Esɑi 11:2-13

²Gusunɔn Hunde u ko n dɑ n wɑ̃ɑ kɑ wi. Hunde wi, u koo nùn bwisi kɑ dɑm kɛ̃ u kɑ win tɔmbu kpɑrɑ, kpɑ u Gusunɔn kĩru ɡiɑ u nùn nɑsiɑ.

³U koo nùn mɛm nɔɔwɑwɑ kɑ kĩru. Mɛyɑ u ǹ tɔnu sirimɔ kɑ sɛndɑru, ǹ kun mɛ, bɑ nɛɛn sɔ̃.

⁴U koo sɑ̃ɑrobu siriɑwɑ dee dee, kpɑ u bwɛ̃ɛbwɛ̃ɛbu ben ɡem wɛ̃. Win ɡɑri yi ko n sɑ̃ɑwɑ nɡe bokuru te u koo kɑ tɔmbu sɛɛyɑsiɑ, kpɑ yi n sɑ̃ɑ nɡe tɑkobi ye yɑ koo tɔn kɔ̃sobu ɡo.

⁵Win ɡem kɑ win bɔrɔkinirɑ ko n sɑ̃ɑwɑ nɡe kpɑkɑ ye u sɛ̃ke pɔrɑɔ u n kɑ win tɔmbu kpɑrɑmɔ.

⁶Yɛɛ ɡɔbi kɑ yɑ̃ɑnu nu ko n wɑ̃ɑ yɑm tem, kpɑ ɡbeeku musukunu kɑ boo binu nu kpunɑ sɑnnu. Mɛyɑ mɑɑ ɡbee sunɔ binu kɑ kɛtɛ binu nu ko n wɑ̃ɑ sɑnnu, kpɑ bii piibu u nu kpɑrɑ.

⁷Kɛtɛbɑ kɑ ɡbeeku bɔ̃nu nu koo di sɑnnu, kpɑ nin binu nu n wɑ̃ɑ yɑm tem. Gbee sinɑnsu su koo yɑkɑsu di nɡe nɛɛ.

⁸Bibu bɑ koo kpĩ bu kɑ surɔkɔnu dwee, kpɑ bu ben nɔmu kpɛ̃ɛ wɑɑ ɡɔsɔnun wɔrusɔ.

⁹Bɑɑwure u ko n Yinni Gusunɔn yɛ̃ru yibɑwɑ nɡe mɛ nim wɔ̃ku ɡɑ nim yibɑ. Yen sɔ̃nɑ be bɑ koo dɑ bu Yinni Gusunɔ sɑ̃ win ɡuurɔ te u tii ɡɔsiɑ Yerusɑlɛmuɔ, ben ɡoo kun win winsim kɔ̃sɑ kuɑmmɛ.

¹⁰Sɑɑ ye sɔɔ, ɡoo u koo yɑri Isɑin bweserun di nɡe dɑ̃ɑ kpii pɔturɑ, kpɑ u n sɑ̃ɑ nɡe ɡidi bɔrɑ bwesenu kpuron sɔ̃. Bwese ni, nu koo ɡɔsirɑmɑ win mi. Kpɑ win wɑ̃ɑ yeru tɑ n Gusunɔn yiiko sɔ̃ɔsi.

¹¹Sɑɑ ye sɔɔ, Yinni Gusunɔ u koo mɑɑ win dɑm sɔ̃ɔsi u kɑ win tɔn be bɑ tie yɑkiɑ be bɑ yɑrinɛ bɑ wɑ̃ɑ Asiriɔ kɑ Eɡibitiɔ kɑ Pɑturɔsiɔ kɑ Etiopiɔ kɑ Elɑmuɔ kɑ Bɑbiloniɔ kɑ Hɑmɑtiɔ Sirin temɔ, kɑ sere be bɑ wɑ̃ɑ nim wɔ̃kun ɡoonɔ.

¹²U koo ɡidi bɔrɑ ɡirɑ u kɑ sɔ̃ɔsi mɑ u koo Isirelibɑ mɛnnɑ be bɑ rɑɑ yoru mwɛɛrɑ, kpɑ u Yudɑ be bɑ rɑɑ yɑrinɛ hɑnduniɑn ɡoonu nnɛ sɔɔ mɛnnɑ.

¹³Efɑrɑimubɑ bɑ ǹ mɑɑ kɑ Yudɑbɑ nisinu mɔ̀. Yudɑbɑ bɑ ǹ mɑɑ kɑ Efɑrɑimubɑ yibɛrɛ tɛɛru mɔ̀.