Bugagia Bidibo Kolesagade Po Asęai Buku 9:2-15

²Agai te kibu hasa dabe elama, tama ulama, tama te pusai wain wę pedalumainu ilali. Tama agai te nai tuabo tebol sisi ilama, dodolai.

³Agai te aga sę ebo we dabe tagala palama, te taun pesage tomoba doligi pelama, tama augwaligo te tiwai i wali,

⁴“Dage wiegi yai homu kolesaga meni yai bidi, me dage kolesaga umuna sai bidi dabe, dage te wiegi yai doloba pai homu kolesaga yai bidigo beba asiąo.

⁵Dage aselama, aga dali te nai, me te pusu yai wain ąį agai sisi yali, te tuagasiąo.

⁶Te duga umuna sai kolesaga ebo tagalama, tama aselama, te bidabo ula sagasiąo. Dagego te wiegi yai homu kolesagago sunumi wali piąo,” augwaligo te po wabo dao.

⁷Nago te posobo po wabo bidi dodolobo si da, teda agai te dwai po nageba wei ponaibao. Tama nago te dwai sę ebo bidi dodolainu ebaso da, teda agai nage elama, tama nago tigi dolaibao.

⁸Tama tiyu, te dwai posobo po wabo bidi me dodoligio, tagalao. Agai te nage dali boi bidi naga yaibao. Tiali goli, nago te wiegi yai homu kolesaga elalubo bidi dodolobaso da, te agai nage wei homu yaibao.

⁹Nago te wiegi yai homu kolesaga elalubo bidiba po mani da, teda agai homu kolesaga te wiegi yai mu pedelaibao. Tama nago te doloba pai bidi ola mobaso da, teda nago agai kolesaga te kuna mu ma konemainu tebao.

¹⁰Te Genuai Bidide wi eyu, aga dologode bidibo bidi, agai te dwagi yai homu kolesaga page konebo gagalai dao. God te Tedali Gasagi Yai mu dao. Tama nago te wiegi yai kolesaga sainogo da, teda hasia bolo nago aga bugagia konea sao.

¹¹Te wiegi yai homu kolesagago da, te da nage te tǫde sesabi elama bidimainu yaibao, tama nago kibu be te hauwa mu bidaibao.

¹²Te nago wiegi yai homu kolesaga sobaso da, teda naga digi te naga wiegi yai bugagia ilibao. Tiali goli, nage te hagoma ebo bidi da, teda naga digi naga ma te dolobo dao.

¹³Te umuna sai kolesaga te we me deligo po dągą subigila ola bilibo tiwai ebao. Agai homu kolesaga te wiegi yai me elalusiąyu, tama te wiegi yai kolesaga me konebeo.

¹⁴Agai be te taun pesage tomode ugwadu elaluali, tama aga te sunumi pąde elalubo sia saide dugulalubao.

¹⁵Agai te we bidi dabe augwa sęba soabo sulama, tama agai augwali asela yao olama, i wabo dao. Agai te tama po obao,