃̀ Yudanↄ ũ dasi, kũ vĩna ń kũ Yudanↄ yã musu yãi.
