Dad Fngewe 22:12-29

¹²I kaglut gal man i to, too nifat Dwata, fagu di kablabalan i kakakéng gal sanman i to là gsalig.

¹³I to là mayè mimò dee balibadan, du fye là mimò, du manan kun ku lamwà kenen di gumnean ken kanfè i lmanaf liyun, na knaanan.

¹⁴I klafà yaan, salngad i fawel, na i dad to fanlabè Dwata, ale i mfawel.

¹⁵Én kagkah i dad ngà, gal ale mimò klandè ldam, bay ku tdoam fagu di kbadas dale di gugsalàla, tnagakla i klandèldamla.

¹⁶I to mkut i dad to landè, du fye matnù i knunan, demen mlé di dad to nun, mbaling kenen to landè.

¹⁷Ani man i to fulung faldam, manan, Fanlingemagu na tdògu ge i dad gman i to fulung faldam, na toom fkah di nawam i tdògu,

¹⁸du too fye ku gafaldamam, na fakayam tulen di dademe.

¹⁹Kayègu ku too ge smalig di Dwata, taman ani tdògu ge.

²⁰Smulat agu tlu falò dad fye gman, du tulengu ge, na gakuf déén dad fye kafngewe na gnadè,

²¹na dad gman ani gugmadeam i kaglut, du fye fulung ge tmimel i glut timel di to mdek ge dini.

²²Nang ge mlimbung i dad to landè du landè ale, na nang ge mkut dale di gumusay,

²³du Dwata i msen dale, na fanlayaman i to mkut dale.

²⁴Nang ge sgalak di to mlal malbut, na nang ge magin i to mlal flabè,

²⁵du ken mlalò ge i kenen ldam, na là ge fakay samfulê di fye.

²⁶Nang ge makang na ge mayad dad uteng i demem to,

²⁷du ku là ge gambayad balù i gumileam snabàla na nwè di ge du bayad dun.

²⁸Nang ge mili ilè gusableng i tanà gfun i dad muna tom i fkahla déén di muna fa.

²⁹I to too fulung mimò, mbaling kenen mdengeg na ise ku di mdanà to i gumimoan, bay di harì fakayan gumimò.