Dad Fngewe 26:5-15

⁵Kabay fye ku tnimelam kenen di fye du fye gadean laan fulung fagu di ktimelam kenen.

⁶I to mdek i to là fulung faldam ftulen i tulen, baling di kenengukel i sasè, salngad i ksasè ku kanlangan i kenen blì.

⁷I mabtas fngewe i man i to là fulung faldam, landè gukmamu dun, salngad i dad blì i to kimay.

⁸I kdayenam i to là fulung faldam, landè gukmamu, salngad i fintik, landè gukmamu ku batangam baling i batun.

⁹I mabtas fngewe man i to là fulung faldam, sadi landè btasan dikenen, salngad i to langal magot i sual, du sadi laan nagot dun.

¹⁰I to gal fimò i balù simto to i là fulung faldam, fsamukan i kdee dad demen.

¹¹I to là fulung faldam samfulê di kulang nimoan, salngad i ayem balù i utaan sanfuléan knaan.

¹²Fye fa i to là fulung faldam, di to i man nawan kenen too fulung.

¹³I to là mayè mimò galan man, “Ku lamwà agu digumnègu ken nun labè liyun magu di dalan, na ken kamfèdeg,” ani balibadan du fye là mimò.

¹⁴Gambet i takab magsayug na landè guflesan, salngad i to là mayè mimò tatì blaling di gumilean na landègukelan.

¹⁵I to là mayè mimò, balù fa smungit i knaan là mayè.