Dad Fngewe 20:1-18

¹I ninum gamlangal, én gumdà i to madoy na saglà, na balù simto mgikat di kinuman, én i to là fulung faldam.

²I kaflabè i harì gamlikò, salngad i bong ngal i lmanaf liyun, na ku faflabeam kenen, salngad ku tafafatim i ktom.

³I to là makuf di ksugak, mgafè kenen, bay i to too mayè sugak, kenen i to là fulung faldam.

⁴I to malwe mimò, i là mayè dmaru di bang kdaru, landè gwean di bang i kaktu.

⁵I dad fandam i satu to too mngalam, gambet i too mngalam yéél, bay i to nun kaglabat, glabatan dad fandam i to mngalam fandamani, na kenen gmagan fafalwà dun.

⁶Dee dad to dagla i ktola, ale kun too kamdo na too gsalig, bay i kaglutan, too malima mite i to too glut gsalig.

⁷I to matlu nun katlu i nimoan, na nun kafye gdawat i dad ngaan.

⁸Di ksudeng i harì di gumukuman, dilean sa i ksasè nukuman.

⁹Simto to fakayan man too mlaneb i fandaman na landè salaan?

¹⁰Knang Dwata i dad to tmimbang di timbang mlimbung, na masad di mlimbung gumasad.

¹¹Balù i tingà dileam ku tan i ldaman fagu di dad mgimoan, ku gal mimò fye na matlu.

¹²Dwata mlé gito klinge, du fye flingeito, na mata, du fye neyeito.

¹³Ku tatì ge fadlug kudang mbaling ge to landè, taman too ge falgad, fye nun lukas knaanam.

¹⁴I dad to mayad gal mugak gablà di kabtas i dad fabli, bay di kulêla dagla, du mdanà i kagwèla dun.

¹⁵Blawen na dad mabtas batu too mabtas, bay mdatah fa kabtas i gman i dad to nun gnadè.

¹⁶Ku nun to makang kenen mayad uteng i to laan gadè, fye ku nleges kenen smandà i knunan, kel di kagbayadan i utengan.

¹⁷I to gamwè fagu di klimbung too lehew, salngad i klehew dikagneman i too fye knaan, bay i gukelan sasè, salngad ksasè i baan too fnò falak.

¹⁸Ku nun fandamam i fanam nimò, mni ge funa i fye fngewe, na ku fan ge salu di gusfati, mni ge funa i fye fngewe.