Dad Fngewe 8:21-35

²¹Na i dad kamdo deg, banlégu ale knun, na tananùgu i mabtas knun i gumnèla.

²²Agu kfulung, muna mgimò Dwata, di laan fa mgimò i kdee di tah tanà ani.

²³Tagnè agu mdà fa di kagatbuan, di là fa mgimò i banwe ani.

²⁴Tagnè agu di landè fa mahin, na dad sfuten i fnò yéél.

²⁵Di là fa mgimò dad bulul, tagnè agu.

²⁶Na di là fa mgimò Dwata i klamang banwe, na balù i kfung, tagnè agu déén.

²⁷Déén agu di kafkah Dwata i langit ditù di tah, di kimoan i bleng i langit na mahin,

²⁸di kafkah Dwata i dad labun di langit, di dad sfuten di lam i mahin,

²⁹di kafkahan ilè di gusen i mahin, du fye là sambél di kafkahan dun, na di kimoan kgal i klamang banwe ani, déén agu.

³⁰Déén agu di safédan, na magin agu kenen mimò. Na kat i duh flehew agu kenen, na lehew agu magin di kenen,

³¹na lehew agu i banwen, na i dad to tamgimoan.

³²Taman dad ngàgu, fanlingeyu agu, nun klehewyu ku nimòyu i gmangu di gamu.

³³Ku fanlingeyu i tdògu gamu, nun kfulungyu, na tooyu fkah di nawayu i gmangu ani.

³⁴Nun kafye di to flinge deg, i to kat i duh mnè déén di bà i takabgu, i to fatan deg.

³⁵Du i to mite deg too mlawil, na kanlehew kenen Dwata.