Bugagia Bidibo Kolesagade Po Asęai Buku 1:19-33

¹⁹Te hwįbo bidi dabego, ma te nai wi sabo bidi dabego te kolesaga wali pabo dao, tama tiyu, augwa digi dolaibao. Te augwa wi sali nai dabego te augwali dolobo ąǫ ebo dao.

²⁰Te wiegi yai doloba pai homu kolesaga te tiwai, te we me deli te sunumi tunu mage dabeba doligi pelama, me te maketba pelama, tama te we bidi dabeba po olama, i wabo tiwai ebo dao.

²¹Tama me aga te bidi sisinibo pesage te taunba pabo genuai obo bagulali sunumi pąde doligi pelama me, tama te tigidali pesage te we bidi hauwa bidalubo madi doligi pelama, tama agai te tiwai i wabo,

²²“Dage te homu kolesaga meni yani hani, dage te tiwai sesemane bidabo homu eba, agawe? Dage te wabo pabo bidi dabe tiwai ebao. Dagego te wiegi yai kolesaga sabo homu wei me isiąma, tama dagego tede posobo po wabo dao. Mena sogo dagego te kolesaga ebo tagalaibawe?

²³Eno dagebolo po bomonama weyu, dagego te dwai kolesaga ebo tagalao po obao. Dagego eno po wali pigi sogo da, teda eno dage ola mayu, tama dageba wiegi yai homu ebo kolesaga magi dao.

²⁴Eno dage i wali, te enaba asomainu yali, tiali goli dagego hagela yai.

²⁵Dagego eno wiegi yai po tudiba munama, tama eno dage dodolainu ebo sogo te dagego hagoma ebo dao.

²⁶Dagego tama tialigo da, teda te eno me eno te dagego ebo kolesaga tobage tiwai yaibao. Tama te genuai sęgęgo dage gegebo sogo, tama dage dolobaso, teda ena gisugu genuai gilama mu weyu, tama dageba dwai posobo po waibao.

²⁷Te dwai sogo te dageba te bomai wali aselama, te pedalubo tiwai eyu, tama te sęgę me dene tego dage doliyu, te wę gegi page pobegebo tiwai bomai waligo ebo tiwai gilama yaibao.”

²⁸“Te tama tebo sogo te eno dage tau somainu te dagego ena i waibao, tiali goli eno po wei me ponegobeo. Tama dagego ena gegebo sę ebadi, tiali goli te dagego ena me susiąwai.

²⁹Dagego te wiegi yai homu kolesaga sabo homu te wei me isiąma, tama dagego te Genuai Bidi dologode bidabo homu me ebeo.

³⁰Dagego te eno wiegi yai po sela sąnama, tama te eno dage dodolainu ebaso, te dagego ena tudiba muai dao.

³¹Tama tialigo da, megi da, te dagego duga yali dwai kolesagago walali du dabe tuao. Awe, dagego haniani dwai sę yabo homu kolesaga yai dao. Megi da, dagego te kolesagago du dabe tulama, tabi pągąwaibao.

³²Magi baso meni. Te wiegi yai homu kolesaga meni yani we bidi dabe augwaligo te ena tudiba munama, tama augwa te kolesagago digi te augwa ela munama, augwa isaibao. Te bidi dabego homugo augwaligo te tigidali nai koneani homu yali, augwali te wabo pabo bidi dabe tiwai ebao. Augwa te homu kolesagade te augwa digi augwa dolobo dao.

³³Tiali goli, te eno poba olo bugagia mubo we bidi da, te augwali bugagia bidaibao. Tama augwa te sęgę me wi me isąwaibao, magi baso meni, augwa koneani, te dwai nai augwaliba me pedalugobe da homu ebo dao,” te wiegi yai homu kolesaga da, te tobage po wabo we me deli tiwai dao.