Daahili Aloho 1:5-16

⁵Nia ahina o Jerusalem, au e luuli gei au e madanga, au e luuli gadoo be nia hale laa i di anggowaa o Kedar, gei e madamada gadoo be nia mee dau hale ala i lodo di hale king o Solomon.

⁶Hudee hagahuaidu ina au i tadunga o dogu gili, idimaa dogu gili ne haga luuli go di laa. Ogu duaahina daane ne hagawelewele mai gi di au, guu hai au gi ngalua i lodo di hadagee waini. Au dogu madagoaa e benebene dogu huaidina ai.

⁷Dogu aloho, hagia mai be dehee di gowaa dela e lahi ginai au siibi? Dehee di gowaa dela e hagamalu ai digaula gi daha mo di laa o di oodee? Au e hai gi halahala goe i lodo nia siibi o digau hagaloohi siibi ala i golo eiaha?

⁸Di ahina kaedahi humalia, goe e de iloo di gowaa? Daudalia adu nia lohongo wae o nia siibi gi gidee goe di gowaa dela e humalia gi au kuudi, i baahi nia hale laa o digau hagaloohi siibi.

⁹Goe go dogu aloho, nia daane e hidigaagaa huoloo nadau lodo adu gi di goe gadoo be nia hoodo daane ala e hidigaagaa ang gi nia hoodo ahina ala e dagidagi nia waga dauwa hongo henua di king o Egypt.

¹⁰Nia ngaahulu o do libogo e mmaadanga i di gili o gauwae, gei e daudau eia i di gili doo uwa gadoo be nia hadu hagalabagau.

¹¹Gimaadou gaa hai doo hau gi nia goolo, gaa humu gi nia silber.

¹²Dogu king guu moe i hongo dono lohongo maluu. Di ahiaalangi guu kala i di hauiha o dagu lolokala.

¹³Dogu aloho e hauiha kala gadoo be di ‘myrrh’ i dono madagoaa e moe gi hongo ogu uu.

¹⁴Dogu aloho le e hauiha gadoo be nia akai lodo henua ala ma ga moholoholo i lodo nia hadagee waini o Engedi.

¹⁵Dogu aloho, goe e madanga huoloo, o golomada e maahina mo do aloho.

¹⁶Dogu aloho hagalabagau, goe e madanga huoloo, gei gu hai au gi tenetene huoloo! Tau moenge la go nia geinga tolo aanei.