Dad Fngewe 10:11-31

¹¹I to matlu, galan man i gafye, na gatgal i dad to mlinge imanan, bay i to sasè, gbunin i klabean fagu di kfulungan talù.

¹²I gukel i kasnang nawa, dunan samuk, bay gukel i kakdo, dunan klifet i kdee salà.

¹³Fagu di talù i to nun kaglabat, dnileam i kfulungan, bay i to landè kaglabatan, fye ku fanlayam kenen.

¹⁴I dad to fulung faldam, làla fagfan i gnadèla du funala gal toofandam ku tan i manla, silang talù. bay ku talù i to là fulung faldam, too mlal i ksamuk.

¹⁵I kamlung i to nun knun, dunan i knunan, bay i gafalmo i to landè, dunan i klandean.

¹⁶Mdà di untung i to matlu, nun klawilan, bay mdà di untung i to sasè, nun kaflayaman.

¹⁷I to flinge ku nun mngak kenen, én i to mlawil, bay i to là dmawat i kagsalaan, nun sasè gdawatan.

¹⁸I to muni i knang nawan, én i to tmulen kakakéng, na i to samtugad salék, én i to là fulung faldam.

¹⁹I to too mayè stulen, slaan gsalà du mdà di dee manan, bay i to gadnanan i taluan, kenen i to fulung faldam.

²⁰I dad talù i to matlu too mabtas, salngad i btas i glut salafì, bay i fandam i to sasè landè btasan.

²¹I dad talù i to matlu, too gamtabeng i dee dad to, bay i to là fulung faldam, là mlawil du landè kaglabatan.

²²Én gafnun i to mdà alò di kafye blé Dwata, na i kafye blén là gfun dun fagu di kalgad mimò.

²³I to là fulung faldam, too flehew di kimoan sasè, bay i to nun kaglabat, too flehew di kimoan fye fagu di kfulunganfaldam.

²⁴I kanlikò i to sasè, baling sa mkel di kenen, bay i to matlu, én sa mkel di kenen i knayean.

²⁵Kakel i bong ulen na too mgal i nus fugen i to sasè, bay i to matlu kel di atuan là fisan di kgal i nus.

²⁶Nangam fimò i to malwe mimò du baling smamuk ge, na sasèkafalyalom, salngad kafalyalom i kifanam ku mgihok i sukà ku demen kafdê matami buk.

²⁷I to nun klikoan di Dwata, mlawil kenen, bay i to sasè, mlal mati.

²⁸I fatan i to matlu, én gamlé kenen klehew, bay i fatan i to sasè, là gdawatan dun.

²⁹Kanlung Dwata i to matlu, bay i to mimò sasè, falmon.

³⁰I to matlu, nun kenen kafye mdà di Dwata landè gutlagan, bay i to sasè, là mlawilan di tah tanà ani.

³¹I gman i to matlu gugmadè i kfulungan, bay i gman i to sasè, matlag sa kadang.