Buk Song 21:4-11

⁴Em i askim yu long givim em laip, na yu givim em. Na yu mekim laip bilong en i stap longtaim tru.

⁵Yu helpim em na em i gat biknem moa yet. Nem na strong bilong em yu yet yu givim em.

⁶Yu save mekim gut tru long em, na tru tumas, yu bai mekim olsem inap oltaim oltaim. Yu stap klostu long em, na dispela i mekim em i amamas tru.

⁷God Antap Tru, king i bilip tru long yu. Yu save marimari long king oltaim olsem na bai em i sanap strong.

⁸Bai king i holimpas olgeta birua bilong em. Na bai em yet i kalabusim ol man i no laikim em.

⁹Taim em i kamap long ples klia bai em i pinisim ol birua, olsem bikpela paia i kukim ol samting. Tru tumas, bai God i kros na i daunim ol, na bai paia i kukim ol olgeta.

¹⁰Bai king i kilim i dai olgeta pikinini bilong ol. Na bai lain pikinini bilong ol i no inap i stap moa long graun.

¹¹Ol i tingting na pasim tok long mekim nogut long em. Tasol ol i no inap winim em.