Dad Fngewe 14:6-19

⁶I to gal madoy, mngabal i kfulung, bay landè teenan, bay i to nun kaglabatan, mlal kenen gambet.

⁷Fawag ge di to là fulung faldam, du landè fye gagbetam di kenen.

⁸I kfulung i to fulung mebe i kton, gmadè sa kenen ku tan inimoan, bay i to là fulung faldam, én fandaman gmadè kenen ku tan inimoan, bay fangawan i kton.

⁹I dad to là fulung faldam ku gamsalà tatì landè di dale, bay i dad to fye, mngabal ale kfagu klifet i dad salà.

¹⁰Landè to fakay too magin ge di sasè klidù nawam, na landè to fakay too magin ge di too klehew nawam.

¹¹I gumnè i to fye, sana ktadagan, balù tamlo nan malbà gumnè i to sasè.

¹²Nun dalan fandam i to too matlu, bay gusen i dalan ani di fati.

¹³I klidù i to fakay bunin fagu di ulén, bay kafngen mulé déén fa i kliduan di nawan.

¹⁴I to kmagol i fye nimò too gamdawat i balas di sasè mgimoan, bay i to mimò fye, mdà di fye mgimoan, nun kafye gdawatan.

¹⁵I to kulang i kfulungan faldam, fnaglutan balù tan i lingen, bay i to fulung mebe i kton, toon fanlinge ku nun kaglutan.

¹⁶I to fulung faldam, nun klikoan di Dwata na fawag di ksamuk, bay i to là fulung faldam, tatì mimò na là fgeye na sasè igukelan.

¹⁷I to mlal malbut mlal gsalà, na knang i dad to i to mgaw i demen to.

¹⁸I dad to kulang i kfulungla faldam, gamdawat i balas di klandèkfulungla, bay i dad to fulung mebe i ktola, matnù i gnadèla.

¹⁹Satu duh, i dad to sasè, lkuad di muna i dad to matlu, du fdanà ale na too ale fakdo mni tabeng.