Mbouŋ to Yes Israela 21:4-11

⁴Ye ighason ghom pa uŋgin poiani ila sawa to malmal, leso imaat sob, ve ineep pooi itaghoni taghoni gha ila. Ve yom ulooŋ suŋuuŋ toni.

⁵Yom uuli le ilib pa malmal, tauto iza ivot inim tiina. Ve upambooda pa tapirim ve poia tiom. Tauto varu ilaan irau ndug ndug, ve tamtoghon tipaiti tighaze ye iza tiina kat.

⁶Onoon kat, poia tiom pale izaza toni itaghoni taghoni gha ila. Ve yom uneep tomani. Tauto lolo poia le poia kat.

⁷Kinik tiei inumeer Yoova. Tovenen mbeb eta irau ighami itap ne maau. Pasa, Maaron Tiina To Ilib Pa Ndimaronŋa Tisob Ne, lolo ineep tuŋia ila toni, ve iuluuli itaghon saveeŋ mbuaaŋ toni.

⁸O kinik, nimam pale ikis koiamŋa tisob. Yes to tighur koi payom, nimam waan pale isavag di.

⁹Sawa to upatooŋ tapirim ivot ighazooŋ, yom pale uwaghamun di kat inimale yab tiina ighan mbeb. Onoon kat, mbalmbali to Yoova pale iza todi, ve yab toni ighan suvun di.

¹⁰Ndinatudi paam, yom pale upasob di pa taan. Tovenen muri, paghu todi eta irau ineep muul maau.

¹¹Onoon, yes tikaal ataam payom, ve timbua saveeŋ tighaze tiwaghamun ghom. Eemoghon ŋgar todi samia tonowen irau ighur anoŋa maau.