Dad Fngewe 21:20-30

²⁰Di gumnè i to fulung faldam nun mabtas kandeen na fye nemknaan, bay i to là fulung faldam, too mlal i kafalmon i kdeeknunan.

²¹Ku kamdo ge i demem to na mimò ge i matlu nimò, mlawil ge, matlu ge, na nafè ge i dad to.

²²I to fulung faldam, gmagan mlad i satu syudad nsen i dad tonun kgal, na gmagan lambà i mgal labat batu i snaligla glibut isyudad.

²³I to là mayè gakuf di samuk, toon fangeye i manan.

²⁴I to fdatah na fdag i kton, nadoyan i demen to, na taalì i kafdagan.

²⁵I to là mayè mimò, too dee knibalan na i knibalan ani, én igamfati kenen, du là mayè mimò.

²⁶Na i to là mayè mimò, tayud i duh aloan fandam i knibalan, bay i to matlu, fandaman i dademen to, du too kenen mayè mlé.

²⁷I dsù blé i to sasè, knang Dwata, lumban ku blén fagu di sasè knayè i nawan.

²⁸I to tmulen kéng di gususay, malmo kenen, bay i to fulung flinge na tmulen i kaglut, ssfanlinge i dad to i manan.

²⁹I to matlu, nun ksaligan i kton kenen matlu, bay i to sasè, alò tatì flingu kenen matlu.

³⁰Balù nun kfulung i to na nun kaglabatan na nun fye kafngewen, bay ku knang kenen Dwata, i kdee ani là gamtabeng kenen.