Dad Fngewe 12:9-28

⁹Fye fa i to mdanà ku too malgad mimò du fye mto, di to baling tatì flingu kenen bong to, bay mnè kenen di kbitil.

¹⁰I to matlu, too fye kifatan i dad lmanafan, bay i to sasè, too sasè kiboan i dad lmanafan.

¹¹I to too malgad mimò fule nun lukas i knaanan, bay i to mlalò i dad nimò landè gukmamu, landè kaglabatan.

¹²I dad to sasè, én alò kayèla nimò i sasè, bay i dad to matlu, là mgili i kimòla fye.

¹³I to sasè mfawel kenen fagu di sasè taluan, bay i to matlu galwà di ksamuk.

¹⁴I to gamdawat i untung fagu di dad gmanan na i dadmgimoan.

¹⁵I to là fulung faldam, fnaglutan slame fye i kdeenimoan, bay i to fulung faldam too flinge i fngewe.

¹⁶I to là fulung faldam, laan gadnan i kaflabean, bay i to nun kaglabat, fbayaan i kafyà kenen.

¹⁷I to tmulen i kaglut di gususay falwaan i kaglut, bay i to tmulen i là glut falwaan i kakakéng.

¹⁸I to i là funa fandam i manan, i manan gamban salngad i kagban i fais, bay i to fulung faldam, i manan salngad i bulung dugafgulê.

¹⁹I kakakéng là sa mlawil du nun gusenan, bay i kaglut mlawil landè gusenan.

²⁰I to faldam mimò sasè, klimbung i mnè di nawan, bay i to faldam mimò fye, klehew i mnè di nawan.

²¹Landè sasè mkel di to matlu, bay i to sasè gal nkel i samuk.

²²Too knang Dwata i dad to tmulen kakakéng, bay toon kanlehew i dad to tmulen i kaglut na dmohò i manla.

²³I to fulung mebe i kton laan fdag i gnadean, bay i to là fulung faldam balingan fdilè i klandè gnadean fagu ditaluan.

²⁴I to malgad mimò, kenen mbaling to mebe i nimò, bay i to là mayè mimò, landè fye kel di kenen, bay mimò fagu dileges.

²⁵I to gal nun ksamuk i nawan landè klehewan, bay fagu di too fye talù i demen to, mbaling matgal i nawan.

²⁶I to matlu, kenen malak i dad demen sgalak di fye, bay i dalan i to sasè gafasyat dale.

²⁷I to là mayè mimò, laan gwè i knayean, bay i to malgad mimò, nun kafye gwean.

²⁸I matlu dalan salu di klawil, bay i bigkò dalan salu di fati.